Vishnudharmottara Purana · Chapter 1.52

// śaṃkara uvāca //
tvaduktoyamanupraśno rāma rājīvalocana //
tvamekaḥ śrotumarho'si matto bhṛgukulodvaha

yattatparamakaṃ dhāma mama bhārgavanandana //
yattadakṣaramavyaktaṃ paraṃ yasmānna vidyate //
jñānajñeyaṃ jñānagamyaṃ hṛdi sarvasya cāśritam

tvāmahaṃ puṇḍarīkākṣaṃ cintayāmi janārdanam //
etadrāma rahasyaṃ te yathāvatkathitaṃ vacaḥ

ye bhaktāstamajaṃ devaṃ na te yānti parābhavam //
tamīśamajamavyaktaṃ sarvabhūtaparāyaṇam

nārāyaṇamanirdeśyaṃ jagatkāraṇakāraṇam //
sarvataḥ pāṇipādantaṃ sarvato'kṣiśiromukham

sarvataḥ śrutimām̐lloke sarvamāvṛtya tiṣṭhati //
sarvendriyaguṇābhāsaṃ sarvendriyavivarjitam

asaktaṃ sarvataścaiva nirguṇaṃ guṇabhoktṛ ca //
bahirantaśca bhūtānāmacaraścara eva ca

sūkṣmatvāttadavijñeyaṃ dūrasthaṃ cāntikaṃ ca yat //
avibhaktaṃ vibhakteṣu vibhaktamiva ca sthitam

bhūtavartiṃ ca tajjñeyaṃ graśiṣṇu prabhaviṣṇu ca //
jyotiṣāmapi tajjyotiḥ tamasāṃ paramucyate

anādimatparaṃ brahma na sattannā'saducyate //
prakṛtirvikṛtiryo'sau jagatāṃ bhūtabhāvanaḥ

yasmātparataraṃ nāsti taṃ devaṃ cintayāmyaham //
icchāmātramidaṃ sarvaṃ trailokyaṃ sacarācaram

yasya devādidevasya taṃ devaṃ cintayāmyaham //
yasminsarvaṃ yataḥ sarvaṃ yaḥ sarvaṃ sarvataśca yaḥ

yaśca sarvamayo nityastaṃ devaṃ cintayāmyaham //
yogīśvaraṃ padmanābhaṃ viṣṇuṃ jiṣṇuṃ jagatpatim

jagannāthaṃ viśālākṣaṃ cintayāmi jagadgurum //
śuciṃ śucipadaṃ haṃsaṃ tatparaṃ parameṣṭhinam

yuktā sarvātmanā''tmānaṃ taṃ prapadye prajāpatim //
yasminviśvāni bhūtāni tiṣṭhanti ca viśanti ca

guṇabhūtāni bhūteśe sūtre maṇigaṇā iva //
yasminnitye tate tantau dṛṣṭe khagiva tiṣṭhati

sadasadgrathitaṃ viśvaṃ viśvāṃge viśvakarmaṇi //
hariṃ sahasraśirasaṃ sahasracaraṇekṣaṇam

prāhurnārāyaṇaṃ devaṃ yaṃ viśvasya parāyaṇam //
aṇīyasāmaṇīyāṃsaṃ sthaviṣṭhañca sthavīyasām

garīyasāṃ gariṣṭhañca śreṣṭhañca śreyasāmapi //
yaṃ vākeṣvanuvākeṣu niṣatsūpaniṣatsvapi

gṛṇanti satyakarmāṇaṃ satyaṃ satyeṣu sāmasu //
caturbhiścaturātmānaṃ sattvasthaṃ sāttvatāṃ patim

yaṃ divyairdevamarcanti guhyaiḥ paramanāmabhiḥ //
yamananyo vyapetāśīrātmānaṃ vītakalmaṣam

iṣṭvānantyāya govindaṃ paśyatyātmanyavasthitam //
purāṇaḥ puruṣaḥ prokto brahmā prokto yugādiṣu

kṣaye saṃkarṣaṇaḥ proktastamupāsyamupāsmahe //
yamekaṃ bahudhātmānaṃ prādurbhūtamadhokṣajam

nānyabhaktāḥ kriyāvanto yajante sarvakāmadam //
yamāhurjagatāṃ kośaṃ yasminsannihitāḥ prajāḥ

yasmiṃllokāḥ sphurantīme jāle śakunayo yathā //
ṛtamekākṣaraṃ brahma yattatsadasataḥ param

anādimadhyaparyantaṃ na devā narṣayo viduḥ //
yaṃ surāsuragandharvāssaṃsiddharṣimahoragāḥ

prayatā nityamarcanti paramaṃ duḥkhabheṣajam //
anādinidhanaṃ devamātmayoniṃ sanātanam

apratarkyamavijñeyaṃ hariṃ nārāyaṇaṃ prabhum //
ativāyvindrakarmāṇaṃ cā'tisūryāgnitejasam

atibuddhīndriyagrāmaṃ taṃ prapadye prajāpatim //
yaṃ vai viśvasya karttāraṃ jagatastasthuṣāṃ patim

vadanti jagato'dhyakṣamakṣaraṃ paramaṃ padam //
yasyāgnirāsyaṃ dyaurmūrdhā khaṃ nābhiścaraṇau kṣitiḥ

candrādityau ca nayane taṃ devaṃ cintayāmyaham //
yasya trilokī jaṭhare yasya kāṣṭhāśca vāhanāḥ

yasya śvāsaśca pavanastaṃ devaṃ cintayāmyaham //
viṣaye vartamānānāṃ yaṃ taṃ vaiśeṣikairguṇaiḥ

prāhurviṣayagoptāraṃ taṃ devaṃ cintayāmyaham //
paraḥ kālātparo yajñātparassadasataśca yaḥ

anādirādirviśvasya taṃ devaṃ cintayāmyaham //
padbhyāṃ yasya kṣitirjātā śrotrābhyāñca tathā diśaḥ

pūrvabhāge divaṃ yasya taṃ devaṃ cintayāmyaham//
nābhyāṃ yasyāntarikṣasya nāsābhyāṃ pavanasya ca

prasvedādambhasāṃ janma taṃ devaṃ cintayāmyaham

varāhaśīrṣaṃ narasiṃharūpaṃ deveśvaraṃ vāmanarūparūpam//
trailokyanāthaṃ varadaṃ vareṇyaṃ taṃ rāma nityaṃ manasā nato'smi

vāktrādyasya brāhmaṇāssaṃprasūtā yadvakṣasaḥ kṣatriyāḥ saṃprasūtāḥ //
yasyoruyugmācca tathaiva vaiśyāḥ padbhyāṃ tathā yasya śūdrāḥ prasūtāḥ

vyāptaṃ tathā yena jagatsamagraṃ vibhūtibhirbhūtabhavodbhavena //
devādhināthaṃ varadaṃ vareṇyaṃ taṃ rāma nityaṃ manasā nato'smi

iti śrīviṣṇudharmottare prathamakhaṇḍe mārkaṇḍeyavajrasaṃvāde śrībhārgavarāmapraśne śaṅkaragītāsu dhyeyanirdeśonāma dvipañcāśattamo'dhyāyaḥ५२/