Vishnudharmottara Purana · Chapter 1.62

// śaṅkara uvāca //
bhogānāmarjanaṃ kāryaṃ tato rāma svakarmaṇā //
sthirāṇāmasthirāṇāṃ ca yathāvadbhṛgunandana

āsanādyāstu ye bhogāḥ kālenāpyavināśinaḥ //
sthirāste rāma nirdiṣṭā pariśiṣṭāstathā carāḥ

puṣpaṃ patraṃ phalaṃ mūlaṃ tathā haritakaṃ śubham //
udakaṃ cārcanīyaṃ syāttasminnahani bhārgav

upādānāya niṣkrānte kuṭumbinyatha satvaram //
kuṭumbinī suprayātā dhautopaskarabhājanā

sādhyānāṃ rāma bījānāṃ paśośca sukṛtasya ca //
śākānāṃ vyañjanānāṃ ca svarjitānāṃ gate'hani

śaktiṃ kuryātsadā tasya vahninopadamena ca //
deśe śucau suprayātā susahāyaguṇānvitā

sarvaṃ prakṣālitaṃ kāryaṃ keśakīṭādivarjitam //
bhūmāvanupaliptāyāṃ sthāpyaṃ rāma na kiñcana

sarvaṃ sādhyamathānnādyaṃ gandhavarṇarasānvitam //
nityaṃ paripacedrāma nāsvādyaṃ kenacit kvacit

upādānamathādāya praviśya ca gṛhī gṛham //
śucau prakṣālitaṃ sarvaṃ copādānamupanyaset

suprakṣālya tathā bhāgaṃ pavitreṇa samutkṣipet //
evaṃ kṛtvā hyupādānaṃ snāyāttu vidhinā tataḥ

dhautavāsā suprayataḥ svācāntaḥ susamāhitaḥ //
praviśya devatāveśma prāgvadbhṛgukulodvaha

namaskārādikaṃ sarvaṃ prayuñjīta samāhitaḥ //
upādānānusaṃdhānaṃ tvādānaṃ cāpyanantaram

ijyākālasya dharmajña kuryātprayatamānasaḥ

āsannabhogaḥ prayanāntarātmā kuryādathejyāṃ raṇacaṇḍavega //
krodhaṃ niyamyātmahite niviṣṭastadbhāvabhāvopahitaśca nityam

iti śrīviṣṇudharmottare prathamakhaṇḍe mā०saṃ० śaṅkaragītāsūpādānakaraṇo nāma dviṣaṣṭitamo'dhyāya