Vishnudharmottara Purana · Chapter 1.226.230

1.226
// nāḍāyana uvāca // //
tasyaiva devadevasya śṛṇu karmedamuttamama //
āsīddaityondhako nāma bhinnāñjanacayopamaḥ

tapasā mahatā yuktastvavadhyaśca divaukasām //
sa kadācinmahādevaṃ pārvatyā sahitaṃ prabhum

krīḍamānaṃ tadā dṛṣṭvā hartuṃ devīṃ pracakrame //
tasya yuddhaṃ tadā ghoramabhavatsaha śaṃbhunā

rudravarṇavinirbhede rudhirādandhakasya tu //
aṃdhakāśca samutpannā śataśotha sahasraśaḥ

teṣāṃ ca dāryamāṇānāṃ rudhirādapare punaḥ

babhūvuraṃdhakā ghorā yairvyāptamakhilaṃ jagat //
evaṃ māyāvinaṃ dṛṣṭvā devadevastadāndhakam

pānārthamaṃdhakāsrasya sasṛje mātarastathā //
māheśvarīṃ tathā brāhmīṃ kauberīṃ cānalīṃ tathā

sauparṇīmatha vā yavyāṃ śākrīṃ vai nairṛtīṃ tathā //
saurīṃ saumyaṃ śivāṃ dūtīṃ cāmuṃḍāmatha vāruṇīm

vārāhīṃ nārasiṃhīṃ ca vaiṣṇavīṃ ca lalatthikām //
śatānandāṃ bhagānandāṃ picchilāṃ bhagamālinīm

balāmatibalāṃ raktāṃ surabhīṃ mukhamuṇḍikām //
mātṛnandāṃ sunandāṃ ca viḍālīṃ śākunīṃ tathā

revatīṃ ca mahāraktāṃ tathaiva pilipicchikām //
jayāṃ ca vijayāṃ caiva jayantīṃ cāparājitām

kālīṃ caiva mahākālīṃ kāladūtīṃ tathaiva ca //
subhagāṃ durbhagāṃ caiva karālīṃ dehanīṃ tathā

aditiñca ditiñcaiva mālinīṃ mṛtyumeva ca //
karṇamoṭīṃ tathā yāmyāṃ ulūkīṃ ca ghaṭodarīm

kapālīṃ vajrahastāṃ ca piśācīṃ rākṣasīṃ tathā //
bhuruṇḍīṃ hāṅkarīṃ caṇḍāṃ śaivāṃ ca kaṭakīṃ tathā

ghaṃṭāṃ sulocanāṃ dhūmrāmekavālīṃ kapālinīm //
viśālāṃ daṣṭikāṃ śyāmāṃ trijaṭīṃ kukuhaṃ tathā

vināyakīṃ ca vaitālīmunmattāṃ śubhanāṃ tathā //
siddhiñca lelihānāṃ ca kekarāṃ gardabhīṃ tathā

tarkaṭīṃ bahuputrāṃ ca pretayānāṃ viṭaṃpurām//
krauñcīṃ sūkaramukhīṃ ca vitatāṃ saramāṃ danum //

uṣāraṃbhāṃ pinākāṃ ca lalitāṃ citrarūpiṇīm //
svadhākārāṃ vaṣaṭsvāhāṃ dhṛtiṃ jyeṣṭhāṃ kapardinīm

māyāvicitrarūpāṃ ca kāmarūpāṃ vaśaṃgamām //
svakaṃbilāṃ siñjikāṃ ca mahānāsāṃ mahāmukhīm

kaumārīṃ rocanāṃ bhīmāṃ sadāhāsāṃ madoddhatām //
āraktākṣīṃ kālakarṇīṃ bharttukarṇīṃ mahāsvanīm

keśinīṃ śikhinīṃ lambāṃ piṃgākṣīṃ lohitāmukhīm //
ghaṇṭāravāṃ ca daṃṣṭrālāṃ locanāṃ kācajaṅghikām

gokarṇikāṃ gomukhikāṃ mahāgrīvāṃ mahāmukhīm//
ulkāmukhīṃ dhūmraśikhāṃ kavanāṃ parikaṃpitām

