Vishnudharmottara Purana · Chapter 1.34

ṛcīka uvāca //
brahmaṇo'triḥ sutaḥ saumyaḥ sutastasyā'pi candramāḥ //
somasya tu budhaḥ putro budhaputraḥ purūravāḥ

śrutāyustanayastasya putrastasyāpi nagnajit //
tasyā'pi kāñcanaḥ putraḥ suhotrastasya cā''tmajaḥ

tasya jahnuḥ smṛtaḥ śrīmānyena gaṅgā tu jāhnavī //
suvratastanayastasya cālarkastasya cātmajaḥ

tasya putro balākaśca kuśikastasya cā''tmajaḥ //
mahodayapuravare sa tu nityaṃ kṛtālayaḥ

etasminneva kāle tu śvasuraḥ cyavanastava //
svavaṃśasaṃkaraṃ buddhvā kuśikebhyo mahāyaśāḥ

kuśikānāṃ samucchityai kuśikaṃ nṛpatiṃ yayau //
pūjitaḥ kuśikenāpi kuśikaṃ vākyamabravīt

rājanvakṣyāmi kāryaṃ te yadi śuśrūṣasenagha //
sabhāryeṇa ca kartavyaṃ rājañchuśrūṣaṇaṃ tvayā

kuśika uvāca //
svamevedaṃ tava gṛhaṃ yatheṣṭaṃ vasa bhārgava//
śaktitastava śuśrūṣāṃ kariṣye bhāryayā saha

ṛcīka uvāca//
gṛhoṣitaṃ taṃ cyavanaṃ śuśrūṣuranahaṃkṛtaḥ //
pūjayāmāsa satataṃ sarvakāmasamṛddhibhiḥ

bahusaṃkhyāndinagaṇāṃścyavano nāvabuddhyati //
nirāhāraḥ sabhāryastaṃ paryupāste mahīpatiḥ

akāle prāśayatyannaṃ kadācidapi dularbham //
kṛtamityeva tadrājā nivedayati satvaram

kadācidbahu bhuṅktennaṃ na bhuṅkte divasānbahūn //
dhanena ca tadīyena tarpayāmāsa vai dvijān

kadāciddīpayatyeva vahniṃ tātagṛhodbhavam //
kadācicca rathe yuktaṃ sabhāryo rājapuṅgavam

rājamārge pratodena tudanyati yathecchayā//
tasyā'sau hitamevedaṃ karmaṇā manasā girā

samācarati yatnena bhārgavapriyakāmyayā //
yadā na vṛjinaṃ kiṃciddṛṣṭavāṃstasya bhārgava

tadā tasya varaṃ prādādvaraṃ yanmanasepsitam

cyavana uvāca //
vara varaya bhadraṃ te prasanno'haṃ tavānagha //
nirvyājaṃ te'nayā rājassevayā'naghayā sadā

kuśika uvāca //
yadi me tvaṃ prasanno'si bhṛgūṇāṃ vaṃśavardhana //
vaṃśo brāhmaṇatāṃ yātu varametadvṛṇomyaham

cyavana uvāca //
etadeva dhruvaṃ bhāvī nanmāṃ varayase nṛpa //
asmadvaṃśānuvaṃśasya brāhmaṇyaṃ te bhaviṣyati

tava vaṃśakṛto'smākaṃ kṣatradharmmo dvijottamaḥ//
bhaviṣyati narendrendra caitatsuviditaṃ mama

etajjñātvā samutsedhaṃ cikīrṣuḥ svakulasya te //
vikāraiḥ krodhanārthaṃ te gṛhe'hamavasaṃ ciram

vikāraṃ na tato dṛṣṭaṃ mayā bhāvyarthacoditam //
tasmānmātusvayā prāptaṃ varametatsudurlabham

kuśāsyanāmā putrastu bhavitā'ti svadhārmikaḥ //
tasyāpi bhavitā putro gādhirityeva viśrutaḥ

viśvāmitraḥ sutastasya brāhmaṇyamupalapsyati //
kṛtvā vairaṃ vasiṣṭhena tapasā mahatā nṛpa

strīṇāṃ caruviparyāsādviśvāmitrasya saṃbhavaḥ //
asmadvaṃśānubhavitā nirvṛtto bhava pārthiva

yatte vināśitaṃ dagdhaṃ bhavitā tadviśeṣavat //
bhāryayā sahitaścaiva jarāhīno bhaviṣyasi

evamuktvā gate vipre rājā pūrṇamanorathaḥ //
uvāca sumukhīṃ bhadre jarāśoka vivarjitām

etatsunetre cyavasya vākyaṃ kasyā'sti śaktirbhuvi mānavasya //
kartuṃ mṛṣā tena varorumadhye pautrastavogro bhavitā nṛloke //

iti śrīviṣṇudharmottare prathamakhaṇḍe mārkaṇḍeyavajrasaṃvāde kuśikavarapradānaṃ nāma catustriṃśattamo'dhyāyaḥ