Vishnudharmottara Purana · Chapter 1.48

mārkaṇḍeya uvāca //
siṃhikāputrasainyena hanyamānastadā raṇe //
gocarābhyāgatānsarvānrāmo ninye yamakṣayama

tena kṛttāḥ paraśunā yathā paraśunā mṛgāḥ //
āliṅgya śerate kṣoṇīṃ dānavāste madoddhatāḥ

tīkṣṇadhārāgraduṣprekṣyakuṭhāracchinnamastakaiḥ //
ātatāra tadā bhūmiṃ kuśairvedimivādhvare

paraśvadhāgrasaṃbhinnadaityadehasamudbhavam //
prasusrāva tadā raktaṃ yenā''sītkardamaṃ mahat

te hanyamānā rāmeṇa rāmamevā'bhidudruvuḥ //
paripūrṇe yathā kāle śalabhā jātavedasam

rāmasya pramukhe daityāstadā tiṣṭhanti ye nṛpa //
nimeṣāntaramātreṇa te prayānti yamakṣayam

kuñjarasturagaḥ pattirnājau yādava dṛśyate //
dvitīyaṃ pradadau yasya prahāraṃ bhṛgunandanaḥ

ekaprahārābhigatāndānavānparvatopamān//
apaśyāma raṇe tatra brahmaṇā sahitā vayam

rāmeṇa hanyamānānāṃ dānavānāṃ muhurmuhuḥ //
ārāvaḥ śrūyate ghoro vanānāmiva dahyatām

ākramya padbhyāṃ tarasā rathasthānāmathāharat //
śīrṣāṇi tena tīkṣṇena tathā paraśunā raṇe

rāmeṇā''kramyamāṇeṣu ratheṣu rathayūthapāḥ //
bhūmau niviṣṭamūrddhānastatyajurjīvitaṃ hayāḥ

niṣpipeṣa rathasthānāṃ dārayankuñjarānraṇe //
babhrame tatra tatraikaḥ kālotsṛṣṭa ivāntakaḥ

vicchindanyodhaśīrṣāṇi raṇe rāmo rathādratham //
vrajanbhāti viśālākṣo vṛkṣādavṛkṣamivā'ṇḍaja

sa śarāñcitasarvāṅgaḥ śoṇitena samukṣitaḥ //
rarāja rāmaḥ samare raśmimāniva bhāskaraḥ

daityabāhuvinirmuktānāyudhāñchataśastathā //
paraśvadhāgreṇa raṇe ciccheda raṇakarkaśaḥ

teṣāṃ saṃchidyamānānāṃ prādurāsīddhutāśanaḥ //
yena tāneva tarasā kṣitau cakre sa bhasmasāt

bahutvāddaityayodhānāṃ rāmassaṃchādito raṇe //
hetipuñjena mahatā śailābhena na dṛśyate

hetipuñjaṃ vidhūyogramabhrapuñjaṃ yathā raviḥ //
punardarśanamāyāti saṃharttā daityatejasām

brahmā suragaṇaiḥ sārddhamṛṣibhiśca mahātmabhiḥ //
pūjayāmāsa tadyuddhaṃ sādhuvādena yādava

dṛṣṭavantaśca dhanuṣā yuddhāni ca muhurmuhuḥ //
tathaivā''ścaryabhūtāni lokānāṃ khaḍgacarmaṇā

apūrva eṣa saṃgrāmo rāmasya bahubhiḥ saha //
paraśvadhāyudhasyogra iti devāstathā'bruvan

pūjyamānaḥ sa rāmo'pi devapuṣpotkaraistadā //
ciccheda yudhi daityānāṃ śirāṃsi śataśo raṇe

daityaśoṇitadigdhāṅgaṃ bhārgavaṃ laghuvikramam //
alātacakrapratimaṃ tadā paśyati yādava

bhramatā'nena raudreṇa raṇe kālāgnivarccasā //
kṛtāḥ samaraśauṇḍena bhīmā rudhiranimnagāḥ

paraśvadhāgravikṣepagatajīvitakuñjaraiḥ //
pādopalaiśca samare pratastāra sa bhārgavaḥ

dantidantapadanyāsaprāptaṃ kuñjaramastakam //
vinighnansa gajārohācchyenavadvicaran laghu

āruhya kuṃjarañcaikaṃ kuñjarātkuñjarāntaram //
apaśyāma raṇe rāmaṃ vicarantaṃ yathāsukham

bhūyo bhūmigato rāmaḥ kuñjarāṇāṃ paraśvadhā //
cakāra kadanaṃ ghoraṃ pralayāgnirivotthitaḥ

chinnāgrahastānviradāndviradāñchoṇitokṣitān //
kṣitau gatā na paśyāmaḥ śyāmīkṛtadigantarān

evaṃ hi yudhyatā tena raṇe kālāgnivarcasā //
hatāni dānavendrāṇāṃ prayutānyarbudāni ca

yeṣāṃ prahāraṃ saṃsoḍhuṃ neyaṃ śaktā vasundharā //
teṣāṃ prahārabhinnāṅgo naiva rāmo vyakampata

dṛṣṭvā prahāravaiklavyaṃ nihatāṃśca mahāsurān //
pradudruvurdaityagaṇāḥ sālvaṃ śaraṇamāhave

alpāvaśiṣṭānditijānpranaṣṭānsaṃvīkṣya sālvaḥ svahite niviṣṭān //
rāmaṃ yayau tena gajena yuddhe rāmādraṇe yuddhamabhīpsamānaḥ

iti śrīviṣṇudharmottare prathamakhaṇḍe mā०saṃ० sālvasainyavadho nāmā'ṣṭacatvāriṃśattamo'dhyāyaḥ