વિષ્ણુધર્મોત્તરપુરાણમ્ · અધ્યાય 1.57

॥ રામ ઉવાચ ॥ ॥
આરાધ્યતે સ ભગવાન્કર્મણા યેન શઙ્કર ॥
તત્સમાચક્ષ્વ ભગવન્સર્વસત્ત્વસુખપ્રદમ્

॥ શઙ્કર ઉવાચ ॥
સાધુ રામ મહાભાગ સાધુ દાનવનાશન ॥
યન્માં પૃચ્છસિ ધર્મજ્ઞ કેશવારાધનં પ્રતિ

દિવસં દિવસાર્ધં વા મુહૂર્ત્તમેકમેવ વા ॥
નાશશ્ચાઽશેષપાપસ્ય ભક્તિર્ભવતિ કેશવે

અનેકજન્મસાહસ્રૈર્નાનાયોન્યન્તરેષુ ચ ॥
જન્તોઃ કલ્મષહીનસ્ય ભક્તિર્ભવતિ કેશવે ॥

નાઽધન્યઃ કેશવં સ્તૌતિ નાઽધન્યોર્ચયતિ પ્રભુમ્ ॥
નમત્યધન્યશ્ચ હરિં નાઽધન્યો વેત્તિ માધવમ્

મનશ્ચ તદ્ધિ ધર્મજ્ઞ કેશવે યત્પ્રવર્તતે ॥
સા બુદ્ધિસ્તદ્વ્રતાયૈવ સતતં પ્રતિતિષ્ઠતિ

સા વાણી કેશવં દેવં યા સ્તૌતિ ભૃગુનન્દન ॥
શ્રવણૌ તૌ શ્રુતા યાભ્યાં સતતં તત્કથાઃ શુભાઃ

અવેહિ ધર્મજ્ઞ તથા તત્પૂજાકરણાત્કરૌ ॥
તદેકં સફલં કર્મ કેશવાર્થાય યત્કૃતમ્

યતો મુખ્યફલાવાપ્તૌ કરણં સપ્રયોજનમ્ ॥
મનસા તેન કિં કાર્ય્યં યન્ન તિષ્ઠતિ કેશવે

બુદ્ધ્યા વા ભાર્ગવશ્રેષ્ઠ તયા નાસ્તિ પ્રયોજનમ્ ॥
રોગઃ સા રસના વાઽપિ યયા ન સ્તૂયતે હરિઃ

ગર્તૌ બ્રહ્મવ્રતૌ કર્ણૌ યાભ્યાં તત્કર્મ ન શ્રુતમ્ ॥
ભારભૂતૈઃ કરૈઃ કાર્યં કિ તસ્ય નૃપશોર્દ્વિજ

યૈર્ન સંપૂજિતો દેવઃ શઙ્ખચક્રગદાધરઃ ॥
પાદૌ તૌ સફલૌ રામ કેશવાલયગામિનૌ

તે ચ નેત્રે મહાભાગ યાભ્યાં સંદૃશ્યતે હરિઃ ॥
કિં તસ્ય ચરણૈઃ કાર્યં કૃતસ્ય નિપુણૈર્દ્વિજ

યાભ્યાં ન વ્રજતે જન્તુઃ કેશવાલયદર્શને ॥
જાત્યન્ધતુલ્યં તં મન્યે પુરુષં પુરુષોત્તમ

યો ન પશ્યતિ ધર્મજ્ઞ કેશવાર્ચાં પુનઃપુનઃ ॥
ક્લેશસંજનનં કર્મ વૃથા તદ્ભૃગુનન્દન

કેશવં પ્રતિ યદ્રામ ક્રિયતેઽહનિ સર્વદા ॥
પશ્ય કેશવમારાધ્ય મોદમાનં શચીપતિમ્

યમઞ્ચ વરુણઞ્ચૈવ તથા વૈશ્રવણં પ્રભુમ્ ॥
દેવેન્દ્રત્વમતિસ્ફીતં સર્વભૂતિસ્મિતં પદમ્ ॥ ૧૭ ઽ।
હરિભક્તિદ્રુમાત્પુષ્પં રાજસાત્સાત્ત્વિકં ફલમ્ ॥
અણિમા મહિમા પ્રાપ્તિઃ પ્રાકામ્યં લઘિમા તથા

ઈથિત્વઞ્ચ વશિત્વઞ્ચ યત્ર કામાવસાયિતા ॥
આરાધ્ય કેશવં દેવં પ્રાપ્યન્તે નાઽત્ર સંશયઃ

હતપ્રત્યઙ્ગમાતઙ્ગો રુધિરારુણભૂતલે ॥
સંગ્રામે વિજયં રામ પ્રાપ્યતે તત્પ્રસાદતઃ ॥

મહાકટિતટશ્રોણ્યઃ પીનોન્નતપયોધરાઃ ॥
અકલઙ્કશશાઙ્કાભવદના નીલમૂર્ધજાઃ

રમયન્તિ નરં સ્વપ્ને દેવરામા મનોહરાઃ ॥
સકૃદ્યેનાર્ચિતો દેવો હેલયા વા નમસ્કૃતઃ

વેદવેદાઙ્ગવપુષાં મુનીનાં ભાવિતાત્મનામ્ ॥
ઋષિત્વમપિ ધર્મજ્ઞ વિજ્ઞેયં તત્પ્રસાદજમ્

રમન્તે સહ રામાભિઃ પ્રાપ્ય વૈદ્યાધરં પદમ્ ॥
અન્યભાવતયા નામ્નઃ કીર્તનાદપિ ભાર્ગવ

રત્નપર્યઙ્કશયિતા મહાભોગાશ્ચ ભોગિનઃ ॥
વીજ્યન્તે સહ રામાભિઃ કેશવસ્મરણાદપિ

સૌગન્ધિકે વને રમ્યે કૈલાસપર્વતે દ્વિજ ॥
યદ્યક્ષા વિહરન્તિ સ્મ તત્પ્રાહુઃ કુસુમં નતેઃ

રત્નચિત્રાસુ રમ્યાસુ નન્દનોદ્યાનભૂમિષુ ॥
ક્રીડન્તિ ચ સહ સ્ત્રીભિર્ગન્ધર્વીભિઃ કથાશ્રુતેઃ

ચતુસ્સમુદ્રવેલાયાં મેરુવિન્ધ્યપયોધરામ્ ॥
ધરાં યે ભુઞ્જતે ભૂપાઃ પ્રણિપાતસ્ય તત્ફલમ્

તસ્માત્તવાઽહં વક્ષ્યામિ યદ્યદાચરતઃ સદા ॥
પુરુષસ્યેહ ભગવાન્સુતોષસ્તુષ્યતે હરિઃ

પૂજ્યઃ સ નિત્યં વરદો મહાત્મા સ્તવ્યઃ સ નિત્યં જગદેકવન્દ્યઃ ॥
ધ્યેયઃ સ નિત્યં સકલાઘહર્તા ચૈતાવદુક્તં તવ રામ ગુહ્યમ્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે શઙ્કર ગીતાસુ ભક્તિફલપ્રદર્શનં નામ સપ્તપઞ્ચાશત્તમોઽધ્યાયઃ