Vishnudharmottara Purana · Chapter 1.20

vajra uvāca //
bhāgīrathītvaṃ gaṅgātvaṃ devanadyā mayā śrutam //
kirmarthaṃ jāhnavī loke kathyate sāgaraṅgamā

mārkaṇḍeya uvāca //
pañcālākhyo'sti viṣayo madhyadeśe mahīpate /
svadharmakarmaniratairyuto varṇāśramaiḥ sadā

mahodayaṃ puraṃ tatra kuśastambhena nirmitam //
sarvaratnasamākīrṇaṃ kānyakubjeti viśrutam

tasminbabhūva bhūpālo jahnuḥ paramadhārmikaḥ //
yasya kīrtimataḥ kīrtirbrahmāṇḍaṃ vyāpya tiṣṭhati

sa kadācinmahīpālo hayamedhamupāharat //
dīkṣitasya narendrasya yajñavāṭaṃ tu nimragā

plāvayāmāsa vegena jalaughairyadusattam

plāvite yajñavāṭe tu rājā gaṅgāṃ tadābravīt

asya gaṅgai'valepasya sadyaḥ phalamavāpnuhi //
pibāmi sakalaṃ toyaṃ tava sāgaravallabhe

evamuktvā papau rājā sarvaṃ bhāgīrathījalam //
tapasā mahatā rājaṃstathā yogabalena ca

dṛṣṭvaiva gaṅgāṃ nistoyāṃ dīnairmunijanaistataḥ //
prasāditastu gaṅgārthe tatyāja śravaṇena tām

duhitṛtve ca jagrāha rājā bhāgīrathīṃ tadā //
tena sā kathitā loke jāhnavī yadunandana

atīva darpito rājā gaṅgāyāḥ sa yadā nṛpa //
yaśo'rthaṃ plāvayāmāsa yajñavāṭaṃ tadānagha

evaṃ triloke nṛpa jahnukanyā proktā budhairviṣṇupadī pavitrā //
himācalasyādripatestanūjā samudrapatnī varadā viśokā

iti śrīviṣṇudharmottare prathamakhaṇḍe mārkaṇḍeyavajrasaṃvāde jahnukanyopākhyānaṃ nāma viṃśatitamo'dhyāyaḥ