Vishnudharmottara Purana · Chapter 1.168

vajra uvāca //
upavāsāsamarthānāṃ hīnānāṃ draviṇena ca //
karmaṇā kena dharmajña toṣamāyāti śaṅkaraḥ

mārkaṇḍeya uvāca//
santi puṣpāṇyaraṇyeṣu mūlāni ca phalāni ca //
svayaṃ grāhyāṇi rājendra yaistuṣyati janārdanaḥ

candraḥ sāmānyadīpo'yaṃ vibhavaiḥ kimprayojanam //
yathālabhyena rājendra yaistuṣyati janārdanaḥ

phalamūlāśano'raṇye kusumairmadhusūdanam //
sampūjya satataṃ kāmānabhīṣṭānpratipadyate

akāmastadavāpnoti yadviṣṇoḥ paramaṃ padam //
araṇyeṣu naraḥ kṛtvā devadevasya cārcanam

atītamuddharedrājanphalena sa śataṃ nṛṇām //
bhaviṣyāṇāṃ śataṃ caiva narāṇāṃ yadunandana

nagare'pi vasanyastu bhaikṣyāśī saṃśitavrataḥ //
araṇyādāhṛtaiḥ puṣpairmūlapatraphalāṅkuraiḥ

yathopapannaiḥ satatamabhyarcayati keśavam //
sarvakāmaprado devastasya syānmadhusūdanaḥ

tasyāpyakāmakāmasya paraṃ sthānaṃ prakīrtitam //
yatra gatvā na śocanti tadviṣṇoḥ paramaṃ padama//////
svayamāhṛtya puṣpādyaibhaikṣyāśī keśavārcanam //
kṛtaṃ yena sa rājendra vaṃśānuddharate śatam

vaṃśānatītānpañcāśattāvataścāpyanāgatān //
uddharedātmano rājannātra kāryā vicāraṇā

(gṛhastho'pi naro rājandharmāgatadhanāgamaḥ //
araṇyādāhṛtaiḥ puṣpairyaḥ kuryātkeśavārcanam

etadeva samāpnoti nātra kāryā vicāraṇā //
dharmārjitadhanaḥ krītvā yaḥ kurvankeśavārcanam

)
svayamuptaiśca kusumairyaḥ kuryātkeśavārcanam //
uddhariṣyatyasandehaṃ saptapūrvāparānnarān

yathākathañcidāhṛtya kathañcitpūjayeddharim //
nākapṛṣṭhamavāpnoti na me'trāsti vicāraṇā

mānuṣye ca parāṃ rājañchriyamāpnotyasaṃśayam //
vanādāhatya kusumaiḥ kartavyaṃ devatārcanam

patraṃ puṣpaṃ phalaṃ toyaṃ dūrvāṅkuramathāpi vā //
nivedayitvā kṛṣṇāya bhoktā nākamavāpnuyāta //
akṣamaistūpavāsānāṃ tathā dhanavivarjitaiḥ

vanādāhṛtya kusumaiḥ kartavyaṃ devatārcanam //
araṇyādāhṛtaiḥ puṣpaiḥ sampūjya madhusūdanam

pūrvajanmani samprāptaṃ rājyaṃ śṛṇu narādhipa //
nṛgo yayātirnahuṣo viṣvagaśvaḥ karandhamaḥ

dilīpo yavanāśvaśca ṛtuparṇo bhagīrathaḥ //
somakaḥ sahadevaśca mahāmālo mahāhanuḥ

revakaḥ kālakākhyaśca kṛtavīryo guṇākaraḥ //
devarātaḥ kakutsthaśca vinīto vikrame raghuḥ

mahotsāho vītabhayo niramitraḥ prabhākaraḥ //
kapotaromā parjanyaścandrasenaḥ parāntakaḥ

bhīmaseno dṛḍharathaḥ kuśanābhaḥ prabhadrakaḥ //
ete cānye ca bahavaḥ pūrvajanmani keśavam

pūjayitvā kṣitāvasyāṃ prāpū rājyamakaṇṭakam //
yakṣatvamatha devatvaṃ gandharvatvaṃ tathaiva ca

vidyādharatvaṃ nāgatvaṃ ye gatā manujottama //
bahutvātte kathaṃ śakyā mayā vaktuṃ tavānagha

tasmādyatnaḥ sadā kāryaḥ puruṣaiḥ kusumārcane

araṇyajātaiḥ kusumaiḥ sadaiva saṃpūjayitvā svayamāhṛtaistu //
sarveśvaratvaṃ phalamāpnuvanti rājendra tadvarṇayituṃ na śakyam

iti śrīviṣṇudharmottare prathamakhaṇḍe mārkaṇḍeyavajrasaṃvāde puṣpāharaṇaphalavarṇanaṃ nāmāṣṭaṣaṣṭyadhikaśatatamo'dhyāyaḥ