Vishnudharmottara Purana · Chapter 1.169

vajra uvāca //
aṭavyo dāruṇā brahmansiṃhavyāghraniṣevitāḥ //
taskarācaritā ghorāḥ sarīsṛpavimiśritāḥ

nityotthitasya cādhvānaṃ dāhakṣayakaraṃ param //
ataḥ svalpataraṃ karma brūhi me keśavārcane

mārkaṇḍeya uvāca //
ataḥ svalpataraṃ rājandevaveśmānulepanam //
mahāphalaṃ vinirdiṣṭaṃ brāhmaṇairvedapāragaiḥ

sammārjanaṃ tu yaḥ kuryātpuruṣaḥ keśavālaye //
rajastamobhyāṃ nirmuktaḥ sa bhavennātra saṃśayaḥ

pāṃsūnāṃ yāvatāṃ rājankuryātsammārjanaṃ naraḥ //
tāvantyabdāni sa sukhī nākamāsādya modate

abhyukṣaṇaṃ tu yaḥ kuryātpānīyena surālaye//
sa śāntapāpo bhavati nātra kāryā vicāraṇā

kṛtvopalepanaṃ viṣṇornarastvāyatane sadā //
gomayena śubhām̐llokānayatnādeva gacchati

hastapramāṇaṃ bhūbhāgamupalipya narādhipa //
devarāmāśataṃ nākaṃ labheta satataṃ naraḥ

tato'nusāreṇa phalaṃ vistṛtāyāṃ kṣitau smṛtam //
nityāsamarthastu tathā devaveśmopalepane

triḥ pakṣasya tu kurvīta devaveśmopalepanam //
pañcamīṃ daśamīṃ caiva tathā pañcadaśīṃ nṛpa

triḥ pakṣasya sadā kṛtvā devaveśmopalepanam //
saṃvatsarāttadāpnoti yatphalaṃ tannibodha me

janmāntaramathāsādya gṛhaṃ prāpnotyanuttamam //
sarvopabhogasaṃyuktaṃ gṛhaprāsādasaṅkulam

vṛkṣodyānalatāgulmatoyavāpīvibhūṣitam //
gavāśvadhanadhānyāḍhyaṃ sarvopakaraṇairyutam

priyaṃvadābhirhṛdyābhiḥ svarūpābhiśca pārthiva //
vṛtaṃ ca bahubhiḥ strībhiścāruvaṃśābhireva ca

gārhasthyaṃ ca dṛḍhaṃ tatra sa cāpnoti mahītale //
na ca pracyavanaṃ tasmājjīvannāpnoti karhicit

tasya ye bāndhavāstatra sarve te dīrghajīvinaḥ //
bhavanti na bhavantyasya ādhayo vyādhayastathā

na tasya mṛtaniṣkrāntirgṛhe bhavati karhicit//
yāvajjīvatyasau tatra gṛhe śrīmānmudā yutaḥ

caurajaṃ na bhayaṃ tasya na ca vyādhikṛtaṃ bhayam //
vyālabhūpālajaṃ vāpi na ca tasya phalaṃ bhavet

svarūpaḥ sarvasiddhārtho dīrghāyurvyādhivarjitaḥ //
ājñāvidheyabhṛtyaśca dhruvaṃ syānmanujeśvara

bhuñjāno yaḥ sadā kuryāttasyaitatkathitaṃ phalam //
naktabhojī tathā kṛtvā dviguṇaṃ phalamāpnuyāt

upoṣitastu riktāsu pūrṇāsu tu harergṛhe //
kṛtvopalepanaṃ nityaṃ cānantyaṃ phalamaśnute

upalepanakṛdyastu kṛṣṇasyāyatane bhavet //
pāpasaṃmārjanaṃ tasya śīghrameva bhaviṣyati

niṣpādyametatsasukhaṃ narendra ārādhanaṃ devavarasya viṣṇoḥ //
proktaṃ mayā te dhanavarjitānāṃ dhanānvitānāṃ saphalaṃ viśeṣam

iti śrīviṣṇudharmottare prathamakhaṇḍe mārkaṇḍeya vajrasaṃvāde upalepanaphalapraśaṃsano nāmaikonasaptatyadhikaśatatamo'dhyāyaḥ