Vishnudharmottara Purana · Chapter 1.33

// mārkaṇḍeya uvāca // //
aurvasya bhāryā dharmajñā nāmnā satyavatī śubhā //
vane paryacaradbhaktyā gādhijā bhṛgunandanam

tasyā paramayā bhaktyā bhartā toṣamupāgataḥ //
uvāca tāṃ varārohāmṛcīko bhṛgunandanaḥ

// ṛcīka uvāca // //
varaṃ varaya suśroṇi yatte manasi vartate //
toṣito'haṃ tvayā bhadre vane śuśrūṣayā vada

satyavatyuvāca //
mātuḥ prayaccha me putraṃ bhagavanvīryavattaram//
putraṃ mama ca dharmajñaṃ yutaṃ brāhmaṇatejasā

ṛcīka uvāca //
carudvayaṃ kariṣyāmi māturarthe tathā tava //
yasya saṃprāśanātputraṃ tvaṃ caiva janayiṣyasi

mārkaṇḍeya uvāca //
evamuktvā tadā cakre ṛcīkastu carudvayam //
ekasminsakalaṃ kṣātraṃ tejaścakre savaiṣṇavam

śvaśrvarthe taṃ caruṃ kṛtvā dvitīye sa nyaveśayat //
brāhmaṃ raudrañca yattejaḥ patnyarthe kṛtavāñcarum

ṛcīka uvāca //
ayaṃ prāśyastvayā bhadre tvayaṃ mātrā carustava //
aśvatthāliṅganaṃ kāryaṃ mātrā tatra tadā śubhe

/
tathaivaudumbarasyā'pi tvayā rājīvalocane

mārkaṇḍeya uvāca //
evamuktā tato gatvā mātre sarvaṃ nyavedayat

tatastāmabravīnmātā gādheḥ patnī yaśasvinī //
dhruvaṃ bhagavatā putrastava putracikīrṣayā

śreṣṭhena tejasā yuktaścarureṣa kṛtaḥ śubhe //
tasmāccaruviparyāsaṃ madarthe kuru mā ciram

aliṅgane viparyāsaṃ drumayoḥ kriyatāṃ tathā //
sā māturvacanaṃ sarvaṃ cakre gauravayantritā

sagarbhāṃ sa gate kāle bhartā vacanamabravīt

ṛcīka uvāca //
dhruvaṃ caruviparyāso drumayośca tvayā kṛtam //
yena tvamasitāpāṅgi yuktā kṣatriyatejasā

brāhmeṇa tejasā yuktaṃ kṛtavānasmi te carum //
mātuste cārusarvāṃgi tathā kṣattriyatejasā

kṛtaṃ caruviparyāsaṃ sā vipraṃ janayiṣyati //
kṣatradharmarataṃ putraṃ vipraṃ tvaṃ janayiṣyasi

satyavatyuvāca// māturmatātkṛtamidaṃ bhagavankṣantumarhasi //
kṣatradharmarataḥ putro na me bhavitumarhati //

ṛcīka uvāca //
evamastu na te putraḥ kṣatradharmā bhaviṣyati //
pautrastvavaśyaṃ bhavitā bhāvyarthavidhicoditaḥ

satyavatyuvāca //
sarveśvaratvaṃ bhagavankimarthaṃ pautrasya me kṣatriyabhāvamugram//
nivartituṃ necchasi mātulena vadasva tanme yadi te na guhyam

iti śrīviṣṇudharmottare prathamakhaṇḍe mārkaṇḍeyavajrasaṃvāde caruviparyāso nāma trayastriṃśattamo'dhyāyaḥ