Vishnudharmottara Purana · Chapter 1.28

mārkaṇḍeya uvāca //
rudralokamathāsādya dadṛśustryambakaṃ tadā //
vahnipuñjaprakāśena jaṭābhāreṇa rājitam

sūryabhāsā tṛtīyena nayanena ca śobhitam //
bhālacandreṇa śubhreṇa jaṭāmaṇḍalaśobhinā

vyālayajñopavītaśca nāgeśvarakṛtāṃśukam //
nīlakaṇṭhaṃ viśālākṣadanticarmottaracchadam//

umāsahāyaṃ varadaṃ sarvabhūtabhavodbhavam //
nandinānugataṃ vīraṃ pramathaiśca sahasraśaḥ

nānāvaktraśirogrīvairnānāyudhavibhūṣaṇaiḥ //
taṃ dṛṣṭvā praṇataḥ prāha śakrastu guruṇā saha

śakra uvāca //
namo'stu devadeveśa praṇatārtivināśana //
nīlakaṇṭha mahābhāga hyumābhūṣaṇatatpara

gaṅgātaraṅganirdhautajaṭāmaṇḍalamaṇḍita! //
śaśāṅkaśatasaṃkāśa sūryakoṭisamaprabha

vāmanairjaṭilairmuṇḍaiḥ pramathairīḍyase sadā //
taiśca sārdhaṃ mahādeva ramase'mitavikrama

ghoraṃ hi brahmacaryaṃ te yathā nānyasya kasyacit //
tava liṅgārcanaratāḥ pūyante sarvakilbiṣaiḥ

smaranti ye tvāṃ satataṃ te hi yānti parāṃ gatim //
viṣṇoracintyabhāgo'si prajāsaṃharaṇe kṛte

sarvadevamayo dhātā sarvadevamayo'pi ca //
sarvadevavareṇyastvaṃ sarvabhūtavibhāvanaḥ

sarvāmaragururdevaḥ sarvabhūteśvareśvaraḥ //
sarvadevo mahāyogī mahājayo mahābalaḥ

mahābuddhirmahāvīryo mahātejā mahāyaśāḥ//
catuṣpātsakalo dharmo vāhanaste mahāvṛṣaḥ

śmaśāne vasatirnityaṃ citādhūmasamākule //
nṛtyadbhūtākule bhūmerbhūtiśvetānulepanaḥ

bhūkhārkavarcaḥsalilayajamānenduvāyavaḥ //
mūrttayaste smṛtā deva yābhirvyāptamidaṃ jagat

tvayā vinā jagatyasminnānyatkiñcana vidyate //
daityabhārābhitaptāṅgāṃ pālayasva namo'stu te

mārkaṇḍeya uvāca //
evamuktastu śakreṇa devaḥ śakramabhāṣata //
kārtavīryamahaṃ tvājau kartā niḥkṣatriyāṃ mahīm

na śaktastridaśaśreṣṭha yataḥ smartāsmi tadvadham //
viṣṇudattavaro rājā so'vadhyo mama vāsava

tameva prārthayiṣyāmi vadhaṃ tasya mahātmanaḥ //
sarve yāta svakaṃ sthānaṃ tvahamapyamareśvaram

candramaṇḍalamadhyasthaṃ yāsye varadamīśvaram //
viṣṇuścārdhena bhāgena dattātreyo'bhavatkṣitau

tena dattavaro rājā pālayatyakhilāṃ mahīm

ityevamuktastridaśeśvarastu devena sākṣāttripurāntakena //
jagāma śīghraṃ svapuraṃ praviṣṭo mahīṃ samādāya guruñca rājan

iti śrīviṣṇudharmottare prathamakhaṇḍe mārkaṇḍeya vajrasaṃvāde haradarśanaṃ nāmāṣṭāviṃśatitamo'dhyāyaḥ