Vishnudharmottara Purana · Chapter 1.246.250

1.246
rāma uvāca //
tatastu śaiśire prāpte kāle tapanavallabhe //
himālīpaṭalacchannadurvibhāvyadiśāmukhe

supakvamātuluṅgāḍhyavanarājisugandhini //
praphullavṛttakusumacārurāgojjvalatviṣi

himaprayātasañjātasarvaratnatṛṇolbaṇe//
atyarthaśītakusume kuṅkumāguruvallabhe

kāminyaḥ kuṅkumārdrāṅgyaḥ pīnonnavapayodharāḥ //
āliṅganena kāntānāṃ yatra śītabhayāpahāḥ

puṣpitairatasīvāṭairnīlanīrajanirmalaiḥ //
pūrṇatoyāśayāśaṅkā jāyate sudhiyāmapi

mādhyakundakapuṣpāḍhyā vanarājyo manoharāḥ //
suśīrṇaparṇasaralānamerukavibhūṣaṇāḥ

saṃtyaktvā dakṣiṇāmāśāṃ vrajamāne tathottarāma //
sūrye mumoca pavanaṃ niḥśvāmamiva dakṣiṇā

ramyāśca gaṃdhamaṃjaryaḥ śobhayanti vanasthalīḥ //
manmathasya śarāḥ kāṃtā kāmimanmathavardhanāḥ

hayānāṃ madhuraḥ śabdaḥ śrūyate daśanodbhavaḥ //
śabdo yavabhujāṃ yatra svāmināṃ rativardhanaḥ

nirmalānāṃ tu sarasāṃ viniviṣṭā jalecarāḥ //
bruvantau madhuraṃ pāṃthā janayanti parāṃ mudam//1.246.१ ०//
janayanti parāṃ prītiṃ kāminīnāṃ tu kāmukāḥ //
yatra medhyairnavairvatsa mātuluṅgādhivāsitaiḥ

vāpīkūpataḍāgeṣu hradaprasravaṇeṣu ca //
yatra kāle raṭantyāpaḥ kampayantyaḥ purīṃ mahat

tasmiṃstvaṃ śiśire kāle kṛtvā gṛhavare svake //
prāveśayatu vidhinā śilpibhiryantra nirmitaiḥ

dharmeṇa pālayankṣoṇīṃ vasa rājīvalocana //
hṛdi kāryastvayā dharmo nityameva narottama

uttiṣṭha śīghraṃ vijayāya gaccha dīptāṃ śriyaṃ prāpnuhi rājaputra //
rakṣantu devāstava sarvakālaṃ padaṃ vidhatsvārigaṇasya mūrdhni

//
iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavākyeṣu śatrughnaṃ prati rāmānuśāsane lavaṇaṃ prati śatrughnaprasthānaṃ nāma ṣaṭcatvāriṃśaduttaradviśatatamo'dhyāyaḥ

1.247
// nāḍāyana uvāca // //
iti rāmavacaḥ śrutvā bāḍhamuktvā sa satvaraḥ //
abhivādya vasiṣṭhasya pādau rāmasya cāpyatha

puraskṛtya mahābhāgānbhārgavapramukhānṛṣīn //
yathoktasenyānugataḥ prayayau bhīmavikramaḥ

vālmīkerāśramaṃ prāpya tāmuvāsa tadā niśām //
pūjayitvā tu vālmīkimṛṣiṇā pratipūjitaḥ

yasminnahani śatrughno vālmīkerāśramaṃ gataḥ //
ubhau prasūtau tanayau tasminnevāhni jānakī

sītāprasavasaṃhṛṣṭaḥ krameṇa raghunandanaḥ //
nidāghaśeṣeṇa nadīmuttatāra sa sūryajām

