Vishnudharmottara Purana · Chapter 1.24

vajra uvāca //
devakāryaṃ vinā viṣṇurnotpatsyati mahītale //
kasminkārye babhūvāsau dattātreya iti śrutaḥ

mārkaṇḍeya uvāca //
śakreṇa ca yadā vṛtro hato vīryopabṛṃhitaḥ

tasminhate'sure tvaṣṭā viśvarūpamavāsṛjat //
tapasyantaṃ ca taṃ gatvā jaghāna ca śacīpatiḥ

tasminhate brahmahatyā jagāma balasūdanam //
brahmahatyābhibhūtastu rājyaṃ tyaktvā triviṣṭape

mānase bisatantustho babhūva sa purandaraḥ //
rājā kṛtaḥ śakrahīnairdevaistu nahuṣastadā

so'kāmayata paulomīṃ śakrasya mahiṣīṃ priyām //
kālālābhaparā prāha śakraṃ devī tathā śacī

apūrveṇa hi yānena samīpaṃ me sureśvara //
ṛṣibhiḥ śibikāṃ yuktvā sa jagāma tadantikam

śibikāṃ vahamānaṃ tu mandaṃmandaṃ dvijottamam //
pādena tāḍayāmāsa so'gastyaṃ pāpaniścayaḥ

agastyena tathā śapto bhava sarpo mahīpate //
yudhiṣṭhireṇa saṃgamya śāpamokṣamavāpsyasi

evamukte tu muninā sarpatvaṃ sa jagāma vai //
naṣṭe śakre ca patite nahuṣe pāpaniścaye

rajastamobhyāmākrāntā babhūvustridaśālayāḥ //
tataḥ pravṛttā loke'sminnanāvṛṣṭiḥ sudāruṇā

durbhikṣamarakau cobhau viṣaṇṇāstridaśālayāḥ //
naṣṭotsavamahāyajñaṃ nirvaṣaṭkāramaṅgalam

anāvṛṣṭihataṃ sarvaṃ babhūva vasudhātalam //
kṣutkṣāmamānuṣaprāyaṃ vinaṣṭapaśusañcayam

kapālāsthisamākīrṇaṃ keśaśaivālasaṃkulam //
snāyubhagnadvijagaṇaiḥ kravyādairatisaṃkulam

nirgandhikuṇapākīrṇaṃ śūnyaprāyaṃ vibhīṣaṇam //
kṣutkṣāmabhūtasaṅghābhyāṃ vinivṛttavaṇikpatham

pranaṣṭakṛṣivārtaṃ ca dātṛbhiśca vivarjitam //
narake'pi mahāghore nirākrandairjanaiyutaiḥ

durlabhānnaṃ nirānandaṃ skandhāsaktakumārakaiḥ //
itaścetaśca yāsyadbhirdānavairatisaṃkulam

śuṣkatoyāśayaṃ bhīmaṃ nāmaśeṣamahāpagam //
tasminkāle mahāghore cotsṛṣṭaniyamā dvijāḥ

āryāvartaṃ parityajya mlecchadeśamupāśritāḥ //
bhakṣyābhakṣyaṃ parityajya kurvāṇāḥ prāṇadhāraṇam

prāṇadhāraṇasaktānāṃ kṣudhāvyākulacetasām //
teṣāṃ brahma tadā naṣṭaṃ dhāvatāṃ ca itastataḥ

tadā naṣṭeṣu deveṣu mlecchībhūtamidaṃ jagat //
mlecchībhūte jagatyasminsvadhāsvāhāvivarjitāḥ

yathā martyāstathā jātāḥ sarve te devatāgaṇāḥ //
kṣutkṣāmakaṇṭhaistridaśaiḥ prārthitaśca janārdanaḥ

śakrārthaṃ tridaśā gatvā trailokyahitakāmyayā

tānuvāca harirdevaḥ sarve gacchantu mānasam //
bisataṃtugataṃ śakraṃ tasmāllapsyatha mā ciram

yajatāṃ so'śvamedhena māmeva surasattamāḥ! //
ahameva kariṣyāmi vipāpmānaṃ biḍaujasam

tatkṛtā brahmahatyāṃ tu caturdhā sa kariṣyati

amedhyakṣepake vahnau pādenaikena yāsyati //
tathā caikena pādena hyaśucikṣepake jale

pādenaikena ca tathā sarvakāle drumacchidam //
rajasvalāṃgaṃ pādena tathā caikena yāsyati

ahamaṃśena yāsyāmi bhūtalaṃ surakāraṇāt //
naṣṭe ca bhūtale dharmaṃ sthāpayiṣyāmyahaṃ punaḥ

etatsarvaṃ yathoddiṣṭaṃ devadevena śārṅgiṇā //
cakrussuragaṇāḥ sarve rājyaṃ cāvāpa vṛtrahā

śakreṇa nityaṃ bisatantugena dhyāto mahātmā hariraprameyaḥ //
hatvāpi kāmena sa vipramukhyaṃ lebhe trilokīṃ punareva tasmāt

iti śrīviṣṇudharmottare prathamakhaṇḍe mārkaṇḍeyavajrasaṃvāde vṛtravadhopākhyānaṃ nāma caturviṃśatitamo'dhyāyaḥ