વિષ્ણુધર્મોત્તરપુરાણમ્ · અધ્યાય 1.27

॥ માર્કણ્ડેય ઉવાચ ॥ ॥
તે સમેતાઃ સમાસાદ્ય પિતામહસભાં શુભામ્ ॥
પદ્માસનગતં તત્ર દદૃશુઃ પદ્મસમ્ભવમ્

પદ્મપત્રસવર્ણાંગં પદ્મબોધસમપ્રભમ્ ॥
ચતુર્વક્ત્રં ચતુર્વેદં ચતુરાશ્રમપૂજિતમ્

ચાતુર્વર્ણ્યધરં દેવં ચાતુર્હોત્રપ્રવર્તકમ્ ॥
કૃષ્ણાજિનધરં શાન્તં પ્રભું પ્રભવતામપિ

સ્વયંભુવમચિન્ત્યં ચ સર્ગસંહારકારકમ્ ॥
તં સમાસાદ્ય જગતી શક્રશ્ચ ગુરુણા સહ

વવન્દુસ્તે મહાભાગં તુષ્ટુવુશ્ચ જગત્પ્રભુમ્ ॥
શક્રાદય ઊચુઃ ॥
નમસ્તે દેવદેવેશ સૃષ્ટિસંહારકારણ! ॥
વેદમૂર્તે તદાધાર યજ્ઞ યજ્ઞાંગ યજ્ઞપ

યજ્ઞયોને જગદ્યોને સર્વસત્ત્વાભયપ્રદ ॥
પ્રજાપતિપતે દેવ જગદ્બીજ નમોઽસ્તુ તે

સ્વયમ્ભુવે સ્વયં કર્ત્રે સર્વભૂતાન્તરાત્મને ॥
સર્વભૂતવરેણ્યાય સર્વભૂતેશ્વરાય ચ

અચિન્ત્યાયાઽપ્રમેયાય પ્રકાશાય મહાત્મને ॥
ત્વમસ્ય જગતો નાથસ્ત્વયિ સર્વં પ્રતિષ્ઠિતમ્

ત્વયા વિના જગત્યસ્મિન્નાન્યત્કિઞ્ચન વિદ્યતે ॥
ઇન્દ્રિયાણીન્દ્રિયાર્થાશ્ચ તેભ્યઃ પરતરશ્ચ યત્

વ્યક્તાવ્યક્તો જગન્નાથ ત્વમેવૈકઃ પ્રકીર્તિતઃ ॥
ત્વં તપાંસિ વરિષ્ઠાનિ કૃચ્છ્રાણિ નિયમાનિ ચ

કલાઃ કાષ્ઠા મુહૂર્તાશ્ચ કાલસ્યાવયવાશ્ચ યે ॥
કાલચક્રં જગચ્ચક્રં ત્વમેકઃ પુરુષોત્તમઃ।

ત્વમેવ વરદો દાતા દેવઃ શુભચતુર્મુખઃ ॥
ત્વત્તઃ પ્રસૂતૌ લોકેઽસ્મિન્ધર્મરુદ્રૌ જગત્પતે

ભૃગ્વંગિરા મરીચિસ્તુ પુલસ્ત્યઃ પુલહઃ ક્રતુઃ ॥
અત્રિશ્ચૈવ વશિષ્ઠશ્ચ ત્વયા સૃષ્ટા જગત્પતે

સનત્કુમારો ભગવાન્સનકશ્ચ સનન્દનઃ ॥
આકૃતિશ્ચ રુચિઃ શ્રદ્ધા ત્વયા દેવ વિનિર્મિતા

પૂર્વાત્તે વદનાજ્જાતમૃગ્વેદમમૃતપ્રભમ્ ॥
દક્ષિણાદ્વદનાજ્જાતં યજુર્વેદં તથૈવ ચ

પશ્ચિમાદ્વદનાજ્જાતં સામવેદં તથા તવ ॥
ઉત્તરાદ્વદનાજ્જાતમથર્વાગિરસં શુભમ્

બ્રાહ્મણાસ્તે મુખાજ્જાતા બાહુભ્યાં ક્ષત્ત્રિયાસ્તથા ॥
ઊરુદ્વયાત્તથા વૈશ્યાઃ પદ્ભ્યાં શૂદ્રાસ્તથૈવ ચ

વિદ્યુતોઽશનિમેઘાશ્ચ રોહિતેન્દ્રધનૂંષિ ચ ॥
ત્વત્તઃ પ્રભો પ્રસૂતાનિ પ્રવિશન્તિ તથા ત્વયિ

સ્વયમ્ભૂર્ભગવાન્વિષ્ણુર્દેવદેવઃ સનાતનઃ ॥
નામમાત્રવિભેદેન મોહયસ્યખિલં જગત્

ત્વત્તેજસા મયા દૈત્યા યે યુદ્ધે વિનિપાતિતાઃ ॥
તે ક્ષિતૌ ક્ષત્ત્રિયા જાતાઃ પીડયન્તિ તથા ક્ષમામ્

તેષાં ભારેણ ખિન્નેયં ત્વત્સકાશમુપાગતા ॥
વસુધા વસુધાપાલ તાં ત્રાયસ્વ નમોઽસ્તુ તે

માર્કણ્ડેય ઉવાચ ॥
એવં પિતામહો દેવઃ સ્તુતઃ શક્રેણ ધીમતા ॥
ગુરુણા ચ સમેતેન પૂજયામાસ તાવુભૌ

પૂજયિત્વા ચ વસુધાં શક્રં વચનમબ્રવીત્ ॥
વ્રજધ્વં દેવદેવસ્ય શઙ્કરસ્ય મહાત્મનઃ

ભુવશ્ચિકીર્ષિતં સર્વં નિવેદયત મા ચિરમ્ ॥
ઉપાયં ક્ષત્રિયવધે યુષ્માકં કથયિષ્યતિ

ઇત્યેવમુક્તાસ્તુ પિતામહેન જગ્મુસ્તદા રુદ્રસદઃ પ્રતીતાઃ ॥
શક્રોઽથ દેવી ચ વસુન્ધરા ચ ગુરુઃ સુરાણાઞ્ચ સ ધર્મશીલઃ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે બ્રહ્મલોકગમનં નામ સપ્તવિંશતિતમોઽધ્યાયઃ