વિષ્ણુધર્મોત્તરપુરાણમ્ · અધ્યાય 1.62

॥ શઙ્કર ઉવાચ ॥
ભોગાનામર્જનં કાર્યં તતો રામ સ્વકર્મણા ॥
સ્થિરાણામસ્થિરાણાં ચ યથાવદ્ભૃગુનન્દન

આસનાદ્યાસ્તુ યે ભોગાઃ કાલેનાપ્યવિનાશિનઃ ॥
સ્થિરાસ્તે રામ નિર્દિષ્ટા પરિશિષ્ટાસ્તથા ચરાઃ

પુષ્પં પત્રં ફલં મૂલં તથા હરિતકં શુભમ્ ॥
ઉદકં ચાર્ચનીયં સ્યાત્તસ્મિન્નહનિ ભાર્ગવ્

ઉપાદાનાય નિષ્ક્રાન્તે કુટુમ્બિન્યથ સત્વરમ્ ॥
કુટુમ્બિની સુપ્રયાતા ધૌતોપસ્કરભાજના

સાધ્યાનાં રામ બીજાનાં પશોશ્ચ સુકૃતસ્ય ચ ॥
શાકાનાં વ્યઞ્જનાનાં ચ સ્વર્જિતાનાં ગતેઽહનિ

શક્તિં કુર્યાત્સદા તસ્ય વહ્નિનોપદમેન ચ ॥
દેશે શુચૌ સુપ્રયાતા સુસહાયગુણાન્વિતા

સર્વં પ્રક્ષાલિતં કાર્યં કેશકીટાદિવર્જિતમ્ ॥
ભૂમાવનુપલિપ્તાયાં સ્થાપ્યં રામ ન કિઞ્ચન

સર્વં સાધ્યમથાન્નાદ્યં ગન્ધવર્ણરસાન્વિતમ્ ॥
નિત્યં પરિપચેદ્રામ નાસ્વાદ્યં કેનચિત્ ક્વચિત્

ઉપાદાનમથાદાય પ્રવિશ્ય ચ ગૃહી ગૃહમ્ ॥
શુચૌ પ્રક્ષાલિતં સર્વં ચોપાદાનમુપન્યસેત્

સુપ્રક્ષાલ્ય તથા ભાગં પવિત્રેણ સમુત્ક્ષિપેત્ ॥
એવં કૃત્વા હ્યુપાદાનં સ્નાયાત્તુ વિધિના તતઃ

ધૌતવાસા સુપ્રયતઃ સ્વાચાન્તઃ સુસમાહિતઃ ॥
પ્રવિશ્ય દેવતાવેશ્મ પ્રાગ્વદ્ભૃગુકુલોદ્વહ

નમસ્કારાદિકં સર્વં પ્રયુઞ્જીત સમાહિતઃ ॥
ઉપાદાનાનુસંધાનં ત્વાદાનં ચાપ્યનન્તરમ્

ઇજ્યાકાલસ્ય ધર્મજ્ઞ કુર્યાત્પ્રયતમાનસઃ

આસન્નભોગઃ પ્રયનાન્તરાત્મા કુર્યાદથેજ્યાં રણચણ્ડવેગ ॥
ક્રોધં નિયમ્યાત્મહિતે નિવિષ્ટસ્તદ્ભાવભાવોપહિતશ્ચ નિત્યમ્

ઇતિ શ્રીવિષ્ણુધર્મોત્તરે પ્રથમખણ્ડે મા૦સં૦ શઙ્કરગીતાસૂપાદાનકરણો નામ દ્વિષષ્ટિતમોઽધ્યાય