Vishnudharmottara Purana · Chapter 1.30

// mārkaṇḍeya uvāca //
sa dadarśa tato gatvā vipulaṃ sūryamaṇḍalam //
candramaṇḍalamānena mānaṃ yasya ca saṃskṛtam

yattatprajvalitaṃ piṇḍaṃ piṇḍitasya vibhāvasoḥ //
devadevasya yaddhāma vāsudevasya dhīmataḥ

tasya dharmaḥ paraṃ piṇḍaṃ brahmāṇḍāntaradīpanam //
āgāraṃ sarvabhūtānāṃ jaṭharasthaṃ hutāśanam

pañcadhā'vasthitaṃ dehe sarveṣāṃ prāṇināṃ smṛtaḥ //
ālocakaḥ pācakaśca rocako gañjakastathā

bhrājakaśca tathā devaḥ sarveṣāṃ prāṇināṃ tathā //
yanmayaṃ dehināṃ cakṣuryaścakṣurdakṣiṇastathā

sa vai devātidevasya vāsudevasya kīrtitaḥ //
agnau prāstāhutiḥ samyaṅnityaṃ yatropatiṣṭhate

yasya dattaṃ sadā tejaḥ sarveṣāmeva tejasā //
yasmādambudharotpattiryasmādvarṣaṇasambhavaḥ

yasmātpravartate sarvaṃ kālacakraṃ tathaiva ca //
auṣadhīnāṃ paraḥ pākaḥ paraṃ yasmānna vidyate

tanmaṇḍalamathāsādya kṛtvā rūpaṃ tu taijasam //
viveśa maṇḍalaṃ bhittvā tanmadhyaṃ śaṅkarastadā

so'ṅguṣṭhamātraṃ puruṣaṃ dṛkśaktimiva veṣṭitam //
taijasaṃ dṛṣṭavān rudraḥ tuṣṭāva ca mahādyutiḥ

rudra uvāca //
tvāṃ namasyāmi deveśa tejasāṃ tu paraṃ nidhim //
ārādhyastvaṃ vareṇyastvaṃ sarvabhūtabhavodbhavaḥ

svargadvāraṃ prajādvāraṃ mokṣadvāraṃ tathā bhavān//
anantaścāprameyastvaṃ sūkṣmātsūkṣmatarastathā

mayā samarpitaṃ tejaḥ sakalaṃ tvayi bhāskara //
mattastvaṃ na hi bhinno'si na ca devājjanārdanāt

ahaṃ viṣṇurbhavān viṣṇurbrahmā viṣṇuḥ prabhākara //
asmākaṃ sakalaṃ dhāma tvayi tiṣṭhati bhāskara

dhāmakāryaṃ hi kriyate yenāsya jagataḥ sadā //
prajānāṃ tu prasavanātsaviteti nigadyase

rasānāñca tathā dānādravirityabhidhīyase //
ādityastvaṃ tathā dānānmitrastvaṃ maitrabhāvataḥ

puṣṇāsi sakalām̐llokāṃstena pūṣā nigadyase //
dhāraṇācca tathā dhātā yamanādaryamā tathā

aṃśustvamaṃśudhāritvādvisargādvaruṇastathā //
bhavaḥ saubhāgyavācyatvāttvaṣṭā sarvakriyākṛteḥ

sarvajantusamatvācca vivasvānabhidhīyate //
kramaṇācca tathā viṣṇurīśatvādindra ucyate

tasmāttvayā prajākāryaṃ kartavyamavicāritam //
sthāvarairjaṃgamasthairvā bhūmirbhārābhipīḍitā

kadācijaṅgamairbhūmiḥ sūryabhāreṇapīḍitā //
kadācitsthāvarairadya bhāradvitayapīḍitā

arjune nṛpatau vṛddhiḥ parā bhāskara śākhinām //
daityāḥ kṣattriyatāṃ prāpya pīḍayanti ca medinīm

sūrya uvāca //
tava darśanakāmena prāgeva na kṛtā mayā //
sthāvarairjaṅgamaiḥ sarvāṃ prakṛtisthāṃ vasundharām

yathā pūrvaṃ tathā'dyāhaṃ kariṣyāmi maheśvara //
sāmprataṃ brāhmaṇo bhūtvā cārjuneneva pādapān

sarvānvināśayiṣyāmi śāsanena tathārjunam //
vasiṣṭhādyojayiṣyāmi tatoṃśena vasundharām

bhṛguvaṃśe kariṣyāmi tato niḥkṣattriyāṃ prajām //
mārkaṇḍeya uvāca //
ityevamuktastripurāntakārī sūryeṇa sadraśmivirājitena //
jagāma dhāma svamasau bibheti yatsarvalokāñjagatāṃ pradhānaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde ādityadarśanaṃ nāma triṃśattamo'dhyāyaḥ