śibiraṃ samavasthāpya yathāvadyamunātaṭe //
eka eva dhanuṣpāṇiḥ praviveśa madhorvanam //

praviśya ca yudhā tatra lavaṇasya niveśanam //
tasthau dvāramathāśritya vīro vitatakārmukaḥ

etasminneva kāle tu mṛgānhatvā sahasraśaḥ //
bahunā mṛgabhāreṇa sa dadarśa madhoḥ sutam

vṛttākṣamutkaṭaṃ bhīmaṃ dantotkṛttottaracchadam //
daṃṣṭrākarālavadanaṃ daṃtivatparuṣacchavim

sa tu dṛṣṭvaiva śatrughnamuvāca paruṣaṃ bahu //
vipradhāvata duṣṭātmā śatrughnavadhakāmyayā

tyaktvā mṛgasahasrāṇi drumavikṣepatatparaḥ //
drumavṛṣṭiṃ sughorāṃ tāṃ lavaṇena visarjitām

ciccheda bāṇaiḥ saumitriḥ śataśo'tha sahasraśaḥ //
chinne drumamahāvarṣe lavaṇaḥ śatrutāpanaḥ

jaghāna suraśatrughnaṃ śatrughnaṃ muṣṭinā bhṛśam //
muṣṭiprahāraniśceṣṭaṃ śatrughnaṃ lavaṇastadā

na jagrāha ca tacchūlaṃ mṛtyupāśavaśaṅgataḥ //
praveśayāmāsa gṛhaṃ mṛgasaṃghānanekaśaḥ

etasminneva kāle tu labdhasaṃjñaḥ sa rāghavaḥ //
vitatya kārmukaṃ tasthau dvāramāvṛtya veśmanaḥ

tataḥ pādapavarṣeṇa cchādayantaṃ niśācaram //
cakāra vimukhaṃ bāṇaiśchittvāśchittvā mahīruhān

rāmadattaṃ tato bāṇaṃ sandhāya varakārmuke //
nirbibheda mahātejā lavaṇaṃ raghunandanaḥ

sandhīyamāne bāṇe tu trastaṃ tribhuvanaṃ tadā //
āśvāsayāmāsa vibhurbrahmā kamalasambhavaḥ

tena bāṇaprahāreṇa nirbhinnahṛdayaḥ kṣitau //
vyasuḥ papāta medinyāṃ śailo vajrāhato yathā

tasminnipatite bhūmau daitye devabhayaṅkare //
trailokyaṃ vigatātaṅkaṃ kṣaṇena samapadyata

taṃ ca deśamathājagmuḥ surāḥ sabrahmakāstadā //
pūjitāstena vīreṇa śatrughnaṃ vākyamabruvan

// devā ūcuḥ //
varaṃ varaya śatrughna yatte manasi kāṃkṣitam //
apanītaṃ tvayāsmākaṃ bhayaṃ śūlavarāyudhāt

tvayā tu nihate tasmim̐llavaṇe pāparākṣase //
paśya śūlavaraṃ yāṃtamenaṃ śārvaṃ vihāyasā

// śatrughna uvāca // //
asmindeśe kariṣyāmi purīṃ rāmājñayā tvaham //
māse samāpyatāṃ śīghraṃ varametatpradīyatām

// devā ūcuḥ // //
niṣpattiṃ yāsyate dhīra sthirā caiva bhaviṣyati //
puṇyā ca ramaṇīyā ca mathurā nāmataḥ śubhā

// nāḍāyana uvāca // //
evamuktvā surāḥ sarve jagmurnākamataṃdritāḥ //
ājagāma sa taṃ deśaṃ sainyena cyavanaḥ saha

saṃvarddhayitvā śatrughnaṃ jagāmāśramamaṃjasā //
sarvaṃ rāmavacaścakre śatrughno'pi mahāyaśāḥ

kṛtvā purīniveśaṃ ca gṛhaprāveśanaṃ tathā //
uṣitvā dvādaśa samāḥ samprāpte surakarmaṇi

jagāma bhrātaraṃ draṣṭuṃ vālmīkerāśramaṃ punaḥ //
tatra śuśrāva dharmātmā śubhāṃ rāmakathāṃ kṛtām

vālmīkinā prahṛṣṭena gīyamānāṃ kuśīlavaiḥ //
tatroṣya rajanīmekāṃ rāmaṃ dṛṣṭvā tathaiva ca

tatroṣya pañcarātraṃ ca bhūyo rāmavisarjitaḥ //
mathurāyāṃ ca vasudhāṃ pālayāmāsa dharmavit

evaṃvidhaḥ sa śatrughno bharato'pyadhikastataḥ //
mā tena vigrahaṃ gaccha bharatena mahātmanā //
ajeyā raghavo yeṣāṃ sahāyā vānarottamāḥ

sugrīvanīlāṅgadavāyuputrasuṣeṇamaindadvividapradhānāḥ //
mahābalāḥ parvatamātrakāyāḥ surāsurairyuddhagatā ajeyāḥ //

iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavākyeṣu lavaṇavadho nāma saptacatvāriṃśaduttaradviśatatamo' dhyāyaḥ