mohinīṃ kuṇḍinīṃ tveḍāṃ nirbhayāṃ bāhuśālinīm //
śūrpakarṇīṃ tathaikākṣīṃ viśokāṃ nandinīṃ rucam

jyosrāmukhīṃ varaparāṃ nikumbhāṃ raktakampanām //
avikārāṃ mahācitrāṃ citrasenāṃ manoramām

sudarśanāṃ haratpāpāṃ mātaṅgīṃ laṃbamekhalām //
subālāṃ bālatarkārīṃ premodāṃ lāṅgalāvatīm

cittāṃ vittāṃ jaḍāṃ koṇāṃ śāntikāṃ bhasitāśanīm //
laṃbastanīṃ laṃbaghaṇṭāṃ visatāṃ vāmacūḍinīm

svalatirdīrghakeśī ca sulatā sundarī samā //
adhomukhī kaṭumukhī krodhanī vasuvāśinī

virāviṇī vatsarutā māṣābhājinaśālinī //
kuṭumbikā śuktikā ca caṇḍikā balamohinī

māṃsānyahāsinī lambā govidhārī samāgadhī //
etāścānyāḥ sa devendra sasṛje mātarastadā

andhakānāṃ mahāghoraṃ papustadrudhiraṃ tadā //
tatondhakāsṛjā sarvāḥ parāṃ tṛptimupāgatāḥ

tāstu tṛptāḥ susambhūtā bhūya evāṃdhakāsrajā //
arditoyairmahādevaḥ śūlamudgarapaṭṭiśaiḥ

tataḥ sa śaṅkaro devastvandhakairvyākulīkṛtaḥ //
jagāma śaraṇaṃ devaṃ vāsudevamajaṃ vibhum

tatastu bhagavānviṣṇuḥ sṛṣṭavāñchuṣkarevatīm //
sā papau satvaraṃ teṣāmandhakānāmasṛkkṣaṇāt

yathāyathā ca rudhiraṃ pibatyandhakasambhavam //
tathā tathā'dhikaṃ devī saṃśuṣyati janādhipa

pīyamāne tadā teṣāmandhakānāṃ tathāsṛji //
andhakāstu kṣayaṃ nītā sarve te tripurāriṇā

mūlāndhakaṃ tu vikramya tadā sarvatra lokakṛt //
cakāra vegāñchūlāgre tadā tuṣṭāva śaṅkaram

andhakaḥ sumahāvīryaḥ tasya tuṣṭo'bhavadbhavaḥ //
sāmīpyaṃ pradadau nityaṃ gaṇeśatvaṃ tathaiva ca

tato mātṛgaṇāḥ sarve śaṅkaraṃ vākyamabruvan //
bhagavan bhakṣayiṣyāmaḥ sadevāsuramānuṣam

tvatprasādājjagatsarvaṃ tadanujñātumarhasi //
śaṅkara uvāca //
bhavatībhiḥ prajāḥ sarvā rakṣaṇīyā na saṃśayaḥ

tasmādghorādabhiprāyānmanaḥ śīghraṃ nivartyatām //
nāḍāyana uvāca //
ityevaṃ śaṅkareṇoktaṃ tvanādṛtya vacastu tāḥ

kṣobhayāmāsu'vyagrāstrailokyaṃ sacarācaram / /
trailokye bhakṣyamāṇe tu tadā mātṛgaṇairnavaiḥ

nṛsiṃhamūrtiṃ devaṃ ca pradadhyau bhagavāñchivaḥ //
anādinidhanaṃ devaṃ sarvalokabhavodbhavama

daityendravakṣorudhiraprokṣitorumahānakhama //
vidyujjihvaṃ mahādaṃṣṭraṃ sphuṭakesarasaṅkaṭam

kalpāntamārutakṣubdhasaptārṇava mahāsvanama //
vajrāgratīkṣṇanakharamākarṇāddāritānanam

maruśailapratīkāśamudayārkasamekṣaṇama //
himādriśikharākāraṃ cārudaṃṣṭrojjvalānanam

khavinissṛtaromāgniṃ jvālākesaramālinam //
baddhāṅgadaṃ sumukuṭaṃ cārukeyūrabhūṣaṇama

