વિષ્ણુધર્મોત્તરપુરાણમ્ · અધ્યાય 1.51

॥માર્કણ્ડેય ઉવાચ॥
કૈલાસશિખરે રમ્યે નાનાધાતુવિચિત્રિતે ॥
નાનાદ્રુમલતાકીર્ણે નાનાપક્ષિનિનાદિતે

ગંગાનિર્ઝરસંજાતે સતતં ચારુનિસ્વને ॥
દેવદેવં મહાદેવં પર્યપૃચ્છત ભાર્ગવઃ

રામ ઉવાચ ॥
દેવદેવ મહાદેવ ગંગાલુલિત મૂર્દ્ધજ ॥
શશાંકલેખાસંયુક્ત જટાભારાતિભાસ્વર

પાર્વતીદત્તદેહાર્ધ કામકાલાઙ્ગનાશન ॥
ભગનેત્રાન્તકાચિન્ત્ય પૂષ્ણો દશનશાતન ॥

ત્વત્તઃ પરતરં દેવં નાઽન્યં પશ્યામિ કઞ્ચન ॥
પૂજયન્તિ સદા લિંગં તવ દેવાઃ સવાસવાઃ

સ્તુવન્તિ ત્વામૃષિગણા ધ્યાયન્તિ ચ મુહુર્મુહુઃ ॥
પૂજયન્તિ તથા ભક્ત્યા વરદં પરમેશ્વર

જગતોઽસ્ય સમુત્પત્તિસ્થિતિસંહારપાલને ॥
ત્વામેકં કારણં મન્યે ત્વયિ સર્વં પ્રતિષ્ઠિતમ્

કં ત્વં ધ્યાયસિ દેવેશ તત્ર મે સંશયો મહાન્ ॥
આચક્ષ્વ તન્મે ભગવન્યદ્યનુગ્રાહ્યતા મયિ

પ્રસાદસાંમુખ્યતયા મયૈતદ્વિસ્રમ્ભમાસાદ્ય જગત્પ્રધાન ॥
ભવન્તમીડ્યં પ્રણિપત્ય મૂર્ધ્ના પૃચ્છામિ સંજાતકુતૂહલાત્મા

ઇતિ શ્રીવિષ્ણુધર્મ્મોત્તરે પ્રથમખણ્ડે માર્કણ્ડેયવજ્રસંવાદે પરશુરામોપાખ્યાને શંકરગીતાસુ રામપ્રશ્નો નામૈકપઞ્ચાશત્તમોઽધ્યાયઃ