Vishnudharmottara Purana · Chapter 1.57

// rāma uvāca // //
ārādhyate sa bhagavānkarmaṇā yena śaṅkara //
tatsamācakṣva bhagavansarvasattvasukhapradam

// śaṅkara uvāca //
sādhu rāma mahābhāga sādhu dānavanāśana //
yanmāṃ pṛcchasi dharmajña keśavārādhanaṃ prati

divasaṃ divasārdhaṃ vā muhūrttamekameva vā //
nāśaścā'śeṣapāpasya bhaktirbhavati keśave

anekajanmasāhasrairnānāyonyantareṣu ca //
jantoḥ kalmaṣahīnasya bhaktirbhavati keśave //

nā'dhanyaḥ keśavaṃ stauti nā'dhanyorcayati prabhum //
namatyadhanyaśca hariṃ nā'dhanyo vetti mādhavam

manaśca taddhi dharmajña keśave yatpravartate //
sā buddhistadvratāyaiva satataṃ pratitiṣṭhati

sā vāṇī keśavaṃ devaṃ yā stauti bhṛgunandana //
śravaṇau tau śrutā yābhyāṃ satataṃ tatkathāḥ śubhāḥ

avehi dharmajña tathā tatpūjākaraṇātkarau //
tadekaṃ saphalaṃ karma keśavārthāya yatkṛtam

yato mukhyaphalāvāptau karaṇaṃ saprayojanam //
manasā tena kiṃ kāryyaṃ yanna tiṣṭhati keśave

buddhyā vā bhārgavaśreṣṭha tayā nāsti prayojanam //
rogaḥ sā rasanā vā'pi yayā na stūyate hariḥ

gartau brahmavratau karṇau yābhyāṃ tatkarma na śrutam //
bhārabhūtaiḥ karaiḥ kāryaṃ ki tasya nṛpaśordvija

yairna saṃpūjito devaḥ śaṅkhacakragadādharaḥ //
pādau tau saphalau rāma keśavālayagāminau

te ca netre mahābhāga yābhyāṃ saṃdṛśyate hariḥ //
kiṃ tasya caraṇaiḥ kāryaṃ kṛtasya nipuṇairdvija

yābhyāṃ na vrajate jantuḥ keśavālayadarśane //
jātyandhatulyaṃ taṃ manye puruṣaṃ puruṣottama

yo na paśyati dharmajña keśavārcāṃ punaḥpunaḥ //
kleśasaṃjananaṃ karma vṛthā tadbhṛgunandana

keśavaṃ prati yadrāma kriyate'hani sarvadā //
paśya keśavamārādhya modamānaṃ śacīpatim

yamañca varuṇañcaiva tathā vaiśravaṇaṃ prabhum //
devendratvamatisphītaṃ sarvabhūtismitaṃ padam // १७ '/
haribhaktidrumātpuṣpaṃ rājasātsāttvikaṃ phalam //
aṇimā mahimā prāptiḥ prākāmyaṃ laghimā tathā

īthitvañca vaśitvañca yatra kāmāvasāyitā //
ārādhya keśavaṃ devaṃ prāpyante nā'tra saṃśayaḥ

hatapratyaṅgamātaṅgo rudhirāruṇabhūtale //
saṃgrāme vijayaṃ rāma prāpyate tatprasādataḥ //

mahākaṭitaṭaśroṇyaḥ pīnonnatapayodharāḥ //
akalaṅkaśaśāṅkābhavadanā nīlamūrdhajāḥ

ramayanti naraṃ svapne devarāmā manoharāḥ //
sakṛdyenārcito devo helayā vā namaskṛtaḥ

vedavedāṅgavapuṣāṃ munīnāṃ bhāvitātmanām //
ṛṣitvamapi dharmajña vijñeyaṃ tatprasādajam

ramante saha rāmābhiḥ prāpya vaidyādharaṃ padam //
anyabhāvatayā nāmnaḥ kīrtanādapi bhārgava

ratnaparyaṅkaśayitā mahābhogāśca bhoginaḥ //
vījyante saha rāmābhiḥ keśavasmaraṇādapi

saugandhike vane ramye kailāsaparvate dvija //
yadyakṣā viharanti sma tatprāhuḥ kusumaṃ nateḥ

ratnacitrāsu ramyāsu nandanodyānabhūmiṣu //
krīḍanti ca saha strībhirgandharvībhiḥ kathāśruteḥ

catussamudravelāyāṃ meruvindhyapayodharām //
dharāṃ ye bhuñjate bhūpāḥ praṇipātasya tatphalam

tasmāttavā'haṃ vakṣyāmi yadyadācarataḥ sadā //
puruṣasyeha bhagavānsutoṣastuṣyate hariḥ

pūjyaḥ sa nityaṃ varado mahātmā stavyaḥ sa nityaṃ jagadekavandyaḥ //
dhyeyaḥ sa nityaṃ sakalāghahartā caitāvaduktaṃ tava rāma guhyam

iti śrīviṣṇudharmottare prathamakhaṇḍe mārkaṇḍeyavajrasaṃvāde śaṅkara gītāsu bhaktiphalapradarśanaṃ nāma saptapañcāśattamo'dhyāyaḥ