Vishnudharmottara Purana · Chapter 1.181.185

1.181
// śāmbarāyaṇyuvāca //
cākṣuṣasya manoḥ putrānṣaṣṭhasya śṛṇu vāsava //
ūruḥ pūruḥ śatadyumnaḥ tapasvī satyavāndhṛtiḥ

agniṣṭudatirātraśca sudyumnaśca tathānagha //
haviṣmānunnataḥ śrīmānsudhāmā vijayastathā

abhimānaḥ sahiṣṇuśca madhuśrīrṛṣayaḥ smṛtāḥ //
āḍhyāḥ prasūtā bhāvyāśca lekhāśca pṛthukāstathā

aṣṭakāśca gaṇāḥ pañca tadā proktā divaukasām //
teṣāṃ manojavo nāma babhūvendraḥ pratāpavān

āsaṃstasyāsurā ghorāstadā dāyādabāndhavāḥ //
yeṣāṃ babhūva nṛpatirmahāmālo balādhikaḥ

sa kadācidvanaṃ yāto mṛgayāṃ pāpaniścayaḥ //
tatra candrāṃśusaṃkāśaṃ dadarśāśvaṃ manoharam

tamāruroha durbuddhirmṛgāghātacikīrṣayā //
tamārūḍhaṃ samādāya tadā vegātturaṅgamaḥ

gatvā pāre samudrasya cikṣepopari durmatim //
kṣiptamātraḥ sa durbuddhiḥ pavanenāpavāhitaḥ

anāsāditatoyaśca pavanena sa tṛhyate //
adyāpi sumahātejā lokālokasya bāhyataḥ

amṛtyuvaradānena sa tu pāpaḥ svayambhuvaḥ //
vāyumārgaṃ samāśritya na tu prāṇairviyujyate

evaṃ sa ghoro varadānadarpādamṛtyurastīti kṛtāparādhaḥ //
devadvijānāṃ hayarūpadhārī cikṣepa viṣṇuḥ pavanapravāhe

iti śrīviṣṇudharmottare prathamakhaṇḍe mārkaṇḍeyavajra saṃvāde paṣṭhacākṣuṣamanvantaravarṇanannāmaikāśītyadhikaśatatamo'dhyāyaḥ

1.182
// śāmbarāyaṇyuvāca //
athānyasya bhaviṣyasya manovairvasvatasya ca //
saptamasya pravakṣyāmi tava putrānyaśasvinaḥ

ikṣvākuratha nābhāgo viṣṇuḥ śaryātireva ca //
avṛdhyatustathā prāṃśurmahātmā diṣṭa eva ca

karūṣaśca pṛthudhraśca sudyumnaśca manoḥ sutāḥ //
atrirvasiṣṭho bhagavāñjamadagniśca kaśyapaḥ

gautamaśca bharadvājo viśvāmitro'tha saptamaḥ //
devā hyekonapañcāśanmarutaḥ parikīrtitāḥ

dvāvaśvinau vinirdiṣṭau viśvedevāstathā daśa //
daśaivāṅgiraso devā hyevaṃ devagaṇā nava

yeṣāṃ śakrastu mojaṃbī nāmnā śatrukṣayaṅkaraḥ //
ghorāstathāpi ye tvāsandaityā dāyādabāndhavāḥ

teṣāṃ babhūva nṛpatirhiraṇyākṣo mahābalaḥ //
nṛvarāheṇa vapuṣā taṃ jaghāna hariḥ purā

daityeśvaraṃ taṃ surasaṃghabhīmaṃ mahābalaṃ parvatamātrakāyam //
jaghāna cakreṇa hariḥ prasahya rūpaṃ samāsthāya varāhaśīrṣam

iti śrīviṣṇudharmottare prathamakhaṇḍe mārkaṇḍeyavajrasaṃvāde saptamavaivasvatamanvantaravarṇanannāma dvyaśītyadhikaśatatamo'dhyāyaḥ //

1.183
śakra uvāca //
asminkalpe mahābhāge bhaviṣyā manavastu ye //
teṣāṃ putrānnṛṣīndevāñchakra dāyādabāndhavān

tasya ghātaṃ tathā kṛṣṇātsarvametatprakīrtaya //
sarvajñakalpā bhavatī divyajñānā matā mama

śāmbarāyaṇyuvāca //
aṣṭamasya bhaviṣyasya sāvarṇasya manoḥ sutān //
kathayiṣyāmi te śakra mahābalaparākramān

vijayaścāvarīvāṃśca nirdohassatyavākkṛtiḥ //
cariṣṇuścāpyadhṛṣṇuśca vācaḥ samatireva ca

sāvarṇasya manoḥ putrānṛṣīṃścaiva nibodha me //
aśvatthāmā kṛpo vyāso gālavo dīptimānatha

