વિષ્ણુધર્મોત્તરપુરાણમ્ · અધ્યાય 1.64

॥ શઙ્કર ઉવાચ ॥ ॥
આદૌ દેશે તથા રામ પ્રયતઃ સુસમાહિતઃ ॥
સ્વાધ્યાયેનાર્ચયેદ્દેવં પ્રયતેનાન્તરાત્મના

તાવત્કાર્યં દ્વિજશ્રેષ્ઠ સ્વાધ્યાયં વિધિવત્સદા ॥
યાવદસ્તં ગતો રામ સવિતા દીપ્તદીધિતિઃ

તતસ્ત્વસ્તં ગતે સૂર્યે સ્વાચાન્તઃ સુસમાહિતઃ ॥
પ્રવિશ્ય દેવતાવેશ્મ નૈરાજ્યં કર્મ કારયેત્

પાદપીઠાન્તકં કર્મ કૃત્વા પ્રાગુક્તમઞ્જસા ॥
અર્ઘ્યમાચમનીયં ચ દત્ત્વા પાદ્યં ચ ભાર્ગવ

સ્થાલીમક્લિન્નનૈવેદ્યાદારભ્યાભિહિતં તતઃ ॥
કર્તવ્યમનુયાગાન્તં પ્રયતઃ સુસમાહિતઃ

કૃત્વાનુયાગં વિધિવત્પ્રવિશ્ય સુરમન્દિરમ્ ॥
સ્વાધ્યાયસ્યાનુસંધાનં તતઃ કુર્યાત્સમાહિતઃ

યોગકાલમુપાદાય પશ્ચાત્કુર્યાદ્વિસર્જનમ્ ॥
કૃત્વા વિસર્જનં યુક્તસ્તિષ્ઠેદ્યામમતન્દ્રિતઃ

યોગાદનન્તરં સ્વપ્યાદેવં યુક્તસ્ય ભાર્ગવ॥
સ્વયં કાલોઽપિ સતતં યોગમધ્યેઽભિધીયતે

સ્નાનાર્હકત્વં યદિ નાસ્તિ તસ્ય યામે વિબુદ્ધસ્તુ તથા ચતુર્થે ॥
યુઞ્જીત યોગં રિપુકાલભૂતં યોગેન બુદ્ધિઃ સમુપૈતિ સર્ગમ્

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં૦ શઙ્કરગીતાસુ સ્વાધ્યાયકાલકથનં નામ ચતુઃષષ્ટિતમોઽધ્યાયઃ ॥ ૬૪ ॥।