Vishnudharmottara Purana · Chapter 1.19

// mārkaṇḍeya uvāca //
rājyaṃ prāpya mahātejā dilīpatanayo nṛpaḥ //
narakasthān pitṝñśrutvā rājyaṃ nyasyāśu vṛddhaye

gaṅgāmārādhayāmāsa tapasā mahatā tadā //
yamaiśca niyamai rājannaparṇāśanakaistathā

daśavarṣasahasrāṇi tapastepe bhṛśaṃ nṛpaḥ //
atha gaṃgā mahādevī prasannābhūdgataklamā

bhagīratho'pi dharmātmā varaṃ lebhe kutūhalī //
tato lekhanadī devī prāvocattaṃ bhagīratham

patantyā gaganātsoḍhuṃ mama vegaṃ vasundharā

na samarthā yadā tasmāttoṣayasvāśu śaṃkaram //
sa hi śaktaḥ pataṃtyā me vegaṃ soḍhuṃ nareśvara

evamuktvā yayau devī tadāntardhānamīśvarī//
bhagīratho'pi dharmātmā tapastepe sudāruṇam

ārādhanārthaṃ devasya śaṅkarasya mahātmanaḥ//
tapaso'nte mahātejā dṛṣṭavāñjagadīśvaram

devadeva uvāca//
tapasogreṇa te rājan prasanno'smi yathepsitam//
dadāmi te yato bhaktiṃ pitṝṇāṃ cākṣayaṃ yaśaḥ

mārkaṇḍeya uvāca//
evamuktastu devena pūjayitvā maheśvaram //
jagāma gaṅgāṃ manasā rājā pūrṇamanorathaḥ

śaṅkarādhiṣṭhitaṃ jñātvā nṛpateśca cikīrṣitam //
papāta gananādgaṃgā tadā rājīvalocana!

gaṃgāyāḥ patanaṃ jñātvā brahmā taṃ deśamāgataḥ //
yamendravaruṇāndevānpuraskṛtyāmitaujasaḥ

ṛṣayo nāgagandharvavidyādharamahoragāḥ //
suparṇakinnaragaṇāstathaivāpsarasāṃ gaṇāḥ

vimānaśatasaṃbādhaṃ tadbabhūva nabhastalam //
prakīryamāṇaṃ kusumairdevanāgavirājitam //
suraprabhādurnirīkṣyaṃ tadābharaṇabhāsuram

sugandhi cāru pavanaṃ suratūryanināditam //
nabhasastasya madhyena papāta gaganānnadī

viśāmi bhittvā pātālaṃ srotasā gṛhya śaṅkaram //
ityevaṃ duṣṭabhāvā sā papāta haramūrdhani

jñātvā krūramabhiprāyaṃ devyā devaḥ pinākabhṛt//
jaṭākalāpe tāṃ devīṃ tiraścakre caturmukhaḥ

babhrāma sā tiro bhūtvā tatraiva tvaciraṃ nadī //
tasyāḥ pataṃtyā ye kecidbiṃdavaḥ kṣitimāgatāḥ

taiḥ kṛtaṃ pṛthivīpāla tadā vindusaraḥ śubham//
devopi dṛṣṭvā rājānaṃ kṣudhayā vyākulendriyam

tatyāja tāṃ tadā śīghraṃ jaṭāgreṇa maheśvaraḥ

dhṛtagaṃgo jagāmātha tato'ntardhānamīśvaraḥ //
maheśvaraśirobhraṣṭā praviṣṭā ca saraḥ śubham

tasmādviniḥsṛtā bhūyaḥ saptadhā devanimnagā //
hlādinī hrādinī caiva plāvinī ceti prācyagāḥ

sītāvaktraśca sindhuśca pratīcyabhimukhā gatāḥ //
dakṣiṇena tathā gaṃgā bhagīrathapathānugā //
kvacidvegena mahatā kvacinmandavisarpiṇī

kvacitphenākulajalā kvacidāvartamālinī //
kvacidgambhīraśabdaughā niḥśabdā ca tathā kvacit

kvaciddhaṃsaravoddāmā cakravākayugā kvacita //
ūrmimālākulajalā kusumotkaramaṇḍitā

jalasattvaśatākīrṇā surasiddhasukhapradā //
amṛtasvādusalilā harasaṃsarganirmalā

viṣṇupādaprahārotthā sarvapāta kanāśinī //
evaṃ saṃprāpya sā viṃdhyaṃ praviṣṭā pūrvasāgaram

sāgareṇa samāsādya pātālaṃ bhīmadarśanam //
plāvayāmāsa tadbhasma sāgarāṇāṃ mahātmanām

bhasmani plāvite sarve gatāste sāgarā divam

evaṃ dharāṃ devanadī prayātā supuṇyatoyā ṛṣivaryajuṣṭā //
mahānubhāvā nṛpa jahnukanyā niśreṇibhūtā tridivaprayāṇe

iti śrīviṣṇudharmottare prathamakhaṇḍe mārkaṇḍeyavajrasaṃvāde gaṅgāvataraṇanāmaikonaviṃśo'dhyāyaḥ