Vishnudharmottara Purana · Chapter 1.64

// śaṅkara uvāca // //
ādau deśe tathā rāma prayataḥ susamāhitaḥ //
svādhyāyenārcayeddevaṃ prayatenāntarātmanā

tāvatkāryaṃ dvijaśreṣṭha svādhyāyaṃ vidhivatsadā //
yāvadastaṃ gato rāma savitā dīptadīdhitiḥ

tatastvastaṃ gate sūrye svācāntaḥ susamāhitaḥ //
praviśya devatāveśma nairājyaṃ karma kārayet

pādapīṭhāntakaṃ karma kṛtvā prāguktamañjasā //
arghyamācamanīyaṃ ca dattvā pādyaṃ ca bhārgava

sthālīmaklinnanaivedyādārabhyābhihitaṃ tataḥ //
kartavyamanuyāgāntaṃ prayataḥ susamāhitaḥ

kṛtvānuyāgaṃ vidhivatpraviśya suramandiram //
svādhyāyasyānusaṃdhānaṃ tataḥ kuryātsamāhitaḥ

yogakālamupādāya paścātkuryādvisarjanam //
kṛtvā visarjanaṃ yuktastiṣṭhedyāmamatandritaḥ

yogādanantaraṃ svapyādevaṃ yuktasya bhārgava//
svayaṃ kālo'pi satataṃ yogamadhye'bhidhīyate

snānārhakatvaṃ yadi nāsti tasya yāme vibuddhastu tathā caturthe //
yuñjīta yogaṃ ripukālabhūtaṃ yogena buddhiḥ samupaiti sargam

iti śrīviṣṇudharmottare prathamakhaṇḍe mā० saṃ० śaṅkaragītāsu svādhyāyakālakathanaṃ nāma catuḥṣaṣṭitamo'dhyāyaḥ // ६४ ///