વિષ્ણુધર્મોત્તરપુરાણમ્ · અધ્યાય 1.26

માર્કણ્ડેય ઉવાચ ॥
નાકપૃષ્ઠગતા ભૂમિર્દદર્શ મધુસૂદનમ્ ॥
રત્નાસનગતં વીરં શ્રિયા પરમયા યુતમ્

ઉપાસ્યમાનં ત્રિદશૈર્ભાસયન્તં સભાં શુભામ્ ॥
આદિત્યૈર્વસુભિઃ સાધ્યૈર્વિશ્વેદેવૈર્મરુદ્ગણૈઃ

રુદ્રૈર્ભૃગ્વઙ્ગિરોભિશ્ચ નાસત્યૈશ્ચ મહાત્મભિઃ ॥
ઋષિભિઃ સૂર્યસંકાશૈસ્તપસા દ્યોતિતપ્રભૈઃ

ગન્ધર્વૈરપ્સરોભિશ્ચ સ્તૂયમાનં સહસ્રશઃ ॥
કિરીટોત્તમસંચ્છન્નં હારકેયૂરભૂષિતમ્

રત્નાઙ્ગદકૃતોદ્દ્યોતં રત્નગર્ભસમપ્રભમ્ ॥
હરિચન્દન દિગ્ધાંગં નીલામ્બરધરં હરિમ્

તિર્યગ્લલાટકેનાઽક્ષ્ણા તૃતીયેન વિરાજિતમ્ ॥
પશ્યન્તં સર્વલોકસ્ય સતતં ધર્મકર્મણી

વિષ્ણોરચિન્ત્યમઙ્ગં તત્ત્રૈલોક્યસ્યૈવ કારણમ્ ॥
ગોબ્રાહ્મણહિતાસક્તં દદર્શ વસુધા તદા

સન્ધ્યાસહ સમાસીનં શ્રિયા ચૈવ જનાર્દનમ્ ॥
તં વવન્દે વસુમતી દૈત્યભારભરાર્દિતા

પાદ્યાર્ઘ્યાચમનીયાદ્યૈઃ શક્રોઽપિ વસુધાં તદા ॥
પૂજયિત્વા સુખાસીનાં પપ્રચ્છાગમનક્રિયામ્

પૃષ્ટા શક્રેણ સા દેવી વક્તું સમુપચક્રમે

પૃથિવ્યુવાચ ॥
અન્તરિક્ષં દિવં યચ્ચ તથૈવાઽહં જગત્પતે ॥
તવાયત્તા મહાભાગ ત્વં હિ દેવેશ્વરો વિભુઃ

ત્વયિ ભારં સમાસજ્ય વેદાભ્યસનતત્પરઃ ॥
સુખમાસ્તે પ્રશાન્તાત્મા બ્રહ્મા શુભચતુર્મુખઃ

ત્વયિ ભારં સમાસજ્ય દેવદેવોઽપિ શઙ્કરઃ ॥
આસ્તે તપસ્યભિરતઃ કૈલાસે પર્વતોત્તમે

ત્વયિ ભારં સમાસજ્ય સુખં સ્વપિતિ કેશવઃ ॥
ક્ષીરોદશયને નિત્યં શેષપર્યઙ્કમા સ્થિતઃ

પિતામહસ્ય યત્તેજઃ કેશવસ્ય શિવસ્ય ચ ॥
સ્થિતં તત્સકલં તુભ્યં ત્વં હિ સર્વમયોઽરિહા

ત્વયા વિનિહતો વૃત્રો બલશ્ચાપિ નિષૂદિતઃ ॥
ત્વયા ચ નાશિતઃ પાકસ્ત્વયા દૈત્યા નિષૂદિતાઃ

બ્રહ્મણ્યસ્ત્વં શરણ્યસ્ત્વં પ્રણતાર્તિવિનાશનઃ ॥
સહસ્રનયનઃ શ્રીમાન્વજ્રપાણિર્જગત્પ્રિયઃ

તેજસા તપસા યજ્ઞૈઃ શ્રુતેન ચ દમેન ચ ॥
ત્વત્તો વિશિષ્ટં લોકેઽસ્મિન્ન પશ્યામિ શચીપતે

વેદેષુ સરહસ્યેષુ ગીયસે ત્વં પુનઃપુનઃ ॥
વેદાઃ પ્રવૃત્તા યજ્ઞાર્થં તદર્થં ક્રતવસ્તથા

યે હતા દાનવા યુદ્ધે ત્વયા શક્ર પુનઃપુનઃ ॥
ત ઇમે નૃષુ સમ્ભૂતાઃ કાર્તવીર્યં સમાશ્રિતાઃ

તેઽદ્ય જાતા મમ વિભો પીડયન્તિ ચ માં ભૃશમ્ ॥
સાઽહં ભારસમાક્રાન્તા ત્વામદ્ય શરણં ગતા

॥ શક્ર ઉવાચ ॥
જાનામિ ભારખિન્નાં ત્વાં દૈત્યેભ્યો વરવર્ણિનિ ॥
તેષાં ગત્વા વધોપાયમહં પ્રષ્ટાસ્મિ વેધસમ્

માર્કણ્ડેય ઉવાચ ॥
ઇત્યેવમુક્ત્વા ત્રિદશપ્રધાનઃ પૃધ્વીસમેતો ગુરુણા ચ રાજન્ ॥
યયૌ સભાં દેવવરસ્ય તસ્ય પિતામહસ્યાપ્રતિમસ્ય વીરઃ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે પૃથ્વીશક્રલોકગમનં નામ ષડ્વિંશતિતમોઽધ્યાયઃ