Vishnudharmottara Purana · Chapter 1.43

// rāhuruvāca //
balibāṇamahākūrma śambarāvartabhīṣaṇam //
anuhrādamahāgrāhaṃ kālakeyamahājalam

hiraṇyākṣamahāratnaṃ prahrādācalaniścalam //
tathā namucikallolaṃ hrādasaṃhrādaśabdavat

hiraṇyakaśipūdyotaṃ kālanemibalāhakam //
amṛtāharaṇakṣubdhaṃ tadā daityamahārṇavam ३ //
kṣubdhaṃ daityārṇavaṃ śrutvā nirgataṃ samarāya ca //
niryayustridaśāḥ sarve sannaddhā yuddhakāṅkṣiṇaḥ

tataḥ pravartate yuddhaṃ ghoraṃ bhīrubhayaṃkaram //
devānāṃ dānavānāṃ ca parasparavadhaiṣiṇām

pātyamāneṣu śastreṣu kavaceṣu mahātmanām//
devānāṃ dānavānāñca hyutpeturjvalanārciṣaḥ

gajavājikhurakṣuṇṇamuttasthau sumahadrajaḥ //
yugāntānaladhūmābhaṃ trailokasyeva dahyataḥ

tasminpravṛtte rajasi ghore bhīrubhayaṃkare //
nirmaryādamabhūdyuddhaṃ devānāṃ dānavaiḥ saha

tato daityasamutthena tathā devodbhavena ca //
rudhireṇa mahī vyāptā praśāntañca rajaḥ kṣaṇāt

dhvaje cchatre rathe nāge cāmare vyajane haye//
sarvatra dṛśyate daityaraktaṃ lākṣārasaprabham

tasminyuddhe mahāraudre daityadānavanāśane //
babhramuḥ kuñjarā mattā mahāmātrapracoditāḥ

hatairvīraistathai vā'nyaiḥ kuñjarāḥ parvatopamāḥ //
kurvantaḥ svānyanīkāni dṛśyante śataśo raṇe

chinnadantā bhinnadhvajā vihastacaraṇāstathā //
śailābhāpatitāstatra śobhayanto raṇājiram

babhramuḥ sādibhirhīnā hayāḥ sūryahayopamāḥ //
mṛtāśca śataśastatra dṛśyante vikṛtānanāḥ

āgulphamavasīdanti daityāḥ śoṇitakardame //
rathibhirnihatā nāgā nāgaiśca nihatā rathāḥ

hayāśca viddhā nāgaistu sādibhiḥ kuñjarā hatāḥ //
rathasādigajārohairnihatāśca padātayaḥ

pattinā mahatā sādī kuñjaro ratha eva ca //
tataḥ prāvartata nadī rudhiraughataraṅgiṇī

astragrāhā dhanurmīnā cakrakūrmā mahāsvarā //
chatrahaṃsā nāgavatī keśaśaivalaśādvalā

daityaśīrṣopalā raudrā tathā bhīrubhayāvahā //
bāhusarpā mahāvartā śarāṇāṃ harṣavarddhinī

apāragamyā pattīnāṃ phenapuñjasamākulā //
tasminyuddhe mahāghore tumule lomaharṣaṇe

ākīrṇā vasudhā bhāti vadanaiḥ kamalopamaiḥ //
vivṛttaiśca mahādaṃṣṭairdānavānāṃ mahātmanām

bāhubhiścāṅgadaiścaiva raktacandanarūṣitaiḥ //
hastihastairmahāprāsairasibhiśca mahādhanaiḥ

tālavṛntaistathā chatraiścāmarairyaṣṭibhistathā//
mukuṭaiḥ kuṇḍalaiścaiva śuśubhe bhūrvibhūṣitā

tataste dānavāḥ kruddhāḥ svayuddhena dievepsavaḥ //
abhidravanti deveśaṃ sahasrākṣaṃ puraṃdaram

daityānāṃ patatāṃ dṛṣṭvā prahrādaṃ devasūdanam//
pratyudyayau gajenā ''jau devarājo mahābalaḥ

hutāśano'pi namucimanuhrādaṃ tathā śaśī//
varuṇaśca tathā bāṇaṃ yamo devastathā balim

hiraṇyakaśipuṃ rudro vāyurvṛtrāsuraṃ raṇe //
virūpākṣaṃ tathā śaṃbhurhiraṇyākṣaṃ dhaneśvaraḥ

anye ca daityāḥ śataśaḥ saṃyuktā devatāgaṇaiḥ //
dvandvayuddhasahasreṣu teṣvavartata dānavaiḥ

prāyaśo vijitā devā yayurbhagnā diśo daśa //
dānavāśca jayaṃ labdhvā devānanuyayurbalāt

te bhagnāstridaśāḥ sarve dānavaiścāpyabhidrutā //
trāṇārthamatha saṃprāptā naranārāyaṇāśramam

devānāmabhayaṃ dattvā naranārāyaṇau tadā //
śaṃkhacakrāyudhadharau yuddhāya samavasthitau

naranārāyaṇau dṛṣṭvā tatkṣubdhaṃ daityasāgaram //
sarvāyudhavisargeṇa tayoryuddhaṃ vyavasthitam

gajābhrajālasaṃchannaṃ śaradhāraughavarṣaṇam //
calankhaḍgalatāvidyuddaityadurdinamābabhau

tataḥ śarai rukmavibhūṣitāgraiḥ sunetrapuṃkhairjvalanārkavarṇaiḥ //
bibheda gātrāṇi naro ripūṇāṃ jahāra śīrṣāṇi sakuṇḍalāni

nārāyaṇopyuttamavīryatejāścakreṇa cakre ditinandanānām //
vidārayāmāsa mahānubhāvastasminraṇe ghoratare tadānīm

vīryaṃ tayorapratimaṃ nirīkṣya te dānavā bhagnanikṛttayodhāḥ //
hatāmṛtā jīvitamātraśeṣā vegena yātā varuṇādhivāsam

labdhvā jayaṃ devapatirmahātmā prahrādamājau ca tathā vijitya //
saṃpūjayāmāsa mahānubhāvau dharmātmajau tāpasasaṃghamukhyau

saṃpūjya tau dharmasutau jitārirdevaiḥ prahṛṣṭairanuyāsyamānaḥ //
jagāma nākaṃ tridaśapradhānaḥ sukhī babhūvātha gatajvaraśca

evaṃ prabhāvo bhagavānsa viṣṇurvairaṃ na me rocati tena nityam //
sandhiṃ kuruṣvā''tmahitāya rājañchakreṇa tenāriniṣūdanena

iti śrīviṣṇudharmottare prathamakhaṇḍe mārka ṇḍeyavajrasaṃvāde rāhuvākyena devadānavayuddhavarṇano nāma tricatvāriṃśattamo'dhyāyaḥ