Vishnudharmottara Purana · Chapter 1.54

// śaṅkara uvāca //
hiraṇyākṣe hate daitye bhrātā tasya mahātmanaḥ //
hiraṇyakaśipurnāma cakārograṃ mahattapaḥ

daśavarṣasahasrāṇi daśavarṣaśatāni ca //
japopavāsanirataḥ snānamaunāśritavrataḥ

tapaḥśamadamābhyāṃ ca brahmacaryeṇa cā'nagha //
brahmā prītamanāstasya svayamāgatya bhārgava //

vimānenā'rkavarṇena haṃsayuktena bhāsvatā //
ādityaissahitaḥ sādhyaissahito marudaśvibhiḥ

rudrairviśvasahāyaiśca yakṣarākṣasapannagaiḥ //
digbhirvidigbhiśca tathā khecaraiśca mahāgrahaiḥ

nimnagābhiḥ samudraiśca māsartvayanasaṃdhibhiḥ //
nakṣatraiśca muhūrttaiśca kālasyāvayavaistathā

devarṣibhiḥ puṇyatamaiḥ siddhaiḥ saptarṣibhistathā //
rājarṣibhiḥ puṇyatamairgandharvairapsarogaṇaiḥ

carācaraguruḥ śrīmānvṛtaḥ sarverdivaukasaiḥ //
brahmā brahmavidāṃ śreṣṭho daityaṃ vacanamabravīt

brahmovāca // prītosmi tava bhaktasya tapasā'nena suvrata //
varaṃ varaya bhadraṃ te yatheṣṭaṃ kāmamāpnuhi

hiraṇyakaśipuruvāca // na devāsuragandharvā na yakṣoragarākṣasāḥ //
na mānuṣāḥ piśācā vā hanyurmāṃ devasattama

ṛṣayopi na māṃ śāpaṃ kruddhā lokapitāmaha //
śapeyustapasā yuktā varametadvṛṇomyaham

na śastreṇa na cāstreṇa giriṇā pādapena ca //
na śuṣkena na cā''rdreṇa vadhaṃ me syātkathañcana

bhaveyamahamevārkaḥ somo vāyurhutāśanaḥ //
salilaṃ cā'ntarikṣañca nakṣatrāṇi diśo daśa

ahaṃ krodhaśca kāmaśca varuṇo vāsavo yamaḥ //
dhanadaśca tathādhyakṣo yakṣaḥ kiṃpuruṣādhipaḥ

brahmovāca //
ete divyavarāstāta mayā dattāstavādbhutāḥ //
sarvānkāmānimām̐stasmātprāpsyasi tvaṃ na saṃśayaḥ

śaṅkara uvāca //
evamuktvā sa bhagavāñjagāmā''kāśameva hi //
vairājaṃ devasadanaṃ maharṣigaṇasevitam

tato devāśca nāgāśca gandharvā munayastathā //
varapradānaṃ śrutvaiva pitāmahamupasthitāḥ //

devā ūcuḥ //
vareṇā'nena bhagavānvadhiṣyati sa no'suraḥ //
tannaḥ prasīda bhagavanvadho'pyasya vicintyatām

bhagavānsarvabhūtānāṃ svayambhūrādikṛtprabhuḥ //
sraṣṭā ca havyakavyānāṃ cā'vyaktaḥ prakṛtirdhruvaḥ

śaṅkara uvāca //
sarvalokahitaṃ vākyaṃ śrutvā devaḥ prajāpatiḥ //
provāca varado vākyaṃ sarvāndevagaṇāṃstataḥ

brahmovāca //
avaśyaṃ tridaśāstena prāptavyaṃ tapasaḥ phalam //
tatastasya vadhaṃ viṣṇustapaso'nte kariṣyati

śaṅkara uvāca //
evaṃ śrutvā surāḥ sarve vākyaṃ paṅkajajanmanaḥ //
svāni sthānāni divyāni jagmuste vai mudānvitāḥ

laghumātre vare tasminsarvāḥ so'bādhata prajāḥ //
hiraṇyakaśipurdaityo varadānena darpitaḥ

āśrameṣu mahātmāno munīndrānsaṃśitavratān //
satyadharmaratāndāntāndurādharṣobhavaṃstu saḥ

devāstribhuvasthāṃśca parājitya mahāsuraḥ// /
trailokyaṃ vaśamānīya svarge vasati dānavaḥ

yadā varamadonmatto hyāvāsaṃ kṛtavān divi //
yājñiyānkṛtavāndaityānayājñeyāśca devatā

ādityā vasavo rudrā viśvedevāstathā'śvinau //
bhṛgavo'ṅgirasaḥ sādhyā marutaśca savāsavāḥ

