Vishnudharmottara Purana · Chapter 1.27

// mārkaṇḍeya uvāca // //
te sametāḥ samāsādya pitāmahasabhāṃ śubhām //
padmāsanagataṃ tatra dadṛśuḥ padmasambhavam

padmapatrasavarṇāṃgaṃ padmabodhasamaprabham //
caturvaktraṃ caturvedaṃ caturāśramapūjitam

cāturvarṇyadharaṃ devaṃ cāturhotrapravartakam //
kṛṣṇājinadharaṃ śāntaṃ prabhuṃ prabhavatāmapi

svayaṃbhuvamacintyaṃ ca sargasaṃhārakārakam //
taṃ samāsādya jagatī śakraśca guruṇā saha

vavanduste mahābhāgaṃ tuṣṭuvuśca jagatprabhum //
śakrādaya ūcuḥ //
namaste devadeveśa sṛṣṭisaṃhārakāraṇa! //
vedamūrte tadādhāra yajña yajñāṃga yajñapa

yajñayone jagadyone sarvasattvābhayaprada //
prajāpatipate deva jagadbīja namo'stu te

svayambhuve svayaṃ kartre sarvabhūtāntarātmane //
sarvabhūtavareṇyāya sarvabhūteśvarāya ca

acintyāyā'prameyāya prakāśāya mahātmane //
tvamasya jagato nāthastvayi sarvaṃ pratiṣṭhitam

tvayā vinā jagatyasminnānyatkiñcana vidyate //
indriyāṇīndriyārthāśca tebhyaḥ parataraśca yat

vyaktāvyakto jagannātha tvamevaikaḥ prakīrtitaḥ //
tvaṃ tapāṃsi variṣṭhāni kṛcchrāṇi niyamāni ca

kalāḥ kāṣṭhā muhūrtāśca kālasyāvayavāśca ye //
kālacakraṃ jagaccakraṃ tvamekaḥ puruṣottamaḥ/

tvameva varado dātā devaḥ śubhacaturmukhaḥ //
tvattaḥ prasūtau loke'smindharmarudrau jagatpate

bhṛgvaṃgirā marīcistu pulastyaḥ pulahaḥ kratuḥ //
atriścaiva vaśiṣṭhaśca tvayā sṛṣṭā jagatpate

sanatkumāro bhagavānsanakaśca sanandanaḥ //
ākṛtiśca ruciḥ śraddhā tvayā deva vinirmitā

pūrvātte vadanājjātamṛgvedamamṛtaprabham //
dakṣiṇādvadanājjātaṃ yajurvedaṃ tathaiva ca

paścimādvadanājjātaṃ sāmavedaṃ tathā tava //
uttarādvadanājjātamatharvāgirasaṃ śubham

brāhmaṇāste mukhājjātā bāhubhyāṃ kṣattriyāstathā //
ūrudvayāttathā vaiśyāḥ padbhyāṃ śūdrāstathaiva ca

vidyuto'śanimeghāśca rohitendradhanūṃṣi ca //
tvattaḥ prabho prasūtāni praviśanti tathā tvayi

svayambhūrbhagavānviṣṇurdevadevaḥ sanātanaḥ //
nāmamātravibhedena mohayasyakhilaṃ jagat

tvattejasā mayā daityā ye yuddhe vinipātitāḥ //
te kṣitau kṣattriyā jātāḥ pīḍayanti tathā kṣamām

teṣāṃ bhāreṇa khinneyaṃ tvatsakāśamupāgatā //
vasudhā vasudhāpāla tāṃ trāyasva namo'stu te

mārkaṇḍeya uvāca //
evaṃ pitāmaho devaḥ stutaḥ śakreṇa dhīmatā //
guruṇā ca sametena pūjayāmāsa tāvubhau

pūjayitvā ca vasudhāṃ śakraṃ vacanamabravīt //
vrajadhvaṃ devadevasya śaṅkarasya mahātmanaḥ

bhuvaścikīrṣitaṃ sarvaṃ nivedayata mā ciram //
upāyaṃ kṣatriyavadhe yuṣmākaṃ kathayiṣyati

ityevamuktāstu pitāmahena jagmustadā rudrasadaḥ pratītāḥ //
śakro'tha devī ca vasundharā ca guruḥ surāṇāñca sa dharmaśīlaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde brahmalokagamanaṃ nāma saptaviṃśatitamo'dhyāyaḥ