Vishnudharmottara Purana · Chapter 1.36

mārkaṃḍeya uvāca // //
atha bālyaṃ samuttīrṇo rāmo bhṛgukulodvahaḥ //
śuśrūṣamāṇaḥ pitaraṃ nityamāste mahāyaśāḥ

etasminneva kāle tu rāme vanagate tadā //
ājagāma mahātejā rājā citrāṅgado vanam

vihartuṃ saha rāmābhirdevarājasamadyutiḥ //
taṃ dṛṣṭvā reṇukā cakre spṛhāṃ bhogeṣu bhāminī

jagāma manasā taṃ sā rājānaṃ kāmasannibham //
tasminneva kṣaṇe sā tu bhraṣṭā brāhmaṇatejasā

gataśriyaṃ tu tāṃ dṛṣṭvā jamadagnirmahātapāḥ //
putrānuvāca tānkrodhāddhanyatāṃ jananīṃ svakāṃ

te vicārya tataḥ sarve māturgauravamuttamam //
naiva cakruḥ piturvākyaṃ tāñchaśāpa sa bhārgavaḥ

yūyaṃ tiryaksadharmāṇo naṣṭasaṃjñā bhaviṣyatha //
idhmabhāramupādāya rāmo ratikaraḥ pituḥ //

athā''śramamanuprāptaḥ pitā taṃ samacodayat //
jahīmāṃ mātaraṃ kṣudrāṃ rāma mā tvaṃ ciraṃ kṛthāḥ

evamuktaḥ sa pitrā tu tadvākya samanantaram //
śiraściccheda tīkṣṇena rāmaḥ paraśunā tadā

tutoṣātha pitā tasya tato dharmabhṛtāṃ varaḥ // / १० //
jamadagniruvāca //
svacchandamaraṇaṃ putra tuṣṭe tvaṃ mayi lapsyase //
yāvacca vaiṣṇavaṃ tejastvayi tiṣṭhati putraka

tāvadaiva na te yuddhe kaścijjetā bhaviṣyati//
bhaviṣyati ca dharmātmā rāmo daśarathātmajaḥ //
raghuvaṃśe samutpanno viṣṇurmānuṣarūpadhṛk

yadā sameṣyate tena tadā vaiṣṇavatejasā //
kṛtakarmā vimuktastvaṃ sa ca yukto bhaviṣyati

tataḥ paraṃ tvayā putra na kāryaṃ śastradhāraṇam //
ārtatrāṇamṛte vīra strībrāhmaṇakṛte'tha vā //
yathepsitaṃ cā'pyaparaṃ varaṃ varaya putraka

rāma uvāca //
guruśreṣṭha samutthānaṃ jananyāḥ kathayāmyaham //
asmṛtiñca tathā tasyāṃ bhrātṝṇāñca tathā 'smṛtim

jamadagniruvāca //
evamastu mahābhāga tapasā mahatā tathā //
samārādhaya deveśaṃ śaṅkaraṃ nīlalohitam

mārkaṇḍeya uvāca //
evamukte samuttasthau reṇukā cāruhāsinī //
rāmasya bhrātaraḥ sarve muktaśāpāstathaiva te

pitrā rāmastathoktastu himavatyacalottame //
tapastepe mahātejā rudrārādhanakāmyayā

etasminneva kāle tu devāḥ sendrapurogamāḥ //
saiṃhikeyabhayatrastāḥ śaṅkaraṃ śaraṇaṃ gatāḥ

// devā ūcuḥ // //
bhagavan devadeveśa praṇatārtivināśana //
saiṃhikeyairvayaṃ sarvaiḥ sthānebhyastvavaropitāḥ

saiṃhikeyānathā''śritya daityāḥ śatasahasraśaḥ //
sarve vasanti satataṃ teṣāṃ yatnaṃ vadhe kuru

// mahādeva uvāca // //
śṛṇvantu devatāḥ sarvā dānavā devakaṇṭakāḥ //
rāmeṇā''haṃ vadhiṣyāmi narabuddhyā yatastu tān

mārkaṇḍeya uvāca //
gateṣu devasaṃgheṣu devadevaḥ pinākabhṛt //
āhūya bhārgavaṃ rāmamidaṃ vacanamabravīt

mahādeva uvāca //
saiṃhikeyāndurācārānasurāñjahi putraka //
samarthastānbhavānhantuṃ nā'nyaḥ kaścana vidyate

rāma uvāca //
astragrāmaṃ samagraṃ me prayaccha bhagasūdana //
yena tānsudurācārānghātayiṣyāmi dānavān

mahādeva uvāca //
kiṃ tavāstrairbhūguśreṣṭha viṣṇustvaṃ nāsi mānuṣaḥ //
vyastrasyā'pi na te śaktā yoddhuṃ pramukhatastava

rāma uvāca //
ghātayiṣyāmyahaṃ sarvānsaiṃhikeyāndurāsadān //
tripurāre mahābhāga tvadājñāparibṛṃhitaḥ

mārkaṇḍeya uvāca //
ityevamuktastripurāntakena rāmastrinetrapratima prabhāvaḥ //
ādāya tīkṣṇaṃ paraśuṃ jagāma yatra sthitāste ca ripupradhānāḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde rāmasya maheśvarādeśo nāma ṣaṭtriṃśattamo'dhyāyaḥ