વિષ્ણુધર્મોત્તરપુરાણમ્ · અધ્યાય 1.169

વજ્ર ઉવાચ ॥
અટવ્યો દારુણા બ્રહ્મન્સિંહવ્યાઘ્રનિષેવિતાઃ ॥
તસ્કરાચરિતા ઘોરાઃ સરીસૃપવિમિશ્રિતાઃ

નિત્યોત્થિતસ્ય ચાધ્વાનં દાહક્ષયકરં પરમ્ ॥
અતઃ સ્વલ્પતરં કર્મ બ્રૂહિ મે કેશવાર્ચને

માર્કણ્ડેય ઉવાચ ॥
અતઃ સ્વલ્પતરં રાજન્દેવવેશ્માનુલેપનમ્ ॥
મહાફલં વિનિર્દિષ્ટં બ્રાહ્મણૈર્વેદપારગૈઃ

સમ્માર્જનં તુ યઃ કુર્યાત્પુરુષઃ કેશવાલયે ॥
રજસ્તમોભ્યાં નિર્મુક્તઃ સ ભવેન્નાત્ર સંશયઃ

પાંસૂનાં યાવતાં રાજન્કુર્યાત્સમ્માર્જનં નરઃ ॥
તાવન્ત્યબ્દાનિ સ સુખી નાકમાસાદ્ય મોદતે

અભ્યુક્ષણં તુ યઃ કુર્યાત્પાનીયેન સુરાલયે॥
સ શાન્તપાપો ભવતિ નાત્ર કાર્યા વિચારણા

કૃત્વોપલેપનં વિષ્ણોર્નરસ્ત્વાયતને સદા ॥
ગોમયેન શુભાઁલ્લોકાનયત્નાદેવ ગચ્છતિ

હસ્તપ્રમાણં ભૂભાગમુપલિપ્ય નરાધિપ ॥
દેવરામાશતં નાકં લભેત સતતં નરઃ

તતોઽનુસારેણ ફલં વિસ્તૃતાયાં ક્ષિતૌ સ્મૃતમ્ ॥
નિત્યાસમર્થસ્તુ તથા દેવવેશ્મોપલેપને

ત્રિઃ પક્ષસ્ય તુ કુર્વીત દેવવેશ્મોપલેપનમ્ ॥
પઞ્ચમીં દશમીં ચૈવ તથા પઞ્ચદશીં નૃપ

ત્રિઃ પક્ષસ્ય સદા કૃત્વા દેવવેશ્મોપલેપનમ્ ॥
સંવત્સરાત્તદાપ્નોતિ યત્ફલં તન્નિબોધ મે

જન્માન્તરમથાસાદ્ય ગૃહં પ્રાપ્નોત્યનુત્તમમ્ ॥
સર્વોપભોગસંયુક્તં ગૃહપ્રાસાદસઙ્કુલમ્

વૃક્ષોદ્યાનલતાગુલ્મતોયવાપીવિભૂષિતમ્ ॥
ગવાશ્વધનધાન્યાઢ્યં સર્વોપકરણૈર્યુતમ્

પ્રિયંવદાભિર્હૃદ્યાભિઃ સ્વરૂપાભિશ્ચ પાર્થિવ ॥
વૃતં ચ બહુભિઃ સ્ત્રીભિશ્ચારુવંશાભિરેવ ચ

ગાર્હસ્થ્યં ચ દૃઢં તત્ર સ ચાપ્નોતિ મહીતલે ॥
ન ચ પ્રચ્યવનં તસ્માજ્જીવન્નાપ્નોતિ કર્હિચિત્

તસ્ય યે બાન્ધવાસ્તત્ર સર્વે તે દીર્ઘજીવિનઃ ॥
ભવન્તિ ન ભવન્ત્યસ્ય આધયો વ્યાધયસ્તથા

ન તસ્ય મૃતનિષ્ક્રાન્તિર્ગૃહે ભવતિ કર્હિચિત્॥
યાવજ્જીવત્યસૌ તત્ર ગૃહે શ્રીમાન્મુદા યુતઃ

ચૌરજં ન ભયં તસ્ય ન ચ વ્યાધિકૃતં ભયમ્ ॥
વ્યાલભૂપાલજં વાપિ ન ચ તસ્ય ફલં ભવેત્

સ્વરૂપઃ સર્વસિદ્ધાર્થો દીર્ઘાયુર્વ્યાધિવર્જિતઃ ॥
આજ્ઞાવિધેયભૃત્યશ્ચ ધ્રુવં સ્યાન્મનુજેશ્વર

ભુઞ્જાનો યઃ સદા કુર્યાત્તસ્યૈતત્કથિતં ફલમ્ ॥
નક્તભોજી તથા કૃત્વા દ્વિગુણં ફલમાપ્નુયાત્

ઉપોષિતસ્તુ રિક્તાસુ પૂર્ણાસુ તુ હરેર્ગૃહે ॥
કૃત્વોપલેપનં નિત્યં ચાનન્ત્યં ફલમશ્નુતે

ઉપલેપનકૃદ્યસ્તુ કૃષ્ણસ્યાયતને ભવેત્ ॥
પાપસંમાર્જનં તસ્ય શીઘ્રમેવ ભવિષ્યતિ

નિષ્પાદ્યમેતત્સસુખં નરેન્દ્ર આરાધનં દેવવરસ્ય વિષ્ણોઃ ॥
પ્રોક્તં મયા તે ધનવર્જિતાનાં ધનાન્વિતાનાં સફલં વિશેષમ્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેય વજ્રસંવાદે ઉપલેપનફલપ્રશંસનો નામૈકોનસપ્તત્યધિકશતતમોઽધ્યાયઃ