Vishnudharmottara Purana · Chapter 1.26

mārkaṇḍeya uvāca //
nākapṛṣṭhagatā bhūmirdadarśa madhusūdanam //
ratnāsanagataṃ vīraṃ śriyā paramayā yutam

upāsyamānaṃ tridaśairbhāsayantaṃ sabhāṃ śubhām //
ādityairvasubhiḥ sādhyairviśvedevairmarudgaṇaiḥ

rudrairbhṛgvaṅgirobhiśca nāsatyaiśca mahātmabhiḥ //
ṛṣibhiḥ sūryasaṃkāśaistapasā dyotitaprabhaiḥ

gandharvairapsarobhiśca stūyamānaṃ sahasraśaḥ //
kirīṭottamasaṃcchannaṃ hārakeyūrabhūṣitam

ratnāṅgadakṛtoddyotaṃ ratnagarbhasamaprabham //
haricandana digdhāṃgaṃ nīlāmbaradharaṃ harim

tiryaglalāṭakenā'kṣṇā tṛtīyena virājitam //
paśyantaṃ sarvalokasya satataṃ dharmakarmaṇī

viṣṇoracintyamaṅgaṃ tattrailokyasyaiva kāraṇam //
gobrāhmaṇahitāsaktaṃ dadarśa vasudhā tadā

sandhyāsaha samāsīnaṃ śriyā caiva janārdanam //
taṃ vavande vasumatī daityabhārabharārditā

pādyārghyācamanīyādyaiḥ śakro'pi vasudhāṃ tadā //
pūjayitvā sukhāsīnāṃ papracchāgamanakriyām

pṛṣṭā śakreṇa sā devī vaktuṃ samupacakrame

pṛthivyuvāca //
antarikṣaṃ divaṃ yacca tathaivā'haṃ jagatpate //
tavāyattā mahābhāga tvaṃ hi deveśvaro vibhuḥ

tvayi bhāraṃ samāsajya vedābhyasanatatparaḥ //
sukhamāste praśāntātmā brahmā śubhacaturmukhaḥ

tvayi bhāraṃ samāsajya devadevo'pi śaṅkaraḥ //
āste tapasyabhirataḥ kailāse parvatottame

tvayi bhāraṃ samāsajya sukhaṃ svapiti keśavaḥ //
kṣīrodaśayane nityaṃ śeṣaparyaṅkamā sthitaḥ

pitāmahasya yattejaḥ keśavasya śivasya ca //
sthitaṃ tatsakalaṃ tubhyaṃ tvaṃ hi sarvamayo'rihā

tvayā vinihato vṛtro balaścāpi niṣūditaḥ //
tvayā ca nāśitaḥ pākastvayā daityā niṣūditāḥ

brahmaṇyastvaṃ śaraṇyastvaṃ praṇatārtivināśanaḥ //
sahasranayanaḥ śrīmānvajrapāṇirjagatpriyaḥ

tejasā tapasā yajñaiḥ śrutena ca damena ca //
tvatto viśiṣṭaṃ loke'sminna paśyāmi śacīpate

vedeṣu sarahasyeṣu gīyase tvaṃ punaḥpunaḥ //
vedāḥ pravṛttā yajñārthaṃ tadarthaṃ kratavastathā

ye hatā dānavā yuddhe tvayā śakra punaḥpunaḥ //
ta ime nṛṣu sambhūtāḥ kārtavīryaṃ samāśritāḥ

te'dya jātā mama vibho pīḍayanti ca māṃ bhṛśam //
sā'haṃ bhārasamākrāntā tvāmadya śaraṇaṃ gatā

// śakra uvāca //
jānāmi bhārakhinnāṃ tvāṃ daityebhyo varavarṇini //
teṣāṃ gatvā vadhopāyamahaṃ praṣṭāsmi vedhasam

mārkaṇḍeya uvāca //
ityevamuktvā tridaśapradhānaḥ pṛdhvīsameto guruṇā ca rājan //
yayau sabhāṃ devavarasya tasya pitāmahasyāpratimasya vīraḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde pṛthvīśakralokagamanaṃ nāma ṣaḍviṃśatitamo'dhyāyaḥ