1.248
// śailūṣa uvāca // //
pulahasya prajāsargaṃ śrotumicchāmi tattvataḥ //
yasya vaṃśe samutpannā vānarā baladarpitāḥ

nāḍāyana uvāca // //
mṛgā ca mṛgamaṃdā ca haristāmrā tathā irā //
bhūtā ca kapiśā daṃṣṭrī surasā saramā tathā

kaśyapo janayāmāsa krodhāttu daśa kanyakāḥ //
kaśyapena ca tā dattāḥ pulahāya mahātmane

prajāstāsāṃ pravakṣyāmi sarvāsāṃ tvaṃ nibodha me //
mṛgāyāstu mṛgā jātā hariṇaiṇāḥ śaśāstathā

rurava pṛṣataścaiva nyaṅkavaḥ śaśakāstathā //
sṛmarā mṛgamaṃdāyā gavayā mahiṣāstathā

camaroṣṭravarāhāśca khaḍgā gaurakharāstathā //
haryāśca vānarā jātā golāṅgūlā sakinnarāḥ

maṇḍūkā nakulāścaiva ye cāpyanye bileśayāḥ //
pañca kanyāśca tāmrāyāḥ patnyastā varuṇasya ca

prādāddharmabhṛtāṃ śreṣṭhaḥ pulahastapasāṃ nidhiḥ //
śyenī bhāsī tathā krauñcī dhṛtarāṣṭrī śukī tathā

śyenī tu janayāmāsa putraṃ saṃpātinaṃ tathā //
jaṭāyuṣaṃ ca rājānaṃ gṛdhrāṇāṃ baladarpitam

saṃpātī janayāmāsa śyenagṛdhravaṭāṃstathā //
bhāsīputrāḥ smṛtā bhāṇāḥ krauñcāḥ krauñcīsutāḥ smṛtāḥ

dhṛtarāṣṭrīsutā haṃsā dhārttarāṣṭrāstathaiva ca //
cakravākamukhāścānye tathā ye jalacāriṇaḥ

śukīputrāḥ śukā jñeyāḥ pakṣiṇaścāpi kīrtitāḥ //
kaśyapasya tu yā patnī irā nāma prakīrtitā

kuñjaraṃ janayāmāsa surakāryodyataṃ sadā //
bhūtāputrāstathā bhūtā mahādevamanuvratāḥ

upavīrolūkhalikā āsyakarṇā kuṣaṇḍikā //
pāṃsavaḥ pāṇipātrāśca caitanyāni punastathā

sūcīmukhā śoṣaṇikāḥ kulānyetāni ṣoḍaśa //
kuleṣvetepu jāyante nānākāraviceṣṭitāḥ

niṣkuṭeṣu pratolīṣu catvareṣu guhāsu ca //
teṣāṃ prādāttadā sthānamantardhānaṃ pratāpitāḥ

aṇimā laghimā prāptiryatra kāmāvasāyitā //
daṃṣṭrīputrāstathāloke daṃṣṭriṇo ye prakīrtitāḥ

saramāyāstathā sarpāḥ kīṭajātyaśca sarvaśaḥ //
śyāmaśca dhavalaścaiva sārameyau tathā śunau

yamasyānucarau tau ca mahābalaparākramau //
iti krodhāduhitṝṇāṃ prajātiḥ kīrtitā mayā

kaśyapasya tu yā patnī surabhirnāma viśrutā //
kanīyasaṃ tu śūdrāṇāṃ tasyāsīdduhitṛdvayam

rohiṇī caiva bhadraṃ te gandharvī ca mahīpate //
pulahāyaiva te datte kaśyapena mahātmanā

surupā hemarūpā ca sarvakāmadughā tathā //
rohiṇyāṃ janayāmāsa pulahaḥ sa mahātapāḥ

brahmacaryavratāstāstu dhenavo daśa kīrtitāḥ //
mānasī tu prajā tāsāṃ yathāsaṃkhyena me śṛṇu

