Vishnudharmottara Purana · Chapter 1.66

// mārkaṇḍeya uvāca /// //
kailāsaśikhare ramye rāmasya ramatastadā //
ājagāma haraṃ draṣṭuṃ devadevaḥ purandaraḥ

sa samāsādya deveśaṃ praṇamya vṛṣabhadhvajam //
uvāca vacanaṃ samyaṅmudā rāmasya sannidhau

śakra uvāca //
tvatprasādena deveśa mayā prāptaṃ triviṣṭapam //
rāmeṇa ghātitāḥ sarve yathā me devaśatravaḥ

avadhyāstridaśānāṃ ye varadānabaloddhatāḥ //
naravadhyāḥ kṛtāste hi brahmaṇā sumahātmanā

pātālanilayā deva avadhyā devatāgaṇaiḥ //
bādhante naravadhyā me lokānāṃ ca jagatpate

tāṃśca ghātaya deveśa rāmeṇākliṣṭakarmaṇā //
mārkaṇḍeya uvāca //
evaṃ kariṣyatītyuktvā visṛjya tridaśeśvaram

uvāca vacanaṃ rāmaṃ bhārgavaṃ purataḥ sthitam //
śaṅkara uvāca //
gaccha bhārgava pātālaṃ pātālanilayāñjahi

śakraśatrūndurācārānnaravadhyānmahāsurān//
vaiṣṇavaṃ cāparatnaṃ te mayā nyastaṃ pituḥ kare

tadādāya śaraistīkṣṇairjahi tānrāma dānavān //
akṣayaṃ tūṇamādāya śarapūrṇamidaṃ tathā

mārkaṇḍeya uvāca ///
evamuktvā dadau cāsya tūṇamakṣayasāyakam //
dattvā ca bhagavānāha rāmaṃ parabalārdanam

śaṅkara uvāca //
tūṇametatpradātavyaṃ tvayāgastyāya bhārgava //
cāparatnaṃ ca rāmāya kṛte karmaṇi suvrata

agastyo'pi mahātejāstūṇamakṣayasāyakam //
rāghavāyātiyaśase rāmāyaiva pradāsyati

rāmasaṃdarśanādūrdhvaṃ mā kṛthāḥ śastradhāraṇam //
rāmasaṃdarśane rāma tava tejo hi vaiṣṇavam

rāmaṃ pravekṣyati tadā surakāryārthamūrjitam //
yāvattvaṃ tejasā yukto vaiṣṇavena paraṃtapa

tāvacchatrugaṇānsarvānsamareṣu vijeṣyasi //
sthātuṃ na śaktāstava daityasenā astāyudhasya pramukhe dvijendra //
ādāya cāpaṃ yudhi vaiṣṇavaṃ tattūṇaṃ tathemaṃ jahi devaśatrūn

iti śrīviṣṇudharmottare mā० saṃ० prathamakhaṇḍe rāmaṃ prati śaṅkarānuśāsane ṣaṭṣaṣṭitamo'dhyāyaḥ