Vishnudharmottara Purana · Chapter 1.56

rāma uvāca //
tasya devātidevasya viṣṇoramitatejasaḥ //
tvatto'haṃ śrotumicchāmi divyā ātmavibhūtayaḥ

śaṅkara uvāca //
na śakyā vistarādvaktuṃ devadevasya bhūtayaḥ //
prādhānyataste vakṣyāmi śṛṇuṣvaikamanā dvija

sarge brahmā sthitau viṣṇuḥ saṃhāre ca tathā haraḥ //
varuṇo vāyurākāśo jyotiśca pṛthivī tathā

diśaśca vidiśaścā'pi tathā ye ca digīśvarāḥ //
ādityā vasavo rudrā bhṛgavoṃ'girasastathā

sādhyāśca maruto devā viśvedevāstathaiva ca //
aśvinau puruhūtaśca gandharvāpsarasāṃ gaṇāḥ

parvatodadhipātālā lokā dvīpāśca bhārgava //
tiryagūrdhvamadhaścaiva tviṅgitaṃ yaśca neṅgate

saccā'sacca mahābhāga prakṛtirvikṛtiśca yaḥ //
kṛmikīṭapataṅgānāṃ vayasāṃ yonayastathā

vidyādharāstathā yakṣā nāgāḥ sarpāḥ sakinnarāḥ //
rākṣasāśca piśācāśca pitaraḥ kālasaṃdhayaḥ / /८ //
dharmārthakāmamokṣāśca dharmadvārāṇi yāni ca //
yajñāṅgāni ca sarvāṇi bhūtagrāmaṃ caturvidham

jarāyujāṇḍajāścaiva saṃsvedajamathodbhijam //
ekajyotiḥ sa marutāṃ vasūnāṃ sa ca pāvakaḥ//1.56.१ ०//
ahirbudhnyaśca rudrāṇāṃ nādaivāśvinayostathā //
nārāyaṇaśca sādhyānāṃ bhṛgūṇāñca tathā kratuḥ

ādityānāṃ tathā viṣṇurāyuraṅgirasāṃ tathā //
viśveṣāñcaiva devānāṃ rocamānaḥ sa kīrtitaḥ

vāsavaḥ sarvadevānāṃ jyotiṣāṃ ca hutāśanaḥ //
yamaḥ saṃyamaśīlānāṃ virūpākṣaḥ kṣamābhṛtām

yādasāṃ varuṇaścaiva pavanaḥ plavatāṃ tathā //
dhanādhyakṣaśca yakṣāṇāṃ rudro raudrastathāntaraḥ

anantaḥ sarvanāgānāṃ sūryastejasvināṃ tathā //
grahāṇāñca tathā candro nakṣatrāṇāñca kṛttikā

kālaḥ kalayatāṃ śreṣṭho yugānāṃ ca kṛtaṃ yugam //
kalpaṃ manvantareśāśca manavaśca caturdaśa

sa eva devaḥ sarvātmā ye ca deveśvarāstathā //
saṃvatsarastu varṣāṇāṃ cāyanānāṃ tathottaraḥ

mārgaśīrṣastu māsānāṃ ṛtūnāṃ kusumākaraḥ //
śuklapakṣastu pakṣāṇāṃ tithīnāṃ pūrṇimā tithiḥ /

kāraṇānāṃ vadhaḥ prokto muhūrttānāṃ tathā'bhijit //
pātālānāṃ sutalaśca samudrāṇāṃ payodadhiḥ

jambūdvīpaśca dvīpānāṃ lokānāṃ satya ucyate //
meruḥ śiloccayānāṃ ca varṣeṣvapi ca bhāratam