gāvaścaiva mahiṣyaśca ajāścaivāvayastathā //
gandharvī janayāmāsa turagānvātaraṃhasaḥ

garuḍī ca mayūrī ca dve tu kanye manorame //
pulahena tu te datte garuḍāya mahātmane

garuḍī janayāmāsa suparṇānbhīmavikramān //
mayūrī janayāmāsa mayūrādyānvihaṅgamān

garuḍānvayasambhūtāḥ sarve pannagabhojinaḥ //
pakṣiṇastu vayā jñeyāḥ suparṇāngaruḍāñchṛṇu

suvarṇacūḍo nāgaśca dāruṇaścūḍatuṇḍakaḥ //
anilaścānalaścaiva viśālākṣo'tha kuṇḍalī

karkaśo dhvajaviṣkambhī vinato vāmanastathā //
vātavego diśācakṣu rnimiṣo'nimiṣastathā

trivāraḥ saptavāraśca vālmīkirvipukistathā //
daityadvīpaḥ sariddvīpaḥ sārasaḥ padmaketanaḥ

sumukhaścitraketuśca citrabarhastathānagha //
meghaḥ satkumudo dakṣaḥ sarvabhuksāmabhojanaḥ

gurubhāraḥ kapotaśca pūrvanetraścirātakaḥ //
viṣṇugandhāḥ kumāraśca paribarho harastathā

aśvāmbaro madhuparkaśca hemavarṇastathaiva ca //
malayo mātariśvā ca niśākaradivākarau

ete pradeśamātreṇa mayoktā garuḍātmajāḥ //
kulametatsuparṇānāṃ dhanyānāṃ nṛpasattama

sarva ete śriyā yuktāḥ sarve śrīvatsalakṣaṇāḥ //
kulametaddhi śailūṣa ślādhyaṃ viṣṇuparigraham

daivataṃ viṣṇureteṣāṃ viṣṇureva parāyaṇam //
hṛdi yeṣāṃ sadā viṣṇurviṣṇuryeṣāṃ parā gatiḥ //

etattavoktaṃ pulahasya vaṃśaṃ putraiḥ sutābhiśca samanvitaṃ yat //
vaṃśe tu sarvottamavīryayuktā jātā khagendrā harayaśca vīrāḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavākyeṣu pulahavaṃśānukīrtanaṃ nāmāṣṭacatvāriṃśadu ttaradviśatatamo'dhyāyaḥ

1.249
// vajra uvāca //
kathāprasaṅgairbahubhirbhavatā mama kīrtitam //
sambhavaṃ sarvabhūtānāṃ sarvakalmaṣanāśanam

teṣāṃ vikāreṣvācakṣva rājāno mama bhārgava //
pālayanti dvijaśreṣṭha sakalaṃ ye jagattrayam

mārkaṇḍeya uvāca //
evaṃ prajāsu sṛṣṭāsu svayameva pitāmahaḥ //
nikāyeṣunikāyeṣu so'bhyaṣiṃcata pārthivān

oṣadhīnāṃ dvijātīnāṃ nakṣatrāṇāṃ tathaiva ca //
yajñānāṃ tapasāṃ caiva somaṃ rājye 'bhiṣecayat

prajāpatīnāṃ sarveṣāṃ dakṣaṃ prācetasaṃ yathā //
valīmukhānāṃ śvetānāmṛkṣāṇāṃ dhūmra eva ca

manaḥ sarvendriyāṇāṃ ca surastrīṇāṃ ca manmatham //
prahlādaṃ sarvadaityānāṃ pitṝṇāṃ ca tathā yamam

apāṃ tu varuṇaṃ rājye tathaiva jalavāsināma //
yakṣāṇāṃ rākṣasānāṃ ca pārthivānāṃ dhanasya ca

putraṃ viśravaso jyeṣṭhaṃ kuberaṃ naravāhanam//
vipracittiṃ ca rājānaṃ dānavānāṃ mahābalam

sarvabhūtapiśācānāṃ girīśaṃ śūlapāṇinam//
śailānāṃ himavantaṃ ca nimnagānāṃ ca lāvaṇam