śaraṇyaṃ śaraṇaṃ viṣṇumupatasthurmahābalam //
devaṃ brahmamayaṃ viṣṇuṃ brahmabhūtaṃ sanātanam

bhūtabhavyabhaviṣyasya prabhuṃ lokaparāyaṇam //
nārāyaṇaṃ vibhuṃ devāḥ śaraṇyaṃ śaraṇaṃ gatāḥ

devā ūcuḥ//
trāyasva no'dya deveśa hiraṇyakaśiporvadhāt //
tvaṃ hi naḥ paramo devo brahmādīnāṃ surottama

protphullāmalapatrākṣa śatrupakṣakṣayaṃkara //
kṣayāya ditivaṃśasya śaraṇaṃ tvaṃ bhavasva naḥ

śrībhagavānuvāca //
bhayaṃ tyajadhvamamarā abhayaṃ vo dadāmyaham //
tathaiva tridivaṃ devāḥ pratipadyata mā ciram

eṣo'muṃ sabalaṃ daityaṃ varadānena darpitam//
avadhyamamareṃdrāṇāṃ dānavendraṃ nihanmyaham

śaṅkara uvāca //
evamuktvā sa bhagavānvisṛjya tridiveśvarān //
nārasiṃhaṃ vapuścakra sahasrāṃśusamaprabham

prāṃśuṃ kanakaśailābhaṃ jvālāpuñjavibhūṣitam //
daityasainyamahāmbhodhi vaḍavānalavarcasam

sandhyānuraktameghābhaṃ nīlavāsasamacyutam //
devadāruvanacchannaṃ yathā meruṃ mahāgirim

saṃpūrṇavaktradaśanaiḥ śaśāṅkaśakalopamaiḥ //
pūrṇaṃ muktāphalaiḥ śubhraiḥ samudramiva kāñcanam

nakhairvidrumasaṃkāśairvirājitakaradvayam //
daityanāthakṣayakaraiḥ krodhasyaiva yathāṅkuraiḥ

saṭābhāraṃ sakuṭilaṃ vahnijvālāgrapiṃgalam //
dhārayanbhāti sarvātmā dāvānalamivācalaḥ

dṛśyādṛśyamukhe tasya jihvābhyuditacañcalā //
pralayāntāmbudasyeva cañcalā tu taḍillatā

āvarttibhirlomaghanairvyāptaṃ vigrahamūrjitam //
mahākaṭitaṭaskandhamalātapratimekṣaṇam

kalpāntameghanirghoṣajvālāniḥśvāsamārutam //
durnirīkṣyaṃ durādharṣaṃ vajramadhyavibhīṣaṇam

kṛtvā mūrtiṃ nṛsiṃhasya dānaveṃdrasabhāṃ yayau //
tāmbabhañja tu vegena daityānāṃ bhayavardhanaḥ

bhajyamānāṃ sabhāṃ dṛṣṭvā nṛsiṃhena mahātmanā //
hiraṇyakaśipū rājā dānavānsamacodayat

sattvajātamidaṃ ghoraṃ cāpūrvaṃ punarāgatam //
ghātayadhvaṃ durādharṣaṃ yena me nāśitā sabhā

tasya tadvacanaṃ śrutvā daityāḥ śatasahasraśaḥ //
āyudhairvividhairjaghnurdevadevaṃ janārdanam

nānāyudhasahasrāṇi tasya gātreṣu bhārgava //
viśīrṇānyeva dṛśyante mṛlloṣṭānīva parvate

daityāyudhānāṃ vaiphalyaṃ kṛtvā hatvā ca dānavān //
karapādaprahāraiśca śataśo'tha sahasraśaḥ

jagrāha vegāddaiteyaṃ hiraṇyakaśipuṃ tataḥ //
nṛsiṃhahetorvikrāntamastravarṣamahāmbudam

vegenotsaṃgamāropya kadalīdalalīlayā //
dārayāmāsa daityeśaṃ vakṣatsthalamahāgirim

kṛtvā tamasubhirhīnaṃ daityeśaṃ keśavaḥ svayam //
asurāṇāṃ vināśaṃ ca kruddho naraharirvyadhāt

hatvā'suraṃ śoṇitabinducitraṃ saṃpūjya devāḥ saha vāsavena //
jagmussvadhiṣṇyāni mudā sametā devopyathāntarhitamūrtirāsa

iti śrīviṣṇudharmmottare prathamakhaṇḍe mārkaṇḍeyavajrasaṃvāde śaṅkaragītāsu narasiṃhaprādurbhāvo nāma catuṣpañcāśattamo'dhyāyaḥ