Vishnudharmottara Purana · Chapter 1.31

mārkaṇḍeya uvāca //
dvijarūpamathāsthāya devadevo'pi bhāskaraḥ //
māhiṣmatīṃ yayau śīghraṃ nagarīṃ ratnamālinīm///
sa tatra dadṛkṣe vīraṃ kārtavīryārjunaṃ nṛpam //
yajamānaṃ sudordaṇḍaṃ kalpavṛkṣamivāparam

pūjitaḥ kṛtavīryeṇa brāhmaṇo nṛpamabravīt

brāhmaṇa uvāca //
mahāśanaṃ māṃ jānīhi brāhmaṇaṃ kṣudhayārditam //
prayaccha tasya me tṛptiṃ tvameko haihayottama

arjuna uvāca //
kenā'nnena bhavattṛptiḥ kimannaṃ vidadhāmi ta //
tanmamā''cakṣva bhagavan succhaṃdenaiva mā ciram

brāhmaṇa uvāca //
ādityaṃ māṃ vijānīhi sthāvarānbhoktumudyatam //
prayaccha tāni sarvāṇi mama pārthivapuṃgava

arjuna uvāca //
sthāvaraṃ bhūgataṃ dātuṃ śaktirnā'sti mamā'nagha //
kathaṃ hi sthāvarā dagdhuṃ śakyā mānuṣyatejasā

āditya uvāca //
rathasthaḥ pārthivaśreṣṭha śarānmuṃca yadṛcchayā //
teṣvahaṃ prajvalanrājanbhakṣayiṣyāmi pādapān

tāvadeva tvayā kāryaṃ nṛpate śaramokṣaṇam //
yāvanna prajvaliṣyāmi mukteṣvapi śareṣvaham

mārkaṇḍeya uvāca //
evamuktvā gate sūrye kalpayitvā rathottamam //
cikṣepa sa śarānrājā yatra tatra drumotkaram //1.31.१ ०//
te kṣiptā haihayeśena śātakauṃbhojjvalāḥ śarāḥ //
jajvalannṛpaśārdūla jvalayaṃto vane drumān //१ १//
duṃdubhisvananirghoṣo visphuliṃgagaṇākulaḥ //
ālolārcirmahāvegaḥ sarvasattvabhayaṃkaraḥ

nirdahanvṛkṣapuṃjāni taptakāṃcanasuprabhaḥ //
jvālāmālī tadā bhāti sarvataḥ pāvakaḥ kṣitau

vaneṣu dahyamāneṣu tāpatṛṣṇārditā mṛgāḥ //
jalāśayeṣu citreṣu gatacchāyāgnikeṣu ca

dadāhāgnistadā vṛkṣānyāvadicchā jagatpateḥ //
babhūvā'tha praśāṃtārciḥ kṛtvā laghvīṃ vasuṃdharām

na jajvāla tathā vahniḥ kārtavīryaśareṣvapi //
kṛtakāryaṃ tadā gatvā kārtavīryo divākaram

vinivṛtya rathaṃ paścādyāvanmāhiṣmatīṃ purīm //
sa gacchanneva dadṛśe vasiṣṭhaṃ sarvatejasam

tena śapto vane dagdhe svakīye nṛpapuṅgavaḥ //
yasmāttvayā vanaṃ dagdhaṃ mama pārthivaśāsana!

tasmācecchidyate bāhūn brāhmaṇaḥ śaṃsitavrataḥ //
tena śāpena viprasya rāmaḥ kṣatriyanandanaḥ

tasya bāhuvanaṃ sarvaṃ ciccheda bhṛgunandanaḥ

vajra uvāca //
rāmastu kasminsa babhūva vaṃśe kathañca rājñastu mahābalasya //
ciccheda dordaṇḍavanaṃ nṛvīraḥ sarvaṃ mamā''cakṣva bhṛgupradhāna

iti śrīviṣṇudharmottare prathamakhaṇḍe mārkaṇḍeyavajrasaṃvāde vanadāho nāmaikatriṃśattamo'dhyāyaḥ