Vishnudharmottara Purana · Chapter 1.22

vajra uvāca //
brahmanviṣṇupadī gaṃgā trailokyaṃ vyāpya tiṣṭhati //
yathā tathā bhṛguśreṣṭha sarvameva prakīrtaya

mārkaṇḍeya uvāca //
praviśya devī brahmāṇḍaṃ viṣṇulokamupāgatā //
brāhmīṃ sabhāṃ plāvayitvā tapolokamupāgatā

janalokaṃ gatā tasmānmaharllokaṃ tato gatā //
svargalokaṃ samāsādya praviṣṭā candramaṇḍalam

candramaṇḍalavibhraṣṭā bhuvarlokamupāgatā //
ākāśagaṃgā kathitā tatra sā rativardhinī

tasyāstu dṛśyate panthāḥ satataṃ vyomni nirmale //
ākāśagaṃgāmadhye sā merau nipatitā girau

merumadhyādadṛśyantī dṛśyantī ca tathā kvacit //
prayātā sarvavarṣāṇi dvīpāni ca mahāmate////
sā tu devī jayā nāma kuruvarṣe hradāstu te //
tebhyaḥ śāntā ca sādhvī ca dvidhā gaṃgā vinissṛtā

jyotsnā ca mṛgamandā ca smṛtā hairaṇvatī śubhā //
puṇḍarīkā payodā ca ramye varṣe nigadyate // ८ /
bhadrā ca kathitā devī gāndharvī ca mano'nugā //
ilāvṛte tathā saiva proktā jāmbavatī śubhā

tasyāstīrabhavaṃ mūrdhni kanakaṃ dhāryate suraiḥ//
ketumāle ca kathitā nirmalā naḍvalā tathā

manasvinī jyotiṣmatī harivarṣe nigadyate//
tathā kimpuruṣākhye tu rambhā candravatī śubhā

/
indradyumnapayodā sā kāśaikā matipāvanī //
manojavā tāmraparṇī gabhastimatimālinī

nāgadvīpe nāgavatī saumye somaprabhā tathā //
rudralokaṃ tataḥ prāptā brahmalokaṃ tato gatā

gāndharvī caiva gandharvī vāruṇe varuṇahradā //
hrādinī hlādinī caiva puṇyatoyā ca varṣiṇī

sītā cakṣuśca sindhuśca gaṃgā cāsminprakīrtitā //
amarānniṣadhānsarvāndhīvarānṛṣikāṃstathā

oṣṭhaprāvaraṇānsaumyānkarṇaprāvaraṇāṃstathā ////
kālodarānvikarṇāṃśca hrādinī tu niṣevate

indradyumnasaraḥ puṇyamupacārādajāyata //
tathā kharapadāndeśānvetraśaṅkupadānapi

tañjānakāmataṃ caiva hlādinī tu niṣevate //
daradāñjahuḍāṃścaiva kāśmīrānnairasānkurūn

gāndhārāndaradābhīrānkuparvānbhīmarauravān // ५३/
śivaparvānindraparvānsindhutīrānniṣevate

devāndaityānkālakeyāngandharvānkinnarāṃstathā //
vidyādharāṃstathā nāgānsuparvānsumanoharān

kalāpagrāmakāṃścaiva naranārāyaṇāśramam //
kirātāṃśca pulindāṃśca mayasya nagarīṃ tathā

kutūnsabhāratāṃścaiva pulindām̐ścaiva bhāgaśaḥ //
pāñcālānkāśayānvatsānmāgadhāṃstāmraliptakān

sahyottarāṃśca vaṅgāṃśca tathā śrāvastivāsina //
aṅgānvaṃgānsapuṇḍrāṃśca gaṃgā bhāvayate śubhā

hrādinī hlādinī caiva pāvanī jāhnavī tathā //
praviṣṭā sāgaraṃ pūrvaṃ dvīpesminnṛpasattama

sītācakṣuśca sindhuśca paścimaṃ nṛpa sāgaram //
gaṅgāvyāptistava proktā jambūdvīpe mayānagha

lokeṣu ca tathā rājandvīpeṣvanyeṣu me śṛṇu //
sukumārī kumārī ca sukṛtā sevinī tathā

ikṣuśca veṇukā nandā śākadvīpe ca saptadhā //
śālmale tvatha gomede dvīpe puṣkarasaṃjñake

nadītvaṃ sā samutsṛjya codadhitvamupāgatā //
tasmindvīpatraye nadyo na santi yadunandana

udakānyudbhidānyeva teṣu santi sahasraśaḥ //
evaṃ bhūmitalaṃ plāvya pātālaṃ kṛṣṇamṛttikam

ekībhūtā praviṣṭā sā bhogavatyāṃ samīpataḥ //
śvetabhaumaṃ gatā tasmādraktabhaumaṃ tato gatā

śilābhaumaṃ gatā tasmādrukmabhaumaṃ tato gatā //
rukmabhaumādapi gatā raudraṃ tejassudāruṇam

tato'pi vilayaṃ gatvā vārāhaṃ lokamāgatā //
vārāhalokādbrahmāṇḍaṃ tadarthaṃ bhinna vāhinī

chidreṇa tena sā devī svāṃ yoniṃ punarāgatā

evaṃ narendreśa jagatsamagramākramya gaṃgā satataṃ sthitā yā //
tasyāḥ prabhāvaśravaṇādaśeṣaṃ pāpaṃ narāṇāṃ samupaiti śāṃtim

//
iti śrīviṣṇudharmottare prathamakhaṇḍe mārkaṇḍeyavajrasaṃvāde gaṃgāvyāptirnāma dvāviṃśatitamo 'dhyāyaḥ