śroṇīsūtreṇa mahatā kāñcanena virājitama //
nīlotpaladalaśyāmaṃ vāmoyugavibhūṣitama

tejasākrāntasakalaṃ brahmāṇḍāntaramaṃḍapama //
sādarabhrāmyamāṇānāṃ hutahavya ghanārciṣām

āvarttaiḥ sadṛśākāraiḥ saṃyuktaṃ daihalomajaiḥ //
sarvapuppavicitrāṃ ca dhārayānaṃ mahāsrajama

sa dhyātamātro bhagavānpradadau tasya darśanam //
yādṛśenaiva rūpeṇa yāto rudreṇa bhaktitaḥ

tādṛśenaiva rūpeṇa durnirīkṣyeṇa daivataiḥ //
praṇipatya tu deveśaṃ tadā tuṣṭāva śaṅkaraḥ

śaṅkara uvāca //
namastestu jagannātha narasiṃhavapurdharaḥ //
daityanāthāsthisaṃpūrṇa nakhaśuktivirājita

tadasrakaṇasaṃlagnahemapiṅgalavigrahaṃ //
meroḥ sapadmarāgasya śobhāṃ dhatse jagadguro

kalpāntāmbhodanirghoṣa sūryakoṭisamaprabha //
sahasrayama saṃkrodha sahasrendraparākrama

sahasradhanadasphīta sahasravaruṇātmaka//
sahasrakālacarita sahasraniyatendriya

sahasrabhūmisaddhairya sahasrānantamūrttimat //
sahasracandrapratima sahasraharivikrama

sahasrarudratejaska sahasrabrahmasaṃstuta//
sahasravāyuvegogra sahasrajyotirīṣaṇa

sahasrayantramathana sahasrābādhamocana //
andhakasya vināśāya sṛṣṭā yā mātaro mayā

anādṛtya tu madvākyaṃ bhakṣayaṃtyaśca tāḥ prajāḥ //
kṛtvā tāśca na śakto'haṃ saṃhantumaparājita

svayaṃ kṛtvā kathaṃ tāsāṃ vināśamapi rocaye //
nāḍāyana uvāca //
evamuktaḥ sa rudreṇa nārasiṃha vapurdharaḥ

sasarja devīṃ jihvātaḥ tadā vāgīśvarīṃ hariḥ //
hṛdayācca tathā māyāṃ guhyācca bhagamālinīm

asthibhyaśca tathā kālī sṛṣṭā pūrvaṃ mahātmanā //
yayā tadrudhiraṃ pītamandhakānāṃ mahātmanām

yā tvasminkathitā loke nāmataḥ śuṣkarevatī //
dvātriṃśanmātaraḥ sṛṣṭā gātrebhyaścakriṇā tataḥ

tāsāṃ nāmāni vakṣyāmi tāni me gadataḥ śṛṇu //
sarvakliṣṭā mahābhāgā kaṇṭhakarṇī tathaiva ca

trailokya mohinī puṇyā sarvasattvavaśaṅkarī //
tathā ca cakrahṛdayā pañcamā vyomacāriṇī

śaṃkhinī lekhinī caiva kālasaṅkarṣiṇī tathā //
iti devyaṣṭakaṃ rājanvāgīśyanucaraṃ smṛtam

ajitā sūkṣmahṛdayā vṛkṣāveśāśmadarśanā //
nṛsiṃhabhairavā cillā garutpakṣahṛdānayā

bhagamālinya 'nucarā ityaṣṭau nṛpa mātaraḥ //
ākarṣiṇī ca bhārūṭī tathaivottaramālikā

jvālāmukhī bhīṣaṇikā kāmadhenuśca bālikā //
tathā padmakarā rājanrevatyanucarāḥ smṛtāḥ

aṣṭau mahābalāḥ sarvā devagātrasamudbhavāḥ //
trailokyasṛṣṭisaṃhārasamarthāḥ sarvadevatāḥ

tāḥ sṛṣṭamātrā devena kruddhā mātṛgaṇasya tu //
pradhāvitā mahārāja krodhavisphūrjitekṣaṇāḥ

aviṣahyatamaṃ tāsāṃ dṛṣṭvā tejaḥ sudāruṇam //
bhayena śaraṇaṃ prāptā deveśaṃ pūrvamātaraḥ

