Vishnudharmottara Purana · Chapter 1.23

vajra uvāca //
bhagīrathasya rājarṣervaṃśamuttamapūruṣaṃ //
tvatto'haṃ śrotumicchāmi gaṅgā yenāvatāritā

mārkaṇḍeya uvāca //
bhagīrathasutaḥ śrīmānviśruto nāma dhārmikaḥ //
viśrutasyātmajaḥ śrīmānnābhāga iti viśrutaḥ

ambarīṣastu nābhāgirayutāristadātmajaḥ //
tatsuto ṛtuparṇaśca rājā nalasakho balī

śarvakāmaḥ sutastasya sudāsastasya cātmajaḥ //
tasya mitrasahaḥ putraḥ tasya putrośmako nṛpa

mūlakastatsuto rājā mahābuddhirnareśvaraḥ //
kṣatriyāṇāṃ vadhe ghore rāmeṇa vinipātitaḥ

purā pitṛvadhāmarṣādrāmo bhārgavanandanaḥ //
triḥsaptakṛtvaḥ pṛthivīṃ cakre niḥkṣatriyāmimām

bhagīrathakulotpannaṃ mūlakaṃ nāma jaghnivān //
vajra uvāca //
kathaṃ rāmeṇa vasudhā purā niḥkṣattriyā kṛtā //
kimarthaṃ ca mahābhāga tanmamācakṣva pṛcchataḥ

mārkaṇḍeya uvāca//
somavaṃśasamutpanno yayātirnāma pārthivaḥ //
tasyāpi saṃhataḥ putro babhūva pṛthivīpatiḥ

sahasrajitsutastasya nabhajittasya cātmajaḥ //
tasyāpi haihayaḥ putraḥ kuntistasyāpi cātmajaḥ

tasyāpi saṃhataḥ putro mahiṣmāṃ'stasya cātmajaḥ //
māhiṣmatī kṛtā yena nagarī sumanoharā

bhadraśreṇyaḥ sutastasya durmadastasya cātmajaḥ //
kanakastatsuto rājā kṛtavīryastadātmajaḥ //१ १//
arjunastanayastasya saptadvīpeśvaro'bhavat//
dattātreyo'tha bhagavānviṣṇurūpānurūpadhṛk

ārādhya tapasā yena prāptaṃ rājyaṃ sudurlabham //
tathā bāhusahasraṃ ca matiṃ dharme tathottamām

adharme varttamānasya maraṇaṃ ca janārdanāt //
yuddhena pṛthivīṃ jitvā dharmeṇaivānuraṃjayan

teneyaṃ pṛthivī sarvā saptadvīpā sapattanā //
saptodadhiparikṣiptā kṣātreṇa vidhinā jitā

pātālanagare śaile vasudhāyāṃ rasātale //
tasya pārthivasiṃhasya cakraṃ na pratihanyate

dvīpeṣu sa hi sarveṣu khātaṃ khātamathā'karot //
yūpacihnāni ca tathā khaḍgī śataśanī rathī

deśānanucaranyogātsadā paśyati taskarān//
sa eva paśupālobhūtkṣetrapālaḥ sa eva ca

sa eva vṛṣṭyā parjanyo yogitvādarjuno'bhavat //
sa tu bāhusahasreṇa jyāghātakaṭhinatvacā

bhāti raśmisahasreṇa śāradeneva bhāskaraḥ //
rākṣasā nirjitāstena tena baddhaśca rāvaṇaḥ

jitvā bhogavatī tena karkoṭakasutā hṛtā //
tasya bāhusahasreṇa kṣobhyamāṇe mahodadhau //
bhavanti līnā niśceṣṭāḥ pātālasthā mahāsurāḥ

mandarakṣobhacakitā amṛtotpādaśaṅkitāḥ //
nataniścalamūrdhāno bhavanti ca mahoragāḥ

daśayajñasahasrāṇi teneṣṭāni mahīkṣitā //
dvīpe dvīpe mahārāja dharmajñena mahātmanā

sarve yajñā mahārāja tasyāsanbhūridakṣiṇāḥ //
sarve kāñcanavedīkāḥ sarve yūpaiśca kāñcanaiḥ

dvijānāṃ pariveṣṭārastasya yajñeṣu devatāḥ //
svayamāsanmahārāja svayaṃ bhāgaharāstathā

tasya yajñe jagau gāthā nāradassumahattapāḥ //
na nūnaṃ kārtavīryasya gatiṃ yāsyanti pārthivāḥ

yajñairdānaistapobhirvā vikrameṇa śrutena vā

pañcāśītisahasrāṇi varṣāṇāṃ sa mahīpatiḥ //
saptadvīpeśvaraḥ samrāṭ cakravarttī babhūva ha

tasya rājñastu vasudhā bahupārthivasaṅkulā //
bhārākrāntā vilulitā babhūva pṛthivīpate

tasya rājño gatātaṅkairbahuputrairnarottama //
tejoyuktaiḥ samākīrṇā vasudhā vasudhādhipa

bahunāgāśvasaṃkīrṇā bahugokulasaṅkulā //
na śaktā nṛpate soḍhuṃ tejastadatimānuṣam

jvālāvalivapuḥ śrāntā khinnā nākamupāgatā

evaṃ prabhāve naradevanāthe pṛthvīṃ samagrāṃ paripālyamāne //
bhāreṇa sannā pṛthivī jagāma mahendralokaṃ munidevajuṣṭam

iti śrīviṣṇudharmottare prathamakhaṇḍe mārkaṇḍeyavajrasaṃvāde'rjunopākhyānaṃ nāma trayoviṃśo'dhyāyaḥ