Vishnudharmottara Purana · Chapter 1.35

mārkaṇḍeya uvāca //
evamuktā satyavatī kāle pūrṇe dvijottamam //
janayāmāsa dharmajñaṃ jamadagniṃ tapodhanam

tataśca janayāmāsa vātsyaṃ bhṛgukulodvaham //
tatoṣṭanavatiṃ putrāngotrakārānpṛthakpṛthak

gādherapi tadā bhāryā janayāmāsa putrakam //
viśvāmitramiti khyātaṃ yutaṃ brāhmaṇatejasā

jito yuddhe vasiṣṭhena manyunā yaḥ sa pārthivaḥ //
brāhmaṇyaṃ tapasā lebhe dharmātmā saṃśitavrataḥ

rājā prasenajinnāma sutāṃ tasyā'tha reṇukām //
patnyarthe pratijagrāha jamadagnirmahātapāḥ

sā taṃ vanagataṃ bhaktyā nityaṃ paryacaradvane //
kadācidatha gharmartau madhyaṃ prāpte divākare //

krīḍārthaṃ prāsyati ciraṃ jamadagnirmahātapāḥ //
kṣiptāḥkṣiptāḥ śarāstena reṇukā cārulocanā

ānayāmāsa dharmajñā bharturvacanakāriṇī //
athā'rkatāpasaṃtaptā dahyamānāṃghripaṅkajā

puṣpitasya ca vṛkṣasya chāyāmāsādya viṣṭhitā //
viśramya tu muhūrtaṃ sā bharturninye śarottamam

tāṃ prāptāṃ kupito bhartā jamadagnirabhāṣata //
krīḍato me śarairbhadre vighnaṃ kiṃ kṛtavatyasi //१ ०//
na bibheṣi ca māṃ bhadre tvatha vāpyavamanyase

reṇukovāca //
arkāgnitāpasaṃtaptā kṣaṇamātraṃ mahāvrata //
apārayaṃtī viśrānto tasmāttvaṃ kṣantumarhasi

// mārkaṇḍeya uvāca // //
reṇukāyā vacaḥ śrutvā jamadagnirmahātapāḥ //
jātaroṣastadā sūrye sāyakānkṣeptumudyataḥ

etasminneva kāle tu viprarūpo divākaraḥ //
śīghramāgamya tejasvī jamadagnimabhāṣata

sūrya uvāca // //
svabhāva eṣa me brahman yadahaṃ dahanātmakaḥ //
vartataśca svabhāvena na me tvaṃ kroddhumarhasi

putraste'haṃ bhaviṣyāmi tvasyāmeva dvijottama //
surakāryaṃ kariṣyāmi lokānāñca hitaṃ mahat

iyañca patnī dharmajñā reṇukā tava sāṃpratam //
chatropānahametanme gṛhṇātu varavarṇinī

tasyā'nukampayā chatraṃ tathā brahmanmupānahau //
mayā sṛṣṭau jagatyasminnityameva bhaviṣyataḥ

chatropānahayordānaṃ loke śreṣṭhaṃ bhaviṣyati//
chatropānahadānena naraḥ svargaṃ gamiṣyati

evamuktastu sūryeṇa jamadagnirmahātapāḥ //
saṃpūjya sūryaṃ jagrāha savituḥ sakalaṃ vacaḥ

tataḥ sūrye gate devī sūryaputrā purā satī //
putraṃ kanīyasaṃ rāmaṃ janayāmāsa reṇukā //
tamanvāvasuṣeṇaśca vasurviśvāvasustathā

teṣāṃ jaghanyajo rāmo viṣṇurmānuṣarūpadhṛk

aṃśena jāte bhuvi devadeve sunirvṛtā bhūmiratho babhūva //
hṛtāñca mene ditijaprajātāṃ pīḍāṃ nṛṇāṃ svasya ca sā dharitrī

iti śrīviṣṇudharmottare prathamakhaṇḍe mārkaṇḍeyavajrasaṃvāde rāmotpattirnāma pañcatriṃśattamo'dhyāyaḥ