śaraṇārthamanuprāptā nṛsiṃho vākyamabravīt //
narasiṃha uvāca //
yathā manuṣyāḥ paśavaḥ pālayanti varānanāḥ

yajanti taiśca paśubhiḥ tathā vai devatāgaṇān //
bhavatyaśca tathā lokānpālayantu mayeritāḥ

manujaiśca tathā devaṃ yajadhvaṃ tripurāntakam//
ye ca māṃ saṃsmaraṃtīha te ca rakṣyā sadā narāḥ

balikarma kariṣyaṃti yuṣmākaṃ ye sadā narāḥ //
sarvakāmapradāsteṣāṃ bhaviṣyadhvaṃ tathaiva ca

tatsādanādikaṃ ye ca kariṣyaṃti hareritam //
te ca rakṣyā sadā loke rakṣitavyaṃ ca śāsanam

raudrāṃ caiva parāṃ mūrtiṃ mahādevaḥ pradāsyati//
yuṣmabhyaṃ samayā sārdhaṃ tena sārdhaṃ varasyatha

mayā mātṛgaṇaḥ sṛṣṭo yoyaṃ vigatasādhvasaḥ //
eṣa nityaṃ viśālākṣyo mayaiva saha raṃsyati

mayā sārdhaṃ tathā pūjāṃ vīrebhyaścaiva lapsyasi //
pṛthak ca pūjito loke sarvānkāmānpradāsyati

śuṣkāṃ saṃpūjayiṣyanti ye tu putrārthino janāḥ//
teṣāṃ putrapradā devī bhaviṣyati na saṃśayaḥ

nāḍāyana uvāca//
etāvaduktvā bhagavānsaha mātṛgaṇena ca //
jvālāmālākulavapustatraivāṃtaradhīyata

samātṛvargopi harasya mūrti sadā yajaṃstiṣṭhati tatsamīpe //
deveśvarasyāpi nṛsiṃhamūrteḥ pūjāṃ vidhatte tripurāntakārī

iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavākye andhakajayavarṇanonāma ṣaḍviṃśatyuttaradviśatatamo'dhyāyaḥ

1.227
// śailūṣa uvāca //
mātṛdoṣapraśamanānmaheśvaramukhodgatān //
prayogāñchrotumicchāmi vadataste dvijottama

nāḍāyana uvāca //
cocakaṃ tu vacā kuṣṭaṃ brahmabhūtajaṭe śubhe //
kālamañjā haridre dve yavacūrṇavimiśritam

udvartanamidaṃ proktaṃ mātṛdoṣavināśanam //
ariṣṭāriṣṭapatrāṇi tālajītakayostathā

śiṃśipāmalakībilvakapitthānāṃ tathaiva ca //
bahukāratvacaṃ pūrvāṃ tathaiva ca punarnavām

bhārṅgīkvāthamidaṃ snānaṃ mātṛdoṣavināśanam //
ariṣṭakaṃ tathā bilvaṃ padmākṣaṃ phalinīphalam

vacā kuṣṭaṃ ca mustañca vālakaṃ rajanīdvayam //
candanaṃ kuṃkumaṃ caiva nāgadānaṃ ca rocanā

etāni sarvāṇyāhṛtya pūrṇakumbhe vinikṣipet //
snānametatprayoktavyaṃ mātṛdoṣavināśanam

kusumaiḥ pañcavarṇaistu dhūpairniryāsajaistathā //
kuṃkumāgurukarpūracandanaiśca manoramaiḥ

dīpairbhakṣyaistathā kṣīraiḥ kulmāṣollopikāguḍaiḥ //
pāyasairmadhusaṃmiśraiḥ palalenodanena ca //

baliḥ suvihito rājanmātṛdoṣavināśanam //
dūrvāpravālamañjiṣṭhānāgaraṃ nāgakeśaram