ṛṣyaśṛṅgastathā rāma ṛṣayaḥ parikīrtitāḥ //
sutapā amṛtābhāśca ātreyāśca gaṇāstrayaḥ

sarve viṃśatibhirdevagaṇairyuktā mahātmanām //
yeṣāmindro bhaviṣyastu balirdānavasattamaḥ

tvatkṛte devadevena baddho yastridaśeśvaraḥ //
dāyādā bāndhavāstasya na bhaviṣyanti vāsava

śakratvaṃ tena kartavyaṃ manvantaramakaṇṭakam //
devadevakaranyastaṃ dānameta nmahāsuraḥ

trailokyarājā bhavati sāvarṇasyāntare manoḥ // //
tasminmanvantare prāpte himaśailālayo balī

bhaviṣyati durācāro nānolo nāma rākṣasaḥ //
brahmalabdhavaro raudrastrailokyotsādane rataḥ

taṃ vadhiṣyati dharmātmā viṣṇurgaruḍavāhanaḥ //
cakreṇa śatadhāreṇa jagatāṃ hitakāmyayā

daṃṣṭrākarālaṃ vikaṭograveṣaṃ nīlāñjanābhaṃ bhayadaṃ triloke //
cakreṇa devaḥ pravidārya kartā lokaṃ samagraṃ bhayaviprayuktam

iti śrīviṣṇudharmottare prathamakhaṇḍe mārkaṇḍeyavajrasaṃvāde śakraśāmbarāyaṇīsaṃvāde'ṣṭamasāvarṇimanvantaravarṇanannāma tryaśītyadhikaśatatamo'dhyāyaḥ

1.184
śāṃbarāyaṇyuvāca //
brahmaputrasya tu manornavamasya sutāñchṛṇu //
dhṛtiketurdīptiketuḥ pañcahasto nirākṛtiḥ

pṛthuśravā bṛhaddyumna ṛcīko bṛhatāṃ gaṇaḥ //
brahmaputrasya te putrā ṛṣayaśca nibodha me

medhātithirdyutiścaiva savano vasureva ca //
jyotiṣmānhavyasatyau ca ṛṣayaḥ parikīrtitāḥ

pārā marīcigarbhāśca svadharmāṇaśca te trayaḥ //
gaṇā dvādaśakāḥ proktā yeṣāmindro bhaviṣyati

vibhurnāma mahātejāḥ sarvadeveśvaro valī //
dāyādā bāndhavāstasya ye bhaviṣyanti dhārmikāḥ

kālakakṣa iti khyātāsteṣāṃ rājā bhaviṣyati //
tasminmanvantare rājā vasunābho bhaviṣyati

putrastu bhāvatā tasya vāsudevo mahīpatiḥ //
cakravartī mahātejāḥ padmanābha iti śrutaḥ

devāsure tu saṃgrāme kālakākṣaṃ raṇotkaṭam //
naravadhyaṃ mahātejāḥ padmanābho vadhiṣyati

śareṇa jāmbūnadabhūṣitena brahmāstrayuktena raṇapracaṇḍam//
hatvāsuraṃ kālasamaprabhāvaṃ rājā sa lokasya bhayaṃ nihantā

//
iti śrīviṣṇudharmottare prathamakhaṇḍe mārkaṇḍeyavajrasaṃvāde śakraśāmbarāyaṇī saṃvāde navamabrahmaputramananvantaravarṇanannāma caturaśītyadhikaśatatamo'dhyāyaḥ १८४//
1.185
śāmbarāyaṇyuvāca //
dharmaputrasya tu manordaśamasya sutāñchṛṇu //
sukṣetra uttamaujāśca bhūriśoṇaśca vīryavān

śatānīko nimirmitro vṛṣaseno jayadrathaḥ //
bhūridyumnaḥ suvarmā ca dharmaputramanoḥ sutāḥ

āpomūrtirhaviṣmāṃśca sṛtikiścāvyayastathā //
nābhāgaḥ pramitaścaiva saurabhā ṛṣayastathā

prāṇākhyāḥ śatasaṃkhyāśca devatānāṃ gaṇāstathā //
bhavitā tasya bhavitā śāntirindraḥ pratāpavān

dāyādābāndhavāstasya bhaviṣyantyasurāśca ye //
teṣāṃ ca bhavitā rājā bālī nāma mahāsuraḥ

dyotayiṣyati taṃ viṣṇurgadayā bhīmavegayā //
devāsure tu saṃgrāme devānāṃ hitakāmyayā

gadānipātābhihate surendre mahābale devavareṇa tena //
trailokyametadbhavitā samagraṃ vinaṣṭadoṣaṃ suraviprajuṣṭam

iti śrīviṣṇudharmottare prathamakhaṇḍe mārkaṇḍeyavajrasaṃvāde śakraśāmbarāyaṇīsaṃvāde daśamadharmaputramanvantvavarṇanaṃ nāma pañcāśītyadhikaśatatamo'dhyāyaḥ //