Vishnudharmottara Purana · Chapter 1.21

vajra uvāca //
gaṅgā viṣṇupadī loke kimarthaṃ kathitā budhaiḥ //
tanmamācakṣva tattvena bhṛguvaṃśavivardhana!

mārkaṇḍeya uvāca //
svāyambhuventare pūrvaṃ catvāro devatāgaṇāḥ //
jayākhyāścājitākhyāśca śukrākhyāśca prakīrtitāḥ

teṣāṃ babhūva devendro viśvabhuglokapūjitaḥ //
āsaṃstasyā surā ghorāstadā dāyādabāndhavāḥ

babhūva rājā teṣāṃ ca bāṣkalirnnāma nāmataḥ //
yena vikramya śakrasya hṛtaṃ rājyaṃ tadā balāt

hṛtarājyastu devendro brahmāṇaṃ śaraṇaṃ gataḥ //
brahmāpi śakramādāya jagāma śaraṇaṃ harim

nivedayāmāsa tadā devadevāya śārṅgiṇe //
bāṣkalervijayaṃ sarvaṃ brahmā śubhacaturmukhaḥ

śrībhagavānuvāca //
brahmanpratyāhariṣyāmi rājyamasya śatakratoḥ//
divi deveṣu dharmātmannivṛtto bhava mā ciram

ahaṃ vāmanarūpeṇa prayāsye bāṣkaliṃ nṛpam //
māṃ dṛṣṭvā vismitaṃ tantu gatvā yācatu devarāṭ

lokatrayaṃ mama hṛtaṃ tvayā vikramya bāṣkale //
tatrāgniśaraṇārthāya dīyatāṃ me kramatrayam

atīva hrasvagātrasya vāmanasyāsya mā ciram //
evamuktastu śakreṇa tadā dātā kramatrayam

mārkaṇḍeya uvāca // //
ityevamukto devena brahmā svabhavanaṃ gataḥ //
devo'pi vāmano bhūtvā prayāto yatra bāṣkaliḥ

bāṣkalirvāmanaṃ dṛṣṭvā vismayotphullalocanaḥ //
nirīkṣya taṃ yathākāmamasurairbahubhirvṛtaḥ

etasminneva kāle tu śakrastaṃ deśamāyayau //
pādyārghyācamanīyādyaiḥ śakraṃ saṃpūjya bāṣkaliḥ

kimāgamanakāryaṃ te tamuvāca prahṛṣṭavāk //
atyāścaryamidaṃ manye tavāgamana kāraṇam

śakra uvāca //
lokatrayaṃ me'pahṛtaṃ vikrameṇa tu bāṣkale! //
tatrāgniśaraṇārthāya dīyatāṃ me kramatrayam

atīva hrasvagātrasya vāmanasyāsya pārthiva //
bhūmibhāge tu pārakye vastuṃ na tvahamutsahe

bāṣkaliruvāca //
kramatrayaṃ vāmanake devarāja kṛtaṃ śubham //
tatrāssvamuditaḥ prāptaḥ sukhī surapate bhava

mārkaṇḍeya uvāca //
evamukto bāṣkalinā tyaktvā rūpaṃ tu vāmanam

harirvicakrame lokāndevānāṃ hitakāmyayā //
brahmalokaṃ tato gatvā..... //
devasya vāmaścaraṇo niviṣṭo dānavālaye

tataḥ kramaṃ sa prathamaṃ dadau sūryye jagatpatiḥ //
dvitīyaṃ ca dhruve devastṛtīyena ca yādava /

brahmāṇḍaṃ tāḍayāmāsa hyasaṃpūrṇena keśavaḥ //
brahmāṇḍastāḍitastena chidratāmagamatprabho

brahmāṇḍabāhyatoyena śataghnenāmbhasāvṛtam //
tenacchidreṇa tattoyaṃ viveśāṇḍaṃ mahīpate

aṃguṣṭhāgrakṣatādaṇḍādyatpraviṣṭaṃ jalaṃ śuci //
prāptā devanadītvaṃ tu sā tu viṣṇupadī nadī

devanadyā tayā vyāptaṃ brahmāṇḍaṃ sakalaṃ nṛpa! //
vibhūtibhirmahābhāga sarvānugrahakāmyayā

vāmanena samākrāntāḥ sarve lokā yadānagha! //
asuraiste tadā tyaktā devānāṃ satyabāndhavaiḥ

pātālaśca yadā tena nākrāntaṃ harimedhasā //
asuraistaistadā ghorairuṣyate yadunandana!

devo'pi hṛtvā trailokyaṃ jagāmādarśanaṃ tadā //
pātālanilayaścāpi sukhamāste sa bāṣkaliḥ

śakro'pi pālayāmāsa vipaścidbhuvanaṃ tadā //
imaṃ trivikramaṃ nāma prādurbhāvaṃ jagadguroḥ

gaṅgāsaṃbhavasaṃyuktaṃ sarvakilviṣanāśanam

tenaiva devadevena prāpte vaivasvate'ntare //
bhūyo lokāstrayaḥ krāntāḥ padā saṃyamino nṛpa

anena kāraṇenoktā gaṃgā viṣṇupadī nṛpa //
yayā sarvamidaṃ vyāptaṃ trailokyaṃ sacarācaram

gaṃgāsamutpattiriyaṃ mayoktā śrutvaiva yāṃ muñcati sarvapāpam //
pāpairviśiṣṭo'pi naro nṛvīra sādhuvratastu tridivaṃ prayāti

iti śrīviṣṇudharmottare prathamakhaṇḍe mārkaṇḍeyavajrasaṃvāde trivikramopākhyānaṃ nāmaikaviṃśa titamo'dhyāyaḥ