rocanākuṃkumaṃ caiva candanaṃ ca tathā vacā //
vilepanamidaṃ śreṣṭhaṃ mātṛdoṣavināśanam

gajāśvakapivārāhanakhāni ca ghṛtaṃ tathā //
śreṣṭho'yaṃ kathito dhūpo mātṛdoṣavināśanaḥ

siddhaṃ ghṛtaṃ cāpyatha pañcagavyaṃ purāṇamaśnanti hi ye narendra //
teṣāṃ bhayaṃ naiva hi mātṛjātaṃ bhāvyaṃ kadācidgrahasaṃbhavaṃ vā

iti śrīviṣṇudharmottare prathama khaṇḍe mā० saṃ० mātṛbādhāpratiṣedhonāma saptaviṃśatyuttaradviśatatamo'dhyāyaḥ

1.228
// nāḍāyana uvāca //
tasya devādidevasya prabhāvamaparaṃ śṛṇu //
kathyamānaṃ mayā rājansarvakalmaṣanāśanam

śaṅkaraḥ pārvatī caiva spardhamānau parasparam //
cakraturmaithunaṃ rājansāgraṃ varṣaśataṃ kila

tayoranyatarasyāsīdyadā naiva parājayaḥ //
tatastu devatā khinnāḥ parasparamathābruvan

atrotpatsyati yo garbhastrailokyaṃ sacarācaram //
tejasā mohitaṃ tasya bhaviṣyati na saṃśayaḥ

tasmāttvamatra praviśa devadeva hutāśana //
evamuktastadā vahniḥ praviveśa surottamam

taṃ dṛṣṭvā saṃbhramādeva samuttasthau trilocanaḥ //
tejobhiḥ kṣubhitaṃ tatra vahnerāsyamathāviśat

śaśāpa pārvatī devī bhāryāsu svāsu devatāḥ //
naivāvāpsyatha putrānvai matkodhakaluṣīkṛtāḥ

hutāśanopi śarvasya dahyamāno hi tejasā //
tatyāja garbhaṃ gaṅgāyāṃ sāpi kālena kenacit

tatyāja parvate śvete garbhaṃ vahnisamaprabham //
tena jātena saṃvṛttaṃ sauvarṇaṃ śvetaparvatam

suvarṇaretasastasya śaṃkarasya tu tejasā //
dadṛśuḥ kṛttikā bālaṃ saṃtyaktaṃ tatra gaṅgayā

stanāni pradadustasya kṛpayā rājasattama //
ṣaḍānanastadā bhūtvā ṣaṇṇāmeva stanaṃ papau

tāsāṃ kṣīreṇa dharmātmā vivṛddhaścārutejasā //
kṛttikānāṃ varaṃ prādādyattadvakṣyāmi te nṛpa

nāḍāyana uvāca //
yadā candrasamāyogaṃ gamiṣyatha śubhānanāḥ //
tadā pūjāṃ kariṣyaṃti bhavatīnāṃ tu ye narāḥ

vahneścandramasaścaiva varuṇasya tathā mama //
gandhamālyaistathā puppairdhūpairdīpaistathaiva ca

gandhodakena puṇyena lājābhirmadhunā saha //
apūpaiḥ paramānnena dadhnā gavyena cāpyatha/

kulmāṣaiḥ saphalairbhakṣyairmodakaiḥ pānakaistathā //
prāpsyantyabhimatānkāmāniha loke paratra ca

naktāśanastathā bhūtvā yuṣmatpūjāparāyaṇaḥ //
krīḍitvā suciraṃ nāke mānuṣye tu bhaviṣyati

rūpānvitaḥ satyaparo dyāvāndharme sthitaḥ sanbahubhṛtyayuktaḥ //
kulena śīlena samanvitaśca nārīviśeṣātsubhagā bhavitrī

iti śrīviṣṇudharmottare prathamakhaṇḍe mārkaṇḍeyavajrasaṃvāde kṛttikāpūjāvidhirnāmāṣṭāviṃśatyuttaradviśatatamo'dhyāyaḥ