bhārataṃ sarvavarṣāṇāṃ dvīpānāmatha madhyamam //
svādūdakaṃ samudrāṇāmaśvatthaṃ sarvaśākhinām

karmaṇāṃ vyavasāyaṃ ca meruṃ sarvaśilābhṛtām //
gandharvāṇāṃ citrarathaṃ garuḍaṃ ca patatriṇām

uccaiḥśravasamaśvānāṃ govṛṣaṃ ca tathā gavām //
suvarṇaṃ sarvaratnānāmoṣadhīnāṃ tathā yavam

satyalokaṃ ca lokānāṃ pātālānāṃ rasātalam //
śāstrāṇāṃ ca yajurvedaṃ sarveṣāmaviśeṣataḥ

gāyatrīṃ sarvamantrāṇāṃ chandasāṃ ca yadūttama //
mṛgāṇāmatha śārdūlaṃ pannagānāñca takṣakam

airāvataṃ gajendrāṇāṃ dharmaṃ sarvasukhasya ca //
vāsukiṃ sarvanāgānāmṛṣīṇāṃ ca tathā bhṛgum

vidyādharāṇāṃ sarveṣāṃ tathā devīṃ sarasvatīm //
utpātānāṃ tathā rāhuṃ grahāṇāṃ ca divākaram

kālasyāvayavañcaiva kālaṃ saṃvatsaraṃ tathā //
vyādhīnāṃ ca jvaraṃ rājye nṛṇāmarkaniśākarau

abhiṣikto narendrendra brahmaṇā svayameva hi //
bhārate'sminpurā varṣe prāpte vaivasvatentare

tasmādadyāpi ca tayoraṃśajātāśca pārthivāḥ //
tato'bhiṣikto devānāṃ rājye devaḥ śatakratuḥ //
saṃbhūya rājabhiḥ sarvaistrailokyapatirūrjitaḥ

vajra uvāca //
rājye'bhiṣiktaḥ sa kathaṃ mahātmā sambhūya sarvaistridaśāriharttā //
etanmamācakṣva bhṛgupradhāna bhaktirmameyaṃ tridaśendraśatrau

iti śrīviṣṇudharmottare prathamakhaṇḍe mā० saṃ० śailūṣaṃ prati nāḍāyanavākye pratisamūhe rājakīrtanaṃ nāmaikona ṇñcāśaduttaradviśatatamo'dhyāyaḥ

1.250
// mārkaṇḍeya uvāca //
sumerau parvataśreṣṭhe nānāratnojvalatviṣi //
prajāpatirathādāya rājasaṃghānprakīrtitān

abhyaṣiñcata devānāṃ rājye kaśyapanandanam //
tejasvinamathādityaṃ jajñe nirdhūtakalmaṣam

tasyābhiṣeke pradadau viśvakarmā manoharam //
ratnojjvalaṃ bhadrapīṭhaṃ kāmarūpadharaṃ śubham

atraivamupadiśyātha svayaṃ brahmā jagadguruḥ //
abhyaṣiñcata devānāmādhipatye śatakratum

brahmā viṣṇuśca śambhuśca sādhyāśca samarudgaṇāḥ//
ādityā vasavo rudrā viśvedevā marudgaṇāḥ

bhṛgavo'ṅgirasaḥ sādhyā aśvinau ca bhiṣagvarau //
ṛṣayaśca mahābhāgāstraikālyāmaladarśinaḥ

yāni toyānyupādāya samudraḥ saritastathā //
sarāṃsi ca satīrthāni gandharvāpsarasastathā

tasyendumaṇḍalākāraṃ chatraṃ jagrāha keśavaḥ //
śvetau ca bālavyajanau tathā candradivākarau

bhṛṅgāraṃ yādasāṃ bhartā daṇḍaṃ daṇḍadharaḥ prabhuḥ //
menakā caiva raṃbhā ca tālavṛntau manoharau

vidhivacca juhāvāgniṃ devācāryo bṛhaspatiḥ //
tatastasya dadau prītyā vāhanārthe madotkaṭam

airāvaṇaṃ caturdantaṃ nāgaṃ ca pulahaḥ svayam //
pulahaḥ svasutaṃ prādācchvetaṃ turagameva ca

turagāṇāṃ sahasraṃ ca harīṇāṃ vātaraṃhasām //
śriyā dattaṃ tataḥ prītyā rathavāhanamuttamam

