Vishnudharmottara Purana · Chapter 1.61

rāma uvāca //
tasya māyāśarīrasya viṣṇoramitatejasaḥ //
prāpnuvanti kathaṃ sthānaṃ nityamakṣayyamavyayam

śaṅkara uvāca //
akhaṇḍakāriṇo rāma viṣṇoramitatejasaḥ //
prāpnuvanti paraṃ sthānaṃ nityamakṣayyamavyayam

rāma uvāca //
akhaṇḍakārī bhagavankathaṃ bhavati śaṅkara //
etanme saṃśayaṃ brūhi devadeva vṛṣadhvaja

śaṅkara uvāca //
pañcakālavidhānajñastatkarmakaraṇe rataḥ //
akhaṇḍakārī bhavati rāma dānavanāśana

rāma uvāca //
bhagavanpañca ke kālāḥ kathaṃ teṣāṃ tathā vidhiḥ //
etanme devadeveśa kautūhalamapānuda

śaṅkara uvāca //
rāmābhigamanaṃ pūrvamupādānamataḥ param //
ijyāsvādhyāyakālau ca yogakālastathaiva ca

teṣāṃ pratyekaśo vakṣye vidhiṃ te bhṛgunandana //
tannibodha mahābhāga prayatenāntarātmanā

rāma kalye samutthāya dantadhāvanapūrvakam //
snānaṃ kṛtvā yathāśāstraṃ svācāntaḥ susamāhitaḥ

yaśceha bhagavanmantraṃ paṭhandevagṛhaṃ viśet //
pravindyādrāma jānubhyāṃ pāṇibhyāṃ śirasā tathā

ॐkāraṃ sanamaskāraṃ prayujya susamāhitaḥ //
yogakālaṃ tu sandadhyādupādadhyādanantaram

rāmābhigamakālaṃ tu tatra mantraṃ tathārpayet//
bhagavato baleneti vīryeṇaitena tejasā

suprakīrtitatoyena vediṃ prakṣālayedbudhaḥ //
sauvarṇīṃ rājatīṃ tāmrīṃ mṛnmayīmāyasīṃ tathā

śilāṃ candanajāṃ vāpi devadārubhavāmathā/
śiṃśapākṣoṭasaralakadambārjunajāmathā/

sālvāśvakarṇajāṃ rāma tvāyāmena tathaiva ca //
vāmapravāṇāṃ prakṣālya pūrṇakumbhānnavāṃstataḥ

kalpanīyāstu kalaśāścatvāro bhṛgunandana//
sauvarṇā rājatāstāmrā athavāpi ha rītijāḥ

pādyamācamanīyaṃ ca tvarghyaṃ snānīyameva ca //
pādyātpādyaṃ tu dātavyaṃ snānīyātsnānameva ca

tathāpyācamanīyākhyāddeyamācamanaṃ bhavet //
dānaṃ praṇayanaṃ prītirvisargaṃ vistaraṃ tathā

tarpaṇaṃ cārhaṇaṃ caiva tvarghyādetāni kārayet //
dvādaśākṣarakaṃ mantraṃ tato japtvā samāhitaḥ

tataḥ pavitramantreṇa vedimabhyukṣayeddvija //
ātmānaṃ ca tathā bhogānkuryānmārgatrayaṃ tataḥ

vidyā jñānaṃ tataḥ karma brahmacakraṃ tathaiva ca //
mārgatrayañca kartavyaṃ nāmārghyakalaśānsadā

pāṇimārgaṃ kūrcamārgaṃ madhumārgaṃ tathaiva ca //
uśīramūlajaṃ kūrcaṃ jīva nnopālasambhavam

jīvaśca maraṇaṃ cāpi kartavyaṃ bhṛgunandana //
pratisnānaṃ tataḥ kāryaṃ samānānāṃ kramādbhavet

tathaiva pādapīṭhānāṃ prabhāvena mahābhujaḥ //
āsanānyatha kāryāṇi ratnacitrāṇi bhārgava

sauvarṇānyatha raupyāṇi tāmraśailamayāni ca //
tatastvāvāhanaṃ kāryaṃ tato'bhi gamanaṃ tataḥ

namaskārastataḥ kāryaḥ praṇītena tataḥ punaḥ //
brahmaśvakrāmanau mantraṃ prabhavenāpi yena ca

tato japtvā mahābhāga praṇavena nivedayet //
āsanairarcayeddevaṃ tataḥ prayatamānasaḥ // २६ ///
arghyābhiradbhiśca tato bhogaiḥ sarvairanantaram //
pādyapratigraheṇātha pādyābhiścāpyanantaram //

pādukābhistato rāma devadevaṃ samarcayet //
tatastvācamanīyārthaṃ devadevapratigraham

devamācamanīyañca pādapīṭhāṃstathaiva ca //
dantakāṣṭhaṃ tato dadyājjihvānirlekhanaṃ tataḥ

gaṇḍūṣaṇaṃ tato dadyānmukhaprakṣālanaṃ tathā //
bhūyastvācamanaṃ deyaṃ tarpaṇaṃ cāpyanntaram

puṣpaṃ dīpamalaṅkāraṃ dhūpaprakarameva ca /
nivedya vidhivatsarvaṃ tataḥ paścānnivedayet

sevyāni rāma bījāni tvarhaṇīyaṃ tataḥ punaḥ //
madhuparkaṃ tato dadyāddadhi sarpistathā madhu // ३२ ///
dadhyalābhe payaḥ kāryaṃ madhvalābhe tathā guḍam //
ghṛtapratinidhirnāsti tatra yatnātsamarcayet

ekāṃgo vā samasto vā madhuparko vidhīyate //
vyaṃgaṃ varjyaṃ prayatnena nityameva vijānatā

darpaṇaṃ tu tato dadyāttato nirbhartsanaṃ budhaḥ //
tatastvācamanīyaṃ ca vidhivatsusamāhitaḥ

hastaniṣpuṃsanārthāya tato dadyāttu gaṃdhakam //
tataḥ paśuṃ budhaḥ kuryyādyathāvanmādhupārkikam

mādhupārkikamaśvatthapatraṃ vā vinivedayet //
ghṛtāvadyaṃ tato dadyāttāmbūlañcāpyanantaram

mātrāñca dakṣiṇārthāya brāhmaṇāya nivedayet //
maṃgalāni yathāśaktyā tato deve nivedayet

tato'bhigamakālantu saṃdadyātpuruṣottame//
upādānamatho dadyātkuryāccaiva visarjanam

tato'gniśaraṇaṃ gatvā vahniṃ saṃtarpadedbudhaḥ //
brāhmaṇānāṃ yathāśakti dānaṃ dadyādanantaram

etanmayā te kathitaṃ samagraṃ yathānupūrvyābhigamasya kālam // gacchedupādānakṛtaprayatnastato yathāvadbhṛguvaṃśacandra

iti śrīviṣṇudharmottare prathamakhaṇḍe mārkaṇḍeyavajrasaṃvāde śaṅkaragītāsvabhigamakālo nāmaikaṣaṣṭitamo'dhyāyaḥ