Vishnudharmottara Purana · Chapter 1.50

// mārkaṇḍeya uvāca // //
brahmāstraṃ vaiṣṇavaṃ raudramāgneyamatha vāsavam //
astrañca nairṛtaṃ yāmyaṃ kauberamatha vāruṇam

vāyavyamatha saumyañca sauraṃ pārvatameva ca //
cakrāstramatha vajrāstraṃ pāśāstraṃ sārpameva ca

gāndharvaṃ svāpanaṃ bhautaṃ tathā pāśupataṃ śubham //
aiṣīkaṃ tarjanaṃ prāsaṃ bhāruṇḍaṃ nartanaṃ tathā

astrarodhanamādityaṃ raivataṃ mānavaṃ tathā //
akṣisaṃtarjanaṃ bhīmaṃ jṛmbhaṇaṃ rodhanaṃ tathā

sauparṇamatha pārjanyaṃ rākṣasaṃ mohanaṃ tathā //
kālāstraṃ dānavāstrañca astraṃ brahmaśirastathā

etānyanyāni cā'nyāni rāmo nivasane tataḥ //
saprayogarahasyāni sasaṃhārāṇi cāpyatha

ājahāra mahādevātprasādasumukhāttataḥ //
evaṃ hi vasataḥ kālo yayau rāmasya dhīmataḥ

haraprasādasaṃjātavisrambho bhṛgunandanaḥ //
dhyānāsaktaṃ haraṃ devaṃ kadācidatha dṛṣṭavān

dhyānaprasaktaṃ sa haraṃ samīkṣya rāmastu saṃjātakutūhalena //
visiṣmiye dharmabhṛtāṃ variṣṭhaḥ sa cetasā yādavavaṃśacandra

iti śrīviṣṇudharmottare prathamakhaṃḍe mārkaṇḍeyavajrasaṃvāde astra pradānaṃ nāma pañcāśattamo'dhyāyaḥ