1.229
// nāḍāyana uvāca //
tatastu prayayau gaṅgā kumāro yatra pāvakiḥ //
mayā tvaṃ janitaḥ putra tamuvāca sureśvaram

asahantyā mahātejastvadīyaṃ parvatottame //
mayā skanda parityaktaṃ tadā garbhagataṃ mama

tasyāstadvacanaṃ śrutvā pāvakirvākyamabravīt //
// skanda uvāca //
nāhaṃ gṛhaṃ te yāsyāmi śambhurme daivataṃ pitā

anugrahaṃ kariṣyāmi tavāhaṃ suranimnage //
vaiśākhamāsaśuklasya tṛtīyāyāṃ varānane

mānuṣyamavatīrṇāsi tadā pūjāmavāpsyasi //
taminnahani yaḥ snānamācariṣyati te śubhe

rājasūyāśvamedhābhyāṃ phalena sa tu yokṣyati//
tasminnahani yaḥ pūjāṃ yatra tatra vyavasthitaḥ

gandhamālyopahārādyairdhūpadīpānnasaṃpadā //
kartā tava mahābhāge tvattoyasnānajaṃ phalam

dhruvamāpsyati dharmajñe nātra kāryā vicāraṇā //
tasminnahani yatkiñcitpradadyācchraddhayānvitaḥ

akṣayaṃ tatphalaṃ tasya bhaviṣyati na saṃśayaḥ //
akṣayā sā tithirjñeyā kṛttikābhiryutā yadi

bhaviṣyati mahābhāga viśeṣeṇa phalapradā

tasmindine ye tava cārugātri pūjāṃ kariṣyaṃti tatheritāṃ prāk //
te nākaloke suciraṃ nirupya lokāngamiṣyanti jalādhipasya

iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavacane akṣayatṛtīyāmahālayaṃ nāmaikonatriṃśaduttaradviśatatamo'dhyāyaḥ

1.230
nāḍāyana uvāca //
tatastu jātakarmādyāḥ kriyāstasya mahātmanaḥ //
viśvāmitrastu kṛtavānmaṅgalāni tathaiva ca

etasminneva kāle tu devanāthāya vajriṇe //
śvetajātamathācakhyuḥ kumāraṃ dīptatejasam

nidhanāya matiṃ cakre tadā tasya purandaraḥ //
daivataiḥ pitṛbhiryajñaiḥ prabhurdānavarākṣasaiḥ

bhūtanāgapiśācaiśca pitṛgandharvamānuṣaiḥ //
saṃmantrya nidhane tasya sṛṣṭavānsa mahāgrahān

devadaityagrahānghorānpitṛdānavarākṣasān //
yakṣagandharvanāgānāṃ nṛṇāṃ ca piśitāśinām

te grahā bahusāhasrā nānāpraharaṇodyatāḥ //
abhijagmuḥ śvetagiriṃ kumāravadhakāmyayā

te grahā bahusāhasrā grahāṃśca śataśaḥ śivaḥ //
skaṃdo grahānvai sasṛje pūrvagrahaniśācarān

mahābalānmahāvīryānkāmagānkāmarūpiṇaḥ //
anekaśatasāhasrānnānāveśānmanojavān

teṣāṃ pradhānānvakṣyāmi tanme nigadataḥ śṛṇu //
skaṃdo viśākhaśca tathā naigameyastathaiva ca //
bhīmo bhīmakaraḥ kravyo nirataḥ krośa eva ca

kravyādotha havirbuddhiḥ koṭimudgarikaḥ pṛthuḥ //
kālaścāpyupakālaśca siddhārthaḥ puṣpakastathā

puṣpamitraḥ kokilakaḥ siddho laṃbodarastathā //
khalyūḥ kapoto lamboṣṭhaḥ tathā nāyāsa eva ca

yadaṇḍo gṛddhranāsāśca gṛddhravṛttuka eva ca //
kṣudrakaḥ kālakālaśca kālastatpuruṣastathā

vidyudbhūto'tha saṃvarto vartaścāvarta eva ca //
śitikaṇṭhaḥ kapardī ca kacchapaḥ parikaṇṭakaḥ