tamagniryojayāmāsa kāñcanena rathena ca //
indrāyudhasavarṇābhiḥ patākābhiranantaram

vāyustaṃ yojayāmāsa dhvajaṃ nāgena śaṅkaraḥ //
babandha mukuṭaṃ tasya svayaṃ brahmā jagadguruḥ

upānahau dadau tasya virūpākṣastathānagha //
khaḍgaśca vimalodattastasya śukreṇa yādava

candanāni ca mukhyāni gandhāni vividhāni ca //
himālayaḥ svayaṃ tasya prādāllokagururguruḥ

ratnāni suvicitrāṇi samudraḥ svayameva hi //
daduśca ṛtavastasya puṣpāṇi ca phalāni ca

nanṛtudevagandharvā jaguścāpsarasāṃ gaṇāḥ //
hṛṣṭaṃ pramuditaṃ cāsīttrailokyaṃ sacarācaram

sarvagandhānupādāya surabhirmāruto vavau //
mahatā sa varaughena tarpayitvā bṛhaspatim

varaughaistarpayāmāsa sarvāneva dvijottamān //
saptāhaṃ mānasīṃ siddhiṃ prādātsarveṣu jantuṣu

vyādhimṛtyujarāśokavinivṛttā jagattrayī //
saptāhaṃ narakasthānāṃ naiva sarvāśca yātanāḥ

sarvaṃ muditamevāsīttrailokyaṃ sacarācaram //
kirīṭī svanuliptāṅgaḥ kuṇḍalottamabhūṣitaḥ

kauśeyavasanastatra śvetamālyavibhūṣaṇaḥ //
śriyaṃ dadhāra somasya śvetasthasya śatakratuḥ

bhadrāsanagataṃ śakraṃ praṇemuḥ sarvadevatāḥ //
khyāpyamāno mahārāja tadā devena daṇḍinā

ṛṣayastuṣṭuvustaṃ ca gandharvāpsarasastathā //
maṅgalālaṃbhanaṃ cakre tataḥ śakraḥ surārihā

pūrṇakumbhaṃ sumanaso ratnānyājyaṃ tathā dadhi //
phalāni śrīphalaṃ caiva udbhṛtāni vasuṃdharā

svastikānrucirāṃścaiva nandyāvartāṃśca kāñcanam //
kāṃcanollikhitāścaiva yāśca mukhyāḥ saridvarāḥ

udagdānaṃ tathā dūrvāṃ darpaṇaṃ cājyameva ca //
dharmaḥ satyaṃ ca śūlaṃ ca balaṃ ca yadunandana

upāsanta mahābhāgaṃ saśarīrāḥ śatakratum //
kāṃtirlakṣmīrdhṛtiḥ śraddhā puṣṭirmedhā kriyā matiḥ

buddhirlajjā vapuḥ śāntiranasūyā tathaiva ca //
upāsanta tadā devaṃ sarvarājeśvaraṃ vibhuma

tato vavande pitaraṃ mātaraṃ śaṅkaraṃ harim //
brahmāṇaṃ varadaṃ saumyamṛṣīṃśca yadunandana

tato rathena śukreṇa sa tu mātaliyaṃtriṇā //
vināśayāmāsa raṇe devatānāmarātayaḥ

pālayāmāsa sakalaṃ tathaiva ca jagattrayam //
śakrābhiṣekametatte kathitaṃ yadunandana

śrotavyamabhiṣekaṃ tu yātrākāleṣu cāpyatha ///
gṛhapraveśe vaivāhye puṇyāheṣu pareṣu ca

etatpavitraṃ maṅgalyaṃ dhanyaṃ śrutisukhāvaham //
pāpmālakṣmīpraśamanaṃ duḥsvapnakilbiṣāpaham

/
puṇyāhakāleṣu narendracandra śrutvābhiṣekaṃ balasūdanasya //
dharmārthakāmānpuruṣā labhante vyādhipraṇāśaṃ ca yaśastathāgryam

iti śrīviṣṇudharmottare prathamakhaṇḍe mārkaṇḍeyavajrasaṃvāde śakrābhiṣeko nāma pañcāśaduttaradviśatatamo'dhyāyaḥ