Vishnudharmottara Purana · Chapter 1.60

// rāma uvāca //
upavāsāsamarthānāṃ kiṃ syādekamupoṣitam //
mahāphalaṃ mahādeva tatsamācakṣva pṛcchataḥ

// śaṅkara uvāca //
yā rāma śravaṇopetā dvādaśī mahatī ca sā //
tasyāmupoṣitaḥ snātaḥ pūjayitvā janārdanam

prāpnotyayatnāddharmajña dvādaśadvādaśīphalam //
dadhyodanayutaṃ tasyāṃ jalapūrṇaṃ ghaṭaṃ dvije

vastrasaṃveṣṭitaṃ dattvā chatropānahameva ca //
na durgatimavāpnoti gatimanyāñca vindati

akṣayyaṃ sthānamāpnoti nā'tra kāryā vicāraṇā //
śravaṇadvādaśīyoge budhavāro bhavedyadi

atyantaṃ mahatī nāma dvādaśī sā prakīrtitā //
snānaṃ japyaṃ tathā dānaṃ homaṃ śrāddhaṃ surārcanam

sarvamakṣayyamāpnoti tasya bhṛgukulodvaha //
tasmindine tathā snāto yatra kvacana saṃgame

sa kratusnānajaṃ puṇyaṃ phalamāpnotyasaṃśayam //
śravaṇe saṃgamāḥ sarve phalapuṣṭipradāḥ sadā

viśeṣāddvādaśīyukte budhayukte viśeṣataḥ //
yathaiva dvādaśī proktā budhaśravaṇasaṃyutā

tṛtīyā ca tathā jñeyā sarvakāmasamanvitā //
yathā tṛtīyā dharmajña tathā pañcadaśī śubhā

tryahaḥspṛśe'pi divase copavāse mahāphalaḥ //
keśavābhyarcane rāma dānajapyādikeṣu ca

rāma uvāca //
tryahaḥspṛgdivasaḥ kīdṛkkadā bhavati vā prabho //
tasya me saṃśayaṃ brūhi devadeva vṛṣadhvaja

śaṃkara uvāca //
divā vinirgatā yatra vyatītā syāttithirdvija //
rātri śeṣe tathāveśya bhaviṣyā spṛśatī tithiḥ

tithitritayasaṃsparśādahorātre bhṛgūttama //
tryahaspṛksa vinirdiṣṭaḥ puṇyaḥ paramapāvana

tatropoṣya śiraḥsnātaiḥ karttavyaṃ devatārcanam //
japaṃ homaṃ tathā dānaṃ kāmayadbhirmahatphalam

karmaṇāṃ pariśeṣāṇāmakarmmaṇyaṃ hi taddinam //
bhojyaṃ trimadhuraṃ rāma brāhmaṇām̐statra bhojayet

mahatpūrṇā bhavatyekā paurṇamāsī dvijottama //
pratisaṃvatsaraṃ tasyāṃ sopavāso janārdanam /

yaḥ pūjayati dharmajña tena saṃvatsaraṃ hari //
pūjitaḥ paurṇamāsīṣu bhavatīti ha niścayaḥ

tasyāṃ dānaṃ svalpamapi mahadbhavati bhārgava //
dānaṃ japyaṃ tato homo yaścānyatsukṛtaṃ bhavet

rāma uvāca //
saṃvatsare paurṇamāsī mahatpūrvā vṛṣadhvaja //
kathaṃ jñeyā jagannātha tanmamācakṣva pṛcchataḥ

śaṃkara uvāca //
yasyāṃ pūrṇeṃdunā yogaṃ yāyājjīvo mahābalaḥ //
paurṇamāsī tu sā jñeyā mahatpūrvā dvijottama

ādityagrahaṇe rāma grahaṇe vā niśābhṛtaḥ //
upavāsādavāpnoti sarvakilviṣanāśanam

snānaṃ dānaṃ tathā japyaṃ cā kṣayyaṃ parikīrttitam //
śrāddhañca bhārgavaśreṣṭha vahnisaṃpūjanaṃ tathā

rāma uvāca //
nakṣatraṃ devadeveśa tithiñcātra vinirgatām //
dṛṣṭvā yathāvatkartavyaṃ tithiṃ śaṅkara jānatā

śaṅkara uvāca //
sā tithistadahorātraṃ yasyāmevodito raviḥ //
tayā karmāṇi kurvīta hrāsavṛddhirna kāraṇam

śuklapakṣe tithirjñeyā yasyāmabhyudito raviḥ //
upoṣitavyaṃ nakṣatraṃ yenāstaṃ yāti bhāskaraḥ

yaśca vā yujyate rāma niśīthe śaśinā saha

iti śrīviṣṇudharmottare prathamakhaṇḍemārkaṇḍeyavajrasaṃvāde śaṅkaragītāsūpavāsavidhirnnāma ṣaṣṭitamo'dhyāyaḥ