Vishnudharmottara Purana · Chapter 1.58

// śaṅkara uvāca //
ahiṃsā satyavacanaṃ dayā bhūteṣvanugraham //
yasyaitāni sadā rāma tasya tuṣyati keśavaḥ

mātāpitṛgurūṇāñca yaḥ samyagiha varttate //
varjako madhumāṃsasya tasya tuṣyati keśavaḥ

varāhamatsyamāṃsāni yo nātti bhṛgunandana //
virato madyapānācca tasya tuṣyati keśavaḥ

na dhārayati nirmālyamanyadevoddhṛtaṃ tu yaḥ //
bhuṃkte na cānyanaivedyaṃ tasya tuṣyati keśavaḥ

avaiṣṇave devadhṛtaṃ nirmālyaṃ yaḥ prayacchati //
naivedyaṃ vā mahābhāga tasya tuṣyati keśavaḥ

bibharti mūrdhni nirmālyaṃ keśavārcādhṛtaṃ tu yaḥ//
anivedya na cāśnāti tasya tuṣyati keśavaḥ

parapīḍākaraṃ karma yasya nā'sti mahātmanaḥ//
saṃvibhāgī ca bhūtānāṃ tasya tuṣyati keśavaḥ

śṛṇute sarvadharmāṃśca sarvāndevānnamasyati //
anasūyurjitakrodhastasya tuṣyati keśavaḥ

tīrthopavāsasevī ca dvijātigaṇasevakaḥ //
pūjako viṣṇubhaktānāṃ tasya tuṣyati keśavaḥ

pañcarātravido mukhyānyastu saṃpūjayetsadā //
devavadbhṛguśārdūla tasya tuṣyati keśavaḥ

pitṛdevārcanarataḥ svadāranirataḥ sadā //
ṛtukālābhigāmī ca tasya tuṣyati keśavaḥ

nāmnāṃ sahasreṇa tathā yaśca gāyati tanmanāḥ //
satataṃ kalyamutthāya tasya tuṣyati keśavaḥ

pauruṣeṇa ca sūktena japyahomādikaṃ sadā//
yaḥ karotyamitaprajñastasya tuṣyati keśavaḥ

mitrasvāmigurudroho yasya nā'sti mahātmanaḥ //
paradāradhanecchā na tasya tuṣyati keśavaḥ

rājā śāstropadeśena rājyaṃ yaśca praśāsati //
rājadharmaratirnityaṃ tasya tuṣyati keśavaḥ

yā tu nārī patiprāṇā patibhaktā pativratā //
tasyāḥ sutoṣo bhagavām̐stoṣamāyāti keśavaḥ

agnihotraparo vidvānyajñairnityamatandritaḥ //
yastu tarpayate devāṃstasya tuṣyati keśavaḥ

svavarṇāśramadharmasthaḥ pūjayanmadhusūdanam //
kālaṃ nayati yo brahmam̐stasya tuṣyati keśavaḥ

sopavāsastu pakṣānte dvādaśyāṃ vā bhṛgūttama //
baudhe'hni śravaṇarkṣe vā tṛtīyāyāntu vā punaḥ //
sopavāso'rcayati yastasya tuṣyati keśavaḥ

puṣpaṃ vinā hariṃ prāpya phalī ratnaṃ kṣumāpi vā //
nivedayati yaḥ kṛṣṇe tasya tuṣyati keśavaḥ

kṛṣṇe paśyati yatsarvaṃ kṛṣṇaṃ sarvatra paśyati //
mahātmā buddhisampannastasya tuṣyati keśavaḥ

tatkathāyāñca ramate tatkathāṃ yaḥ karoti ca //
tanmanāstadgataprāṇastasya tuṣyati keśavaḥ

sarvabhūtahite yuktaḥ sarvabhūtahite rataḥ //
sarvabhūtānukampī ca tasya tuṣyati keśavaḥ

apraṇamya kriyāṃ kāṃcidyastu nā''rabhate harim //
asaṃbhinnārthamaryādastasya tuṣyati keśavaḥ

nāmasaṃkīrtanaṃ nityaṃ kṣuta praskhalanādiṣu //
yaḥ karoti mahābhāgastasya tuṣyati keśavaḥ

navaṃ patraṃ phalaṃ puṣpaṃ nivedya madhusūdane //
paścādbhuṅkte svayaṃ yaśca tasya tuṣyati keśavaḥ // २६
āpadyapi ca kaṣṭāyāṃ deveśaśapathaṃ naraḥ //
na karoti hi yo brahmaṃstasya tuṣyati keśavaḥ

devāduddhṛtya nirmālyaṃ chāyāṃ nākramate ca yaḥ //
dhūpāgnibhasma ca tathā tasya tuṣyati keśavaḥ

dṛṣṭvā saṃpūjitāmarcā yaśca bhaktyābhinandati //
svayaṃ saṃpūjayedyastu tasya tuṣyati keśavaḥ

nityaṃ saṃpūjayedyastu devadevasya bhaktitaḥ //
yathāśaktyā mahābhāga tasya tuṣyati keśavaḥ

na rāma vividhairdānairna ratnadhanasaṃcayaiḥ //
toṣamāyāti deveśo bhaktyā tuṣyati keśavaḥ

dānairbhṛguśreṣṭha bahuprakāraistīrthopavāsavratadarśanaiśca //
tathā na toṣaṃ bhagavānprayāti bhaktyā yathā tadgatamānasānām

etāvaduktaṃ tava rāma guhyaṃ na deyametadbhuvi matsarāṇām //
na tarkaśāstrākulamānasānāṃ nā'vaiṣṇavānāṃ na ca nāstikānām

iti śrīviṣṇudharmottare prathamakhaṇḍe mārkaṇḍeyavajrasaṃvāde bhaktilakṣaṇo nāmāṣṭapañcāśattamo'dhyāyaḥ