Vishnudharmottara Purana · Chapter 1.39

mārkaṇḍeya uvāca //
evamuktvā gate śukre gaviṣṭho vākyamabravīt //
rājañchukrasya vacanaṃ kriyatāmavicārayan

svapnā hi sumahāghorā dṛśyante bhayavardhanāḥ /'
bhavatāṃ hi vināśāya rātryante satataṃ vibho

bhavānsvapne mayā dṛṣṭo rakta sraganulepanaḥ //
uṣṭreṇa śiśumāreṇa varāheṇa tathā vrajan

tailāktāścāpare daityāḥ kharayānamupāśritāḥ //
patantaḥ parvatā dṛṣṭā rājam̐ste bhayakāraṇam

kecitkṛṣṇāṃbaradharāḥ kecitkṛsarabhojinaḥ//
kecitpaṅkagatā dṛṣṭāḥ kecidbhasmaśayā gatāḥ

kecidvivastrayā nāryā kṛṣyante dakṣiṇāṃ diśam //
kācidraktāmbarā nārī nīyate dakṣiṇāṃ diśam

kecinnṛtyanti bhūpālā hasanti ca tathā'pare //
kecinmuṇḍā mayā dṛṣṭāḥ kecitkāṣāyavāsasaḥ

caṇḍālaskandhagāḥ kecitkecitkiṃśukasaṃsthitāḥ //
gajāśvapattisainyena sarveṇa ca bhavānyutaḥ

vāpīṃ sukaluṣāṃ prāpya nimagno gomaye hrade //
rājaśrīśca mayā dṛṣṭā śakrāliṅganatatparā

tasya me rocate sandhistava śakreṇa pārthiva //
prāṇānrakṣata bho rājañjīvanbhadrāṇyupāśnute

sālva uvāca //
yadaiva bhagavānviṣṇuḥ śrutaḥ śatrurmayā'nagha //
tatraiva deva tacchrutvā rājyaṃ tyaktaṃ tathā mayā

iṣṭaṃ yajñaistapastaptaṃ rājyaṃ kṛtamakaṇṭakam //
mūrdhni sthitamamitrāṇāṃ suhṛdaḥ paripālitāḥ

dhṛto bhṛtyajanaḥ sarvaḥ kṛtakṛtyāstato vayam //
govindānmaraṇaṃ prāpya bhūyo rājyaṃ bhaviṣyati

mārkaṇḍeya uvāca //
ityeva vākyaṃ tu niśamya rājño mene tadāyuktatamaṃ gaviṣṭhaḥ //
tūṣṇīṃ babhūvā'tha suniścitātmā mene ca daityānsamare vinaṣṭān

iti śrīviṣṇudharmottare prathamakhaṇḍe mārkaṇḍeyavajrasaṃvāde svapnādhyāyo nāmaikonacatvāriṃśattamo'dhyāyaḥ