Vishnudharmottara Purana · Chapter 1.25

mārkaṇḍeya uvāca //
brahmaṇo'triḥ sutaḥ śrīmānprabhāvādbrahmaṇā samaḥ ///
prabhākarastasya sutaḥ pitāmahasamo guṇaiḥ

svarbhānunā hate sūrye patamāne divo mahīm //
tamobhibhūte tapasā prabhā yena vivardhitā

svastyastviti sa hovāca patamānaṃ divākaram //
vacanāttasya brahmarṣeḥ sa papāta divo mahīm

atriśreṣṭhāni gotrāṇi yaścakāra mahāyaśāḥ //
yajñeṣvatrivanaṃ yaśca surairyasya prakīrtitam

tasya putratvamāpannau janārdanamaheśvarau //
dattātreyo'tha durvāsā loke khyātimupāgatau

dattātreyatvamāsādya bhagavānmadhusūdanaḥ //
vedānadhyāpayāmāsa brāhmaṇāṃścaritavratān

teṣu naṣṭeṣu vedeṣu kriyāsu ca makheṣu ca //
cāturvaṇye samākīrṇe dharme śithilatāṃ gate //

abhivardhati cādharme satye naṣṭe'nṛte sthite //
prajāsu śīryamāṇāsu dharme cākulatāṃ gate

sayajñāḥ sakriyā vedāḥ pratyānītā hi tena vai //
cāturvarṇyamasaṃkīrṇa kṛtaṃ tena mahātmanā

durbhikṣamarakau naṣṭau tasmiñjāte mahītale //
pravavarṣa ca devendraḥ sahasranayanaḥ kṣitau //1.25.१ ०//
bhūya eva jagadvṛttaṃ yathāpūrvaṃ jagatpate //
pranaṣṭakaluṣe loke sanmārgastheṣu rājasu

yajatsu vipramukhyeṣu tapasyabhirateṣu ca //
vārtāsakteṣu vaiśyeṣu śuśrūṣuṣvantyajeṣu ca

muditeṣu ca lokeṣu trailokye devasādgate //
viṣṇorbhāge kṣitigate kārtavīryārjunastadā

daśavarṣasahasrāṇi kṛtavānduścaraṃ tapaḥ //
prayāgavanamāsādya dattātreyāśramaṃ prati

ārādhayāmāsa tadā dattaṃ śuśrūṣayā nṛpa//
tena dattavaraścakre sarājyaṃ hatakaṇṭakam

āryāvarteṣu nirmlecchā kṛtā tena vasundharā //
tasminrājani dharmajñe daityairdevanipātitaiḥ

saṃprāptairbhūmipālatvaṃ vasudhā bhārapīḍitā //
nākapṛṣṭhaṃ yayau śīghraṃ śakradarśanalālasā

vajra uvāca //
āsādyalokaṃ tridiveśvarasya bhāreṇa khinnā vasudhā narendraiḥ //
kiṃ tatra cakre vada tanmamādya dṛṣṭvā kṣitiṃ yacca cakāra śakraḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde dattātreyopākhyānaṃnāma pañcaviṃśattamo'dhyāyaḥ