Vishnudharmottara Purana · Chapter 1.63

// śaṅkara uvāca //
pādapīṭhāntakaṃ karma kṛtvā prāguktamañjasā //
nivedya darpaṇaṃ deve tato mātrāṃ nivedayeta

bījaistu paridhānārthaṃ prayataḥ susamāhita //
tailamudvartanaṃ caiva camasīṃ cāpyanantaram

tato niṣpuṃsanaṃ kṛtvā deyānyācamanāni ca //
ropraṃ kālīyakaṃ caiva tathā vai bījapūrakam

varṇakaṃ tagaraṃ caiva priyaṅguṃ gaurasarṣapāḥ //
sarvauṣadhīrvṛkṣabījaṃ sarvagandhāṃśca bhārgava

ratnodakaṃ ca vividhaṃ snānīyamudakaṃ tathā //
snānīyaṃ ca tato rāma susugandhaṃ ca dāpayet

tataḥ sugharmaṇārthīyāḥ kalaśā sumanoharā //
svalaṃkṛtā pradātavyā phalapallavapūritāḥ

puṣpagandhayutā rāma pavitreṇa pavitritāḥ //
śubhānāṃ tīrthasaritāṃ rāma puṇyajalaiḥ śubhaiḥ//

yathāvibhavatasteṣāṃ bahutvamapi kārayet //
tasminkāle tathā kārye kṣveḍitotkṛṣṭaniḥsvanam

jayaśabdaṃ ca vipulaṃ śaṅkhabherīvimiśritam//
udakagrahaṇārthīya tato dadyācca śāṭakam

tato rāma pradātavyaṃ dhautavāsāyugaṃ śubham //
tatastu pūrṇakalaśamāsanānāṃ pradakṣiṇam //1.63.१ ०//
kṛtvā rāma kṣipedvedyāṃ puṣpapallavaśobhitam//
tatastvācamanīyaṃ ca pūrvavadvinivedayet

maṅgalāni ca mukhyāni tato dadyādvicakṣaṇaḥ //
satyāsanasthaṃ deveśamarcayiṣyāmyataḥ param

snānāsanāni tyajyantāmityevaṃ parikīrtayet //
mārgatrayādathārabhya pādapīṭhāntakaṃ punaḥ

kartavyaṃ sakalaṃ karma tvāvāhanavisarjanam //
tato'nulepanaṃ dadyādvyajanena ca vījayet

tataśca vīṭakaṃ dadyāttathā kūrcaprasādanam //
vastraṃ vibhūṣaṇaṃ caiva puṣpāṇi vividhāni ca

veṣṭanaṃ ca srajaṃ caiva kaṅkaṇaṃ ca manoharam //
tathā ramyaṃ pratisaraṃ supiṣṭaṃ ca tathāñjanam

darpaṇaṃ copacāraṃ ca pradīpaṃ dhūpameva ca //
tathaivācamanīyaṃ ca gītavādyasvaraṃ tathā

puṇyāhajayaśabdaṃ ca stotrodīraṇameva ca //
tathaivopānahau deye chatraṃ cāmarameva ca

yānaṃ ca vāhanaṃ caiva patākāśca dhvajāni ca //
bhogānāṃ pūraṇārthīyāṃ tato mātrāṃ nivedayet

bhogānāṃ sarjanaṃ kṛtvā yathāśaktayā dvijottama //
avidyamānā ye bhogā mātrāsveva prakalpayet

evamabhyarcya deveśaṃ sarvabhogaissamāhitaḥ //
arcayenmadhuparkeṇa paśuyāgo na cedbhavet

paśuyāgābhigamane madhuparko vidhīyate //
abhyarcya madhuparkeṇa tatastvanyena pūjayet

|
atrāsanānyapīcchanti kecidapyaparāṇi tu //
ādau sthālīṃ ca tenātha pradadyādarhaṇīṃ tataḥ

annaṃ haritakopetaṃ bhakṣyaṃ vyañjanasaṃyutam //
nivedya darpaṇaṃ dadyāttathā niṣpuṃsanaṃ tataḥ

kṛtvā hyācamanīyaṃ tu mātrāṃ ca tadanantaram //
tatastu saṃvibhāgārthaṃ dātavyaṃ tvarhaṇaṃ tataḥ ९//
bhūyo nivedayedannaṃ pūrvavatsusamāhitaḥ //
darpaṇaṃ ca tato dadyātpādyaṃ niṣpuṃsanaṃ tataḥ // २६ ///
dattvā cācamanīyaṃ ca śāṭakaṃ ca nivedayet //
hastaniṣpuṃsanārthāya mātrāṃ ca tadanantaram

nivedya paścāttāmbūlaṃ devaṃ vahnau samarcayet //
vahnisaṃpūjanaṃ kṛtvā kāryakārisamarpaṇam

atithīnāṃ tataḥ kāryaṃ bhartavyānāṃ ca bhārgava //
tato'nuyāgakāle tu pavitreṇa samutkṣipet

