વિષ્ણુધર્મોત્તરપુરાણમ્ · અધ્યાય 1.60

॥ રામ ઉવાચ ॥
ઉપવાસાસમર્થાનાં કિં સ્યાદેકમુપોષિતમ્ ॥
મહાફલં મહાદેવ તત્સમાચક્ષ્વ પૃચ્છતઃ

॥ શઙ્કર ઉવાચ ॥
યા રામ શ્રવણોપેતા દ્વાદશી મહતી ચ સા ॥
તસ્યામુપોષિતઃ સ્નાતઃ પૂજયિત્વા જનાર્દનમ્

પ્રાપ્નોત્યયત્નાદ્ધર્મજ્ઞ દ્વાદશદ્વાદશીફલમ્ ॥
દધ્યોદનયુતં તસ્યાં જલપૂર્ણં ઘટં દ્વિજે

વસ્ત્રસંવેષ્ટિતં દત્ત્વા છત્રોપાનહમેવ ચ ॥
ન દુર્ગતિમવાપ્નોતિ ગતિમન્યાઞ્ચ વિન્દતિ

અક્ષય્યં સ્થાનમાપ્નોતિ નાઽત્ર કાર્યા વિચારણા ॥
શ્રવણદ્વાદશીયોગે બુધવારો ભવેદ્યદિ

અત્યન્તં મહતી નામ દ્વાદશી સા પ્રકીર્તિતા ॥
સ્નાનં જપ્યં તથા દાનં હોમં શ્રાદ્ધં સુરાર્ચનમ્

સર્વમક્ષય્યમાપ્નોતિ તસ્ય ભૃગુકુલોદ્વહ ॥
તસ્મિન્દિને તથા સ્નાતો યત્ર ક્વચન સંગમે

સ ક્રતુસ્નાનજં પુણ્યં ફલમાપ્નોત્યસંશયમ્ ॥
શ્રવણે સંગમાઃ સર્વે ફલપુષ્ટિપ્રદાઃ સદા

વિશેષાદ્દ્વાદશીયુક્તે બુધયુક્તે વિશેષતઃ ॥
યથૈવ દ્વાદશી પ્રોક્તા બુધશ્રવણસંયુતા

તૃતીયા ચ તથા જ્ઞેયા સર્વકામસમન્વિતા ॥
યથા તૃતીયા ધર્મજ્ઞ તથા પઞ્ચદશી શુભા

ત્ર્યહઃસ્પૃશેઽપિ દિવસે ચોપવાસે મહાફલઃ ॥
કેશવાભ્યર્ચને રામ દાનજપ્યાદિકેષુ ચ

રામ ઉવાચ ॥
ત્ર્યહઃસ્પૃગ્દિવસઃ કીદૃક્કદા ભવતિ વા પ્રભો ॥
તસ્ય મે સંશયં બ્રૂહિ દેવદેવ વૃષધ્વજ

શંકર ઉવાચ ॥
દિવા વિનિર્ગતા યત્ર વ્યતીતા સ્યાત્તિથિર્દ્વિજ ॥
રાત્રિ શેષે તથાવેશ્ય ભવિષ્યા સ્પૃશતી તિથિઃ

તિથિત્રિતયસંસ્પર્શાદહોરાત્રે ભૃગૂત્તમ ॥
ત્ર્યહસ્પૃક્સ વિનિર્દિષ્ટઃ પુણ્યઃ પરમપાવન

તત્રોપોષ્ય શિરઃસ્નાતૈઃ કર્ત્તવ્યં દેવતાર્ચનમ્ ॥
જપં હોમં તથા દાનં કામયદ્ભિર્મહત્ફલમ્

કર્મણાં પરિશેષાણામકર્મ્મણ્યં હિ તદ્દિનમ્ ॥
ભોજ્યં ત્રિમધુરં રામ બ્રાહ્મણાઁસ્તત્ર ભોજયેત્

મહત્પૂર્ણા ભવત્યેકા પૌર્ણમાસી દ્વિજોત્તમ ॥
પ્રતિસંવત્સરં તસ્યાં સોપવાસો જનાર્દનમ્ ।

યઃ પૂજયતિ ધર્મજ્ઞ તેન સંવત્સરં હરિ ॥
પૂજિતઃ પૌર્ણમાસીષુ ભવતીતિ હ નિશ્ચયઃ

તસ્યાં દાનં સ્વલ્પમપિ મહદ્ભવતિ ભાર્ગવ ॥
દાનં જપ્યં તતો હોમો યશ્ચાન્યત્સુકૃતં ભવેત્

રામ ઉવાચ ॥
સંવત્સરે પૌર્ણમાસી મહત્પૂર્વા વૃષધ્વજ ॥
કથં જ્ઞેયા જગન્નાથ તન્મમાચક્ષ્વ પૃચ્છતઃ

શંકર ઉવાચ ॥
યસ્યાં પૂર્ણેંદુના યોગં યાયાજ્જીવો મહાબલઃ ॥
પૌર્ણમાસી તુ સા જ્ઞેયા મહત્પૂર્વા દ્વિજોત્તમ

આદિત્યગ્રહણે રામ ગ્રહણે વા નિશાભૃતઃ ॥
ઉપવાસાદવાપ્નોતિ સર્વકિલ્વિષનાશનમ્

સ્નાનં દાનં તથા જપ્યં ચા ક્ષય્યં પરિકીર્ત્તિતમ્ ॥
શ્રાદ્ધઞ્ચ ભાર્ગવશ્રેષ્ઠ વહ્નિસંપૂજનં તથા

રામ ઉવાચ ॥
નક્ષત્રં દેવદેવેશ તિથિઞ્ચાત્ર વિનિર્ગતામ્ ॥
દૃષ્ટ્વા યથાવત્કર્તવ્યં તિથિં શઙ્કર જાનતા

શઙ્કર ઉવાચ ॥
સા તિથિસ્તદહોરાત્રં યસ્યામેવોદિતો રવિઃ ॥
તયા કર્માણિ કુર્વીત હ્રાસવૃદ્ધિર્ન કારણમ્

શુક્લપક્ષે તિથિર્જ્ઞેયા યસ્યામભ્યુદિતો રવિઃ ॥
ઉપોષિતવ્યં નક્ષત્રં યેનાસ્તં યાતિ ભાસ્કરઃ

યશ્ચ વા યુજ્યતે રામ નિશીથે શશિના સહ

ઇતિ શ્રીવિષ્ણુધર્મોત્તરે પ્રથમખણ્ડેમાર્કણ્ડેયવજ્રસંવાદે શઙ્કરગીતાસૂપવાસવિધિર્ન્નામ ષષ્ટિતમોઽધ્યાયઃ