Vishnudharmottara Purana · Chapter 1.38

// mārkaṇḍeya uvāca // //
ratnacitrāṃ suvipulāṃ samāsādya sabhāṃ tadā //
siṃhikātanayaḥ sālvaḥ śukraṃ vacanamabravīt

sālva uvāca //
dṛśyanta ete bhagavannutpātā ghoradarśanāḥ //
ācakṣāṇā mahāyuddhaṃ vināśamapi dāruṇam

ripuṃ na caiva paśyāmo yena yuddhaṃ bhaviṣyati //
sarvajñatvādbhavānvetti tannaḥ prabrūhi pṛcchatām

śukra uvāca //
ārādhya devaṃ brahmāṇaṃ tapasā siṃhikā purā //
tridaśebhyo hyavadhyatvaṃ svasutānāmalabdha sā

varadānakṛtotsāhairbhavadbhirvidyayā mama //
nirjitāstridaśāḥ sarve śaṃkaraṃ śaraṇaṃ gatāḥ

tena yuṣmadvadhārthāya viṣṇurmānuṣarūpadhṛk //
jamadagnisuto rāmaḥ preṣito raṇakarkaśaḥ

sadā devo mahātejā mānuṣaṃ sa tu sāmpratam //
manuṣyācca bhayaṃ ghoraṃ yuddhyasvā'surasattama

sālva uvāca //
bhagavansarvadevānāmīśvaro madhusūdanaḥ //
tasmātparataraṃ devaṃ nā'nyaṃ kañcana śuśruma

kimarthaṃ sa mahātejāḥ śaṃkarasya mahātmanaḥ //
ājñākārī bhṛguśreṣṭha saiṃhikeyaṃ jighāṃsati

śukra uvāca //
yadā yadā hi dharmasya glānirbhavati dānava //
abhyutthānamadharmasya tadā''tmānaṃ sṛjatyasau

kadāciddaityadeveṣu kadācinmanujeṣu ca //
kadācidatha tiryakṣu jñātvā kāryabalābalam

yadā bhavati deveṣu devavacceṣṭate tadā //
tiryakṣu ca yadā devastiryagvacceṣṭate tadā //
yadā bhavati mānuṣye tadā bhavati martyavat//
mānuṣyaṃ rūpamāsādya tapasā tripurāntakam

ārādhayāmāsa haraṃ svadehe paramaṃ nṛpa //
sa tu devavarasyājñāṃ puraskṛtya mahātapāḥ

yuṣmadvadhārthamāyāti rāmeṇa kṛtalakṣaṇaḥ //
tasmācchakreṇa saṃdhānaṃ bhavato mama rocate

triviṣṭapañca devānāṃ bhavatvasurasattama //
pātālanilayā yūyaṃ nivasadhvaṃ gatajvarāḥ

ahaṃ nivārayiṣyāmi śaṃkareṇa ca bhārgavam //
anyathā niviśadhvaṃ ca manuṣyeṇa nirākṛtāḥ

mārkaṇḍeya uvāca //
evamuktāstu śukreṇa buddhvā daiteyadānavāḥ //
ūcurvākyaṃ susaṃrabdhāḥ śukraṃ bhṛgukulodvaham

daityā ūcuḥ // ekatrā'dhiṣṭhitaṃ sarvaṃ jagatsthāvarajaṃgamam //
yadyasmātpratiyudhyeta na bhīstatrā'pi vidyate

te kathaṃ mānuṣādbhītā nākaṃ tyakṣyāma śatrave //
śaṃkaraṃ taṃ vijeṣyāmo yenā'sau preṣito dvijaḥ

śukra uvāca //
ekatra piṃḍitaṃ sarvaṃ jagatsthāvarajaṃgamam //
ekatra bhagavānviṣṇurjagataḥ so'tiricyate

sa na śakyo yudhā jetuṃ naiva devo maheśvaraḥ //
te yūyaṃ prākṛtīṃ buddhiṃ tyaktvā sarve mahāsurāḥ //
saṃdhiṃ kuruta devena śakreṇā'mitraghātinā

śakrakārye sadodyukto devadevo janārdanaḥ //
yena daityā vinihatāḥ pūrve pūrvatarāśca ye

śaṃbaro namuciḥ śambuḥ kārtavīryaḥ kṛtāgamaḥ //
hiraṇyakaśipuḥ keśī hiraṇyākṣo madotkaṭaḥ

madhuśca kaiṭabhaścaiva viṭo dhūmo'ti'kopanaḥ //
hayagrīvo nisundaśca sundaścandrārkalocanaḥ

'
candrārkamardanaścaiva candrahartā raṇapriyaḥ //
sūryaśatrurjitāmitro yajñahā yajñatāpanaḥ

meghanādo mahāromā meghavādo bhayānakaḥ //
daśagrīvaḥ śatagrīvo mahāgrīvaśca dānavaḥ

kālakaḥ kālakeyaśca kālanemi sulocanaḥ //
kālaśca kālakalpaśca makarākṣo janāntakaḥ

antaḥ keśamano bhīmo devāntakanarāntakau //
krodhahā bahunetraśca mahākālo jalāntakaḥ

ekalavyaḥ sa cādhāro durmukho durdharo vaḍiḥ //
indutāpanarambho ca raṇacaṇḍaharapriyau

kirīṭī gajavaktraśca mahāsālo vilohitaḥ //
hrādānuhrādaprahrādavṛkṣarakṣaradāruṇāḥ

śatabhaḥ śalabhaścaiva kūpanaśca mahāsuraḥ //
vipracittiḥ śivaḥ śaṅkarayaḥ śaṅkustathaiva ca

ayaḥśirā aśvaśirā bhīmadakṣo guhāśayaḥ //
vegavānketumānugraḥ sogravigro mahāsuraḥ

puṣkaraḥ puṣkalaścaiva sālvośvapatireva ca //
kumbho nikumbhaḥ śatadā saṃgraho gaganapriyaḥ

ete cā'nye ca vikhyātā daiteyā samaroddhatāḥ //
sarve labdhavarāḥ śūrāḥ sarve ca gatamanyavaḥ

sarvaistridaśarājyāni kāritāni baloddhataiḥ //
te hatāstena devena vāsavapriyakāmyayā

kecinmanuṣyarūpeṇa tiryagrūpeṇa cā'pare //
kecicca devarūpeṇa nihatā bhūritejasā

sālva uvāca //
jānāmi tasya māhātmyaṃ devadevasya śārṅgiṇaḥ //
ahaṃ svamaraṇaṃ matvā tena yotsyāmi bhārgava

viśiṣṭānmaraṇaṃ śreṣṭhaṃ na hīnādvijayo raṇe //
viṣṇoḥ karavinaṣṭānāṃ bhūyo rājyaṃ bhaviṣyati

mārkaṇḍeya uvāca //
ityevamuktastvasurādhipena bhṛgupradhāno bhagavān sa śukraḥ //
jñātvā sa daityānsakalānvinaṣṭāñjagāma kāṣṭhāmaparāmabhīṣṭām

iti śrīviṣṇudharmottare prathamakhaṇḍe mārkaṇḍeyavajra saṃvāde śukrasālvasaṃvādo nāmā'ṣṭātriṃśattamo'dhyāyaḥ