āsanaṃ bhājanaṃ caiva sānnaṃ prayatamānasaḥ //
upaviśya tataḥ paścātprabhavenāpyayena ca

idamagnetimantreṇa prācyāṃ grāsāṣṭakaṃ bhavet //
tatastu prayato bhūtvā viśeddevagṛhaṃ tataḥ

ijyākālānusaṃdhānaṃ tataḥ kuryātsamāhitaḥ //
kuryātsvanyāyakālasya copādānamanantaram

visarjanaṃ tataḥ kuryātprayatenāntarātmanā //
ijyākālavidhistveṣa mayā te rāma kīrtitaḥ

bhagavānvāsudevastu devassaṃkarṣaṇastataḥ //
pradyumnaścāniruddhaśca prabhāvo'yamudāhṛtaḥ

saṃkarṣaṇastathāvyakta ātmā pradyumna ucyate //
devastattvagatassarvaṃ aniruddho mahāyaśāḥ

sa nāthassarvalokānāṃ sṛṣṭisaṃhārakārakaḥ//
(puruṣo'pi tathā satya acyutaśca dvijottama

bhagavānvāsudevaśca tvavyayo'yamudāhṛtaḥ //
catvāra ete dharmajña vāsudevāḥ prakīrtitāḥ

bhagavacchabdavācyāśca sarvabhūtabhavodbhavāḥ //
yaḥ paraḥ puruṣo rāma vāsudevaḥ prakīrtitaḥ

bhagavacchabdavācyaśca sarvabhūtabhavodbhavaḥ //
śeṣatattvaṃ gataḥ sarvamaniruddho mahāyaśāḥ

/
sa nāthaḥ sarvalokānāṃ sṛṣṭisaṃhārakāraṇaḥ // )
tadetatpaṭhyate sūkte pauruṣe dvijasattama

pādo'sya viśvā bhūtāni tripādasyāmṛtaṃ divi //
bhujiḥ prītistathaivārciḥ prāṇastarpaṇamarhaṇam

nivedanañcācamanamaṣṭadhā mantranirṇayaḥ //
mantreṇa cārhaṇāntena pradadyādarhaṇaṃ punaḥ

tathaivācamanāntena deyamācamanaṃ bhavet //
prāśanāntena mantreṇa tarpaṇaṃ vinivedayet

pratigraheṣu mātrāsu pādukāsu ca darpaṇe //
chatre ca vālavyajane tālavṛnte tathaiva ca

upānatsu tathā yāne vāhaneṣu bhṛgūttama //
abdhidhvajeṣu ca tathā patākāsu ca kīrtitāḥ

śeṣāṇāṃ kāmabhogānāṃ nityaṃ saṃkīrtayettu vai //
sarvatraprīṇanaṃ kāryametāvānmantranirṇayaḥ

devānāṃ pādapīṭhānāṃ kalaśānāṃ tathaiva ca //
vahnestathāsanānāṃ ca catuṣṭvaṃ vinivartate

kalaśāsanavahnīnāṃ saṃkaraṃ tu na kārayet //
tathaiva padapīṭhānāṃ teṣāṃ cihnaṃ ca kārayet

prāpaṇe madhuparke ca mātrāsu ca bhṛgūttama //
sumanastu sadā rāma yatnaḥ kāryaḥ samarcane

saumanasyaṃ paraṃ rāma devadeve niveditam //
yasmāttu vartate tasmātproktāḥ sumanasaḥ sadā

māṃ trāsyati bhayādghorāttasmānmātrā prakīrtitā //
prāpayiṣyati ca sthāne nityaṃ duḥkhavivarjite

yasmāttasmāddvijaśreṣṭha proktaṃ prāpaṇakaṃ sadā //
paramaṃ yatparaṃ rāma madhusaṃjñaṃ taducyate

tadāpyate yadā tena madhuparkastadā smṛtaḥ //
ijyāvidhāno'yamudīritaste samāsato bhārgavavaṃśacandra //
ataḥ paraṃ rāma nibodha puṇyaṃ svādhyāyakāle gadato mamādya

iti śrīviṣṇudharmottare prathamakhaṇḍe mārkaṇḍeyavajrasaṃvāde śaṅkaragītāsu ijyākā lavidhirnāma triṣaṣṭitamo'dhyāyaḥ