Vishnudharmottara Purana · Chapter 1.44

// mārkaṇḍeya uvāca // //
evamuktastadā sālvo rāhuṇā bhīmavikramaḥ //
jagāda bhrātaraṃ vākyaṃ sārabhūtamahetumat

sālva uvāca //
asāre graha saṃsāre nitye satatayāyini //
bhavakṣaye matiḥ kāryā rujopakaraṇeṣu vā //
jantavastrividhā loke tridhā yeṣāṃ viceṣṭitam

tāmasārājasāścaiva sāttvikāśca graheśvara //
bhavakṣaye ye vimukhā bhavopakaraṇeṣu ca

lokadvitayavibhraṣṭāstāmasāste prakītitāḥ //
bhavakṣayamatibhraṣṭā bhavopakaraṇe sthitāḥ

rājasāste vinirdiṣṭā madhyasthāḥ sarvajantuṣu //
bhavopakaraṇe daitya matiyerṣāṃ na vidyate

bhavakṣaye matiryeṣāṃ sāttvikāste prakīrtitāḥ //
tāmasatvānmayā daitya matiḥ pūrvaṃ bhavakṣaye

na kṛtā tena tapyāmi rājyatantramanuṣṭhitam //
manvantare'pi sampūrṇe mṛtiryeṣāṃ grahottama

udvijantyeva te mṛtyormahanmṛtyukṛtaṃ bhayam //
avaśyaṃ daitya marttavyaṃ sarveṇeha śarīriṇā

so'haṃ mokṣaparibhraṣṭaḥ kāmaye keśavādvadham //
iṣṭaṃ yajñaistapastaptaṃ ripūṇāṃ mūrdhani sthitam

marttavye ca dhruve gamānmaraṇaṃ kāmayāmyaham //
saṃprāpya keśavānmṛtyuṃ gatiṃ prāpsyāmyanuttamām

bhūyo rājyamavāpsyāmi nākabhraṣṭo grahottama //
vivāsya vāsavaṃ svargātparibhūya punaḥpunaḥ

kathaṃ sandhiṃ kariṣyāmi tenā'haṃ jīvitapriyaḥ //
praṇāmaṃ deva rājasya keśavānmaraṇaṃ varam /

samīkṣya sādhu paśyāmi keśavānmaraṇaṃ raṇe //
śakreṇa kṛtasandhānaṃ pātālanilayaṃ tathā

tyakṣanti māṃ daityagaṇā vṛddhaṃ patimivā'ṅganāḥ //
divi bhūmau tathā svarge pātāle gagane jale

dehināṃ mṛtyurabhyeti tasya nā'sti palāyanam //
sarve kṣayāntā nicayāḥ patanāntāḥ samucchrayāḥ

saṃyogā viprayogāntā maraṇāntaṃ hi jīvitam //
avaśyabhāvinyarthe'sminsarveṣāṃ graha sarvadā

puṇyabhājo hi maraṇaṃ saṃgrāme yadi jāyate //
so'haṃ kṣatriyadharmeṇa saṃpūjya samare harim

tasmānmṛtyumanuprāpya gatiṃ prāpsyāmi śobhanām//
naivedyaiḥ puppadhūpādyairna tathā pūjito hariḥ

toṣamāyāti daityendra sa dharmeṇa yathā nṛṇām //
bhrātrā jyeṣṭhena yadvācyaṃ suhṛdā hitamicchatā

tadukto'smi tvayā nātha devāttanme na rocate //
sa tvaṃ gaccha mahābhāga dividraṣṭāsi māṃ punaḥ

dehāntaramanuprāptaṃ graha divyena cakṣuṣā //
//mārkaṇḍeya uvāca//
ityeva sālvasya niśamya vākyaṃ kālānurūpaṃ ca tathā viditvā//
na kiñciduktvaiva jagāma rāhurdivaṃ mahātmā jagatāṃ pradhānaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde sālvavākyaṃ nāma catuścatvāriṃśattamo'dhyāyaḥ