Vishnudharmottara Purana · Chapter 1.51

//mārkaṇḍeya uvāca//
kailāsaśikhare ramye nānādhātuvicitrite //
nānādrumalatākīrṇe nānāpakṣininādite

gaṃgānirjharasaṃjāte satataṃ cārunisvane //
devadevaṃ mahādevaṃ paryapṛcchata bhārgavaḥ

rāma uvāca //
devadeva mahādeva gaṃgālulita mūrddhaja //
śaśāṃkalekhāsaṃyukta jaṭābhārātibhāsvara

pārvatīdattadehārdha kāmakālāṅganāśana //
bhaganetrāntakācintya pūṣṇo daśanaśātana //

tvattaḥ parataraṃ devaṃ nā'nyaṃ paśyāmi kañcana //
pūjayanti sadā liṃgaṃ tava devāḥ savāsavāḥ

stuvanti tvāmṛṣigaṇā dhyāyanti ca muhurmuhuḥ //
pūjayanti tathā bhaktyā varadaṃ parameśvara

jagato'sya samutpattisthitisaṃhārapālane //
tvāmekaṃ kāraṇaṃ manye tvayi sarvaṃ pratiṣṭhitam

kaṃ tvaṃ dhyāyasi deveśa tatra me saṃśayo mahān //
ācakṣva tanme bhagavanyadyanugrāhyatā mayi

prasādasāṃmukhyatayā mayaitadvisrambhamāsādya jagatpradhāna //
bhavantamīḍyaṃ praṇipatya mūrdhnā pṛcchāmi saṃjātakutūhalātmā

iti śrīviṣṇudharmmottare prathamakhaṇḍe mārkaṇḍeyavajrasaṃvāde paraśurāmopākhyāne śaṃkaragītāsu rāmapraśno nāmaikapañcāśattamo'dhyāyaḥ