Vishnudharmottara Purana · Chapter 1.29

mārkaṇḍeya uvāca //
gate sureśvare deve śakre ca sapurohite //
jagatyāñca prayātāyāṃ devadevo maheśvaraḥ

aṅguṣṭhamātrako bhūtvā gaṅgātoye nyamajjata //
so'vagāhya svalokasthāṃ gaṅgāṃ sarvagatāṃ nadīm

tayohyamānaḥ prayayau vistīrṇaṃ candramaṇḍalam //
navayojanasāhasro viṣkambho yasya kīrtitaḥ

vistārāddviguṇaścaiva pariṇāhaḥ samantataḥ //
toyasāramayaṃ piṇḍa pitṝṇāṃ dhāmamadhyagam

prajānāṃ bhāvanaṃ sarvaṃ cādhāraṃ jagatāmapi //
śarīriṇāṃ śaroreṣu rasaṃ pañcātmakaṃ smṛtam

ālambakaṃ kledakaṃ ca tathā caivāvabodhakam //
saṃghātakaṃ tarpakañca dehināṃ dehagocaram

manaḥsarvendriyāṇāñca sarveṣāṃ nāthakaṃ tathā //
oṣadhīśaṃ jagadyonimamṛtādhāramavyayam

yaṃ pibanti sadā devāḥ pitaraścāmṛtārthinaḥ //
yaścakṣurdevadevasya viṣṇorvā sa prakīrtitaḥ

havyakavyāśano devo bhūtātmā bhūtabhāvanaḥ //
praviśya maṇḍalaṃ tasya devadevo maheśvaraḥ /////
tasya yadvyāpakaṃ tejaḥ sūkṣmamannarasaṃ hi tam //
aṅguṣṭhamātraṃ puruṣaṃ yaṃ budhāḥ ke śivaṃ viduḥ

cakṣurgolakamadhyasthā dṛkśaktiriva yaḥ sthitaḥ //
candragolakamadhyasthaḥ puruṣaḥ sa paraḥ smṛtaḥ

karmasākṣī sa lokānāṃ sa cādhāraḥ paraḥ smṛtaḥ //
ādityaraśmayaścaṃdre tamaḥsaṃmūrcchitaṃ kṣitau

kṣapayiṣyaṃti yannaiśaṃ śītāṃśustasya tejasī //
yasya rūpamanirdeśyaṃ yasya tejaḥ suduḥsaham

taṃ tu devavaraṃ dṛṣṭvā tuṣṭāva tripurāntakaḥ //
īśvara uvāca //
agnīṣomamayaṃ caitajjagadetatprakīrtitam //
agnīṣomau jagannāthau devadevo janārdanaḥ

tasyāgneyī tanuryā ca so'haṃ sa ca divākaraḥ //
saumyā tu yā tanustasya sa bhavān sa pitāmahaḥ

tvayedaṃ dhāryate sarvaṃ nānyatpaśyāmi kāraṇam //
tvadbimbe nirmale pṛthvī saśailavanakānanā १///
śaśākṛtiḥ sadā dṛśyā śaśalakṣmā'si cānagha //
tenaiva kāraṇena tvamucyase mṛgalāñchanaḥ

śaśī śaśatvasaṃbandhātsaumyatvātsoma ucyate //
śītāṃśutvācca śītāṃśuḥ niśeśe tvadvirājanāt

nakṣatranāthastatsvāmyādrājatvāttvaṃ dvijeśvaraḥ //
vasanti te pitṛgaṇāḥ pitṛnāthastato bhavān

bahvarthaścandra ityeṣa dhāturukto manīṣibhiḥ //
śuklatve hyamṛtatve ca śītatve hrādane'pi ca

tena te candratākhyātā satataṃ dharmavatsala! //
sarve cāhlādamāyanti dṛṣṭe tvayi mahādyute

prajākāryaṃ tvadāyattaṃ tatkuruṣva jagatprabho //
dattātreyatvamāsādya tvayā dattavaro nṛpaḥ

kārtavīryārjuno nāma dānavāstamupāśritāḥ //
sarve kṣattriyatāṃ prāpya tadvadhe yatnavān bhava

tvayā dattavaraṃ hantuṃ nānyaḥ śaknoti kaścana//
avaśyaṃ ca tvayā kāryaṃ devakāryaṃ sadā vibho

mārkaṇḍeya uvāca //
śaṃkareṇaivamuktastu pratipūjya ca śaṃkaram //
uvāca devadeveśaṃ praṇatārtiharaṃ haram

candra uvāca //
iyaṃ śaṅkara saumyā me tanuḥ suvihitā tava //
tasmādarkasthitāṃ gaccha sā te kāmaṃ kariṣyati

mārkaṇḍeya uvāca //
ityevamuktastripurāntakārī somena rājñā parameśvareṇa //
saṃpūjya devaṃ prayayau sa śīghraṃ tejomayaṃ maṃḍalamāśu rājan

iti śrīviṣṇudharmottare prathamakhaṇḍe mārkaṇḍeyavajrasaṃvāde candramaṇḍaladarśanaṃ nāmaikonatriṃśattamo'dhyāyaḥ