/
himālayaḥ sthāvarāṇāṃ jāhnavī saritāṃ tathā //
puṣkaraḥ sarvatīrthānāṃ garuḍaḥ pakṣiṇāṃ tathā

gandharvāṇāṃ citrarathaḥ siddhānāṃ kapilo muniḥ//
ṛṣīṇāñca bhṛgurdevo devarṣīṇāṃ ca nāradaḥ

tathā brahmaṛṣīṇāñca aṃgirāḥ parikīrtitaḥ //
vidyādharāṇāṃ sarveṣāṃ devaścitrāṃgadastathā

kaṃbaraḥ kinnarāṇāṃ ca sarpāṇāmatha vāsukiḥ //
prahrādaḥ sarvadaityānāṃ rambhā cāpsarasāṃ tathā

uccaiḥśravasamaśvānāṃ dhenūnāṃ caiva kāmadhuk //
airāvato gajendrāṇāṃ mṛgāṇāṃ ca mṛgādhipaḥ

āyudhānāṃ tathā vajro narāṇāñca narādhipaḥ //
kṣamā kṣamāvatāṃ devo buddhirbuddhimatāmapi

dharmāviruddhaḥ kāmaśca tathā dharmabhṛtāṃ nṛṇām //
dharmmo dharmabhṛtāṃ devastapaścaiva tapasvinām

yajñānāṃ japayajñaśca satyaḥ satyavatāṃ tathā //
vedānāṃ sāmā vedaśca aṃśūnāṃ jyotiṣāṃ patiḥ

gāyatrī sarvamaṃtrāṇāṃ vācaḥ pravadatāṃ tathā //
akṣarāṇāmakāraśca yantrāṇāñca tathā dhanuḥ

adhyātmavidyā vidyānāṃ kavīnāmuśanā kaviḥ //
cetanā sarvabhūtānāmindriyāṇāṃ manastathā

brahmā brahmavidāṃ devo jñānaṃ jñānavatāṃ tathā //
kīrtiḥ śrīrvāk ca nārīṇāṃ smṛtirmedhā tathā kṣamā

āśramāṇāṃ caturthaśca varṇānāṃ brāhmaṇastathā //
skandaḥ senāpraṇetṝṇāṃ sadayaśca dayā vatām

jayaśca vyavasāyaśca tathotsāhavatāṃ prabhuḥ //
aśvatthaḥ sarvavṛkṣāṇāmoṣadhīnāṃ tathā yavaḥ

mṛtyuḥ sa eva mriyatāmudbhavaśca bhaviṣyatām //
jhaṣāṇāṃ makaraścaiva dyūtaṃ chalayatāṃ tathā

mānaśca sarvaguhyānāṃ ratnānāṃ kanakaṃ tathā //
dhṛtirbhūmau rasastejastejaścaiva hutāśane

vāyuḥ sparśaguṇānāṃ ca khañca śabdaguṇastathā //
evaṃ vibhūtibhiḥ sarvaṃ vyāpya tiṣṭhati bhārgava

ekāṃśena bhṛguśreṣṭha tasyāṃśatritayaṃ divi //
devāśca ṛṣayaścaiva brahmā cā'haṃ ca bhārgava

cakṣuṣā yanna paśyaṃti vinā jñānagatiṃ dvija //
jñātā jñeyastathā dhyātā dhyeyaścokto janārdanaḥ

yajño yaṣṭā ca govindaḥ kṣetraṃ kṣetrajña eva ca //
annamannāda evoktaḥ sa eva ca guṇatrayam

gāmāviśya ca bhūtāni dhārayatyojasā vibhuḥ //
puṣṇāti cauṣadhīḥ sarvā somo bhūtvā rasātmakaḥ

prāṇināṃ jaṭharastho'gnirbhuktapācī sa bhārgava //
ceṣṭākṛtprāṇināṃ brahmansa ca vāyuḥ śarīragaḥ

yathādityagataṃ tejo jagadbhāsayate'khilam //
yaccandramasi yaccā'gnau tattejastatra kīrtitam

sarvasya cā'sau hṛdi sanniviṣṭastasmātsmṛtirjñānamapohanañca //
sarvaiśca devaiśca sa eva vandyo vedāntakṛdvedakṛdeva cā'sau

iti śrīvipṇudharmo'ttare prathamakhaṇḍe mārkaṇḍeyavajrasaṃvāde śaṅkaragītāsu vibhūtivarṇanaṃ nāma ṣaṭpañcāśattamo 'dhyāyaḥ