pariprakāśo mattaśca mātaṅgavasanastathā //
gadarākṣaḥ piśācaśca vīranāśo valīmukhaḥ

mahābhūtaśca nandaśca somānandaḥ pramodakaḥ //
ānando vyavasāyaśca niścayo'tha parākramaḥ

jayaśca vijayaścaiva sañjayaḥ kalpa eva ca ///
puṣpadanto dantavakro heguṇḍirbhīṣaṇastathā

vasubhūtirvasustrāto jīvakastāpasastathā //
vīrabāhuḥ subāhuśca sundaro gaṇḍa eva ca

tuṇḍā vicelā godaṃtaḥ kalaśaḥ kalaśocaraḥ //
śīryagrāho lalāṭastho grīvāgrābharato grahaḥ

parilepakajātyandhau karālaḥ kuñjanāmanau //
anyedyukaḥ satatagastraitīyakacaturthakau

vyarocako netrarogaḥ kāsaśvāsānugastathā //
dhūtapāpaḥ pāpahitaḥ pāpācārastathaiva ca

kāṇḍo dhanañjayaścaiva śaṭho naiṣkṛtikastathā //
vasudhātā vasumanā gauraḥ śotho galagrahaḥ

bhramaśca cittamohaśca tathā kāryavighātakaḥ //
sarvakāryakaraścaiva jṛṃbhakaścāryakastathā

ete cānye ca balinaḥ kāmarūpā vihaṅgamāḥ //
trailokyasṛṣṭisaṃhārasamarthā vividhāyudhāḥ

nānārūpadharā vīrā nānāvividhavāsasaḥ //
prādudravanmahānghorānpūrvadevairvisarjitān

aviṣahyatamātmāno grahāḥ skandagrahāstathā //
skandaṃ devavaraṃ sarve tadā śaraṇamāgatāḥ

tāṃstu vai śaraṇaṃ prāptānskaṃdo vacanamabravīt //
skaṃda uvāca//
śaraṇaṃ vai prapannānāṃ varaṃ dāsyāmahaṃ grahāḥ

varayadhvaṃ yathākāmaṃ pūjyā me śaraṇārthinaḥ //
grahā ūcuḥ //
bhagavanbhakṣayiṣyāmastvatprasādena mānuṣān

etadvaramabhīṣṭaṃ naḥ sarveṣāṃ dīptavigraha //
skaṃda uvāca //
durācārāṃstathā loke gandhamālyānulepane

teṣāṃ śarīre ratyarthaṃ vasadhvaṃ nātra saṃśayaḥ//
ye bhaktāstryambake deve tathā deve janārdane

āstikāñchraddhadhānāṃśca varjayadhvaṃ prayatnataḥ //
varārthamapi saṅgṛhya nyastā karmādibhiḥ kramaḥ

tyakṣadhvaṃ puruṣāñśīghraṃ mama vijñāya śāsanam //
// nāḍāyana uvāca //
evamuktā grahāḥ sarve svāmye cakrustadā śiśum

kumāraṃ śarvatanayaṃ mahābalaparākramam //
skandenaiva yathoktaṃ tu skandaṃ skandagrahāstadā

sametā sarve vacanamidamucurnarādhipa //
asmākamapi deveśa prasādaṃ kartumarhasi

evamukto'tha dharmātmā grahā nskandastvabhāṣata //
yāvatṣoḍaśavarṣāṇi mānavānāṃ bhavantyuta

tāvadbhavanto bādhantu manuṣyāṇāṃ tathā prajāḥ //
tatrāpi balikarmādyaiḥ kṣemaṃ teṣāṃ kariṣyatha //
tataḥ pūrvaṃ grahāṇāṃ tu pūjyā loke bhaviṣyatha

etāvaduktvā bhagavānkumāro dadau grahāṇāmaparaṃ śarīram //
dehānsvakānnāyaka ugrasattvo lokasya rakṣārthamatīva hṛṣṭaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde śailūṣaṃ prati nāḍāyanavākye triṃśa duttaradviśatatamo'dhyāyaḥ