વિષ્ણુધર્મોત્તરપુરાણમ્ · અધ્યાય 1.20

વજ્ર ઉવાચ ॥
ભાગીરથીત્વં ગઙ્ગાત્વં દેવનદ્યા મયા શ્રુતમ્ ॥
કિર્મર્થં જાહ્નવી લોકે કથ્યતે સાગરઙ્ગમા

માર્કણ્ડેય ઉવાચ ॥
પઞ્ચાલાખ્યોઽસ્તિ વિષયો મધ્યદેશે મહીપતે ।
સ્વધર્મકર્મનિરતૈર્યુતો વર્ણાશ્રમૈઃ સદા

મહોદયં પુરં તત્ર કુશસ્તમ્ભેન નિર્મિતમ્ ॥
સર્વરત્નસમાકીર્ણં કાન્યકુબ્જેતિ વિશ્રુતમ્

તસ્મિન્બભૂવ ભૂપાલો જહ્નુઃ પરમધાર્મિકઃ ॥
યસ્ય કીર્તિમતઃ કીર્તિર્બ્રહ્માણ્ડં વ્યાપ્ય તિષ્ઠતિ

સ કદાચિન્મહીપાલો હયમેધમુપાહરત્ ॥
દીક્ષિતસ્ય નરેન્દ્રસ્ય યજ્ઞવાટં તુ નિમ્રગા

પ્લાવયામાસ વેગેન જલૌઘૈર્યદુસત્તમ્

પ્લાવિતે યજ્ઞવાટે તુ રાજા ગઙ્ગાં તદાબ્રવીત્

અસ્ય ગઙ્ગૈઽવલેપસ્ય સદ્યઃ ફલમવાપ્નુહિ ॥
પિબામિ સકલં તોયં તવ સાગરવલ્લભે

એવમુક્ત્વા પપૌ રાજા સર્વં ભાગીરથીજલમ્ ॥
તપસા મહતા રાજંસ્તથા યોગબલેન ચ

દૃષ્ટ્વૈવ ગઙ્ગાં નિસ્તોયાં દીનૈર્મુનિજનૈસ્તતઃ ॥
પ્રસાદિતસ્તુ ગઙ્ગાર્થે તત્યાજ શ્રવણેન તામ્

દુહિતૃત્વે ચ જગ્રાહ રાજા ભાગીરથીં તદા ॥
તેન સા કથિતા લોકે જાહ્નવી યદુનન્દન

અતીવ દર્પિતો રાજા ગઙ્ગાયાઃ સ યદા નૃપ ॥
યશોઽર્થં પ્લાવયામાસ યજ્ઞવાટં તદાનઘ

એવં ત્રિલોકે નૃપ જહ્નુકન્યા પ્રોક્તા બુધૈર્વિષ્ણુપદી પવિત્રા ॥
હિમાચલસ્યાદ્રિપતેસ્તનૂજા સમુદ્રપત્ની વરદા વિશોકા

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે જહ્નુકન્યોપાખ્યાનં નામ વિંશતિતમોઽધ્યાયઃ