Vishnudharmottara Purana · Chapter 1.59

śrīrāma uvāca//
upoṣitena yeneha yaṃyaṃ kāmaṃ prayacchati //
tadahaṃ śrotumicchāmi gadataste vṛṣadhvaja

śaṃkara uvāca//
pūjitaḥ prayataiḥ snānaiḥ sopavāsairdine raveḥ//
saṃvatsaraṃ mahābhāga dīrghamāyuḥ prayacchati

somavāre mahābhāga cārogyaṃ saṃprayacchati //
tathā bhaumadine rāma vaiśvaryaṃ saṃprayacchati

vāsare somaputrasya sarvānkāmānprayacchati //
abhīṣṭāñca tathā vidyāmākhaṇḍalagurordine

saubhāgyamatulaṃ loke bhārgavāhni prayacchati //
tathā śanaiścarasyāhni ripūnsarvānvyapohati

kṛttikāsu tathā'bhyarcya yajñānprāpnotyanuttamān //
prājāpatye tathā'bhyarcya prajāṃ prāpnoti śobhanām

vindate brahmavarcasyaṃ mṛgaśīrṣe'rcayanharim //
raudrakarmatvamāpnoti siddhiṃ raudre samarcayan

cyutaḥ sthānamavāpnoti pūjayānaḥ punarvasau //
puṣye saṃpūjito devaḥ puṣṭimagryāṃ prayacchati

aśleṣāyāṃ tathā'bhyarcya śriyaṃ vindati mānavaḥ //
pitṛprasādamāpnoti pitrye saṃpūjanharim

saubhāgyaṃ mahadāpnoti phālgunīṣvarcayaṃstathā //
tathaiva cottarāyoge gatiṃ vindati śobhanām

haste saṃpūjayandevaṃ gajānprāpnotyanuttamān //
citrāsu ca tathā'bhyarcya vastrāṇyāpnoti mānavaḥ

āpye samarcayandevaṃ ratnabhāgī bhavennaraḥ //
tathottarāsvāṣāḍhāsu kīrtiṃ prāpnoti śāśvatīm

sarvānkāmānavāpnoti śravaṇe'bhyarcayanharim //
dhaniṣṭhāsu tathā vittamārogyaṃ vāruṇe tathā

āje paśūnavāpnoti gāvaśca tadanantaram //
pauṣṇe śīlamavāpnoti cāśvānprāpnoti cā'śvine

dīrghajīvitamāpnoti bharaṇīṣu mahābhuja //
pratipadyarthamāpnoti kupyaṃ prāpnotyanuttamama

sarvānkāmānavāpnoni tṛtīyāyāṃ samarcayan //
paśūm̐ścaturthyāmāpnoti pañcamyāṃ śriyamuttamām

ṣaṣṭhayāṃ prāpnotyathā''rogyaṃ saptamyāṃ suhṛdastathā //
aṣṭamyāṃ ca tathā bhṛtyānnavamyāṃ ca tathā yaśaḥ

karmasiddhimavāpnoti daśamyāṃ pūjayanharim //
ekādaśyāṃ pūjayānaḥ śrībhāgī sa sadā bhaveta

abhīṣṭāṃ gatimāpnoti dvādaśyāṃ pūjayanharim //
trayodaśyāṃ pūjayāno rūpaṃ prāpnotyanuttamam

na durgatimavāpnoti pūjayānaścaturdaśīma //
sarvānkāmānavāpnoti pañcadaśyāṃ mahāmune

ityetaduktaṃ tava mānavānāṃ kāmyaṃ phalaṃ samyagupoṣitānām //
deveśvaraṃ pūjayatāṃ yathāvatparaṃ purāṇaṃ puruṣaṃ vareṇyam

iti śrīviṣṇudharmottare prathamakhaṇḍe mārkaṇḍeyavajrasaṃvāde śrīśaṃkaragītāsūpavāsaphalo nāmaikonaṣaṣṭitamo'